| Library / Tipiṭaka / திபிடக • Tipiṭaka / விமானவத்து²பாளி • Vimānavatthupāḷi |
4. சதுத்த²பீட²விமானவத்து²
4. Catutthapīṭhavimānavatthu
23.
23.
‘‘பீட²ங் தே வேளுரியமயங் உளாரங், மனோஜவங் க³ச்ச²தி யேனகாமங்;
‘‘Pīṭhaṃ te veḷuriyamayaṃ uḷāraṃ, manojavaṃ gacchati yenakāmaṃ;
அலங்கதே மல்யத⁴ரே ஸுவத்தே², ஓபா⁴ஸஸி விஜ்ஜுரிவப்³ப⁴கூடங்.
Alaṅkate malyadhare suvatthe, obhāsasi vijjurivabbhakūṭaṃ.
24.
24.
‘‘கேன தேதாதி³ஸோ வண்ணோ, கேன தே இத⁴ மிஜ்ஜ²தி;
‘‘Kena tetādiso vaṇṇo, kena te idha mijjhati;
உப்பஜ்ஜந்தி ச தே போ⁴கா³, யே கேசி மனஸோ பியா.
Uppajjanti ca te bhogā, ye keci manaso piyā.
25.
25.
‘‘புச்சா²மி தங் தே³வி மஹானுபா⁴வே, மனுஸ்ஸபூ⁴தா கிமகாஸி புஞ்ஞங்;
‘‘Pucchāmi taṃ devi mahānubhāve, manussabhūtā kimakāsi puññaṃ;
கேனாஸி ஏவங் ஜலிதானுபா⁴வா, வண்ணோ ச தே ஸப்³ப³தி³ஸா பபா⁴ஸதீ’’தி.
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
26.
26.
ஸா தே³வதா அத்தமனா, மொக்³க³ல்லானேன புச்சி²தா;
Sā devatā attamanā, moggallānena pucchitā;
பஞ்ஹங் புட்டா² வியாகாஸி, யஸ்ஸ கம்மஸ்ஸித³ங் ப²லங்.
Pañhaṃ puṭṭhā viyākāsi, yassa kammassidaṃ phalaṃ.
27.
27.
‘‘அப்பஸ்ஸ கம்மஸ்ஸ ப²லங் மமேத³ங், யேனம்ஹி ஏவங் ஜலிதானுபா⁴வா;
‘‘Appassa kammassa phalaṃ mamedaṃ, yenamhi evaṃ jalitānubhāvā;
அஹங் மனுஸ்ஸேஸு மனுஸ்ஸபூ⁴தா, புரிமாய ஜாதியா மனுஸ்ஸலோகே.
Ahaṃ manussesu manussabhūtā, purimāya jātiyā manussaloke.
28.
28.
‘‘அத்³த³ஸங் விரஜங் பி⁴க்கு²ங், விப்பஸன்னமனாவிலங்;
‘‘Addasaṃ virajaṃ bhikkhuṃ, vippasannamanāvilaṃ;
தஸ்ஸ அதா³ஸஹங் பீட²ங், பஸன்னா ஸேஹி பாணிபி⁴.
Tassa adāsahaṃ pīṭhaṃ, pasannā sehi pāṇibhi.
29.
29.
‘‘தேன மேதாதி³ஸோ வண்ணோ, தேன மே இத⁴ மிஜ்ஜ²தி;
‘‘Tena metādiso vaṇṇo, tena me idha mijjhati;
உப்பஜ்ஜந்தி ச மே போ⁴கா³, யே கேசி மனஸோ பியா.
Uppajjanti ca me bhogā, ye keci manaso piyā.
30.
30.
‘‘அக்கா²மி தே பி⁴க்கு² மஹானுபா⁴வ, மனுஸ்ஸபூ⁴தா யமகாஸி புஞ்ஞங்;
‘‘Akkhāmi te bhikkhu mahānubhāva, manussabhūtā yamakāsi puññaṃ;
தேனம்ஹி ஏவங் ஜலிதானுபா⁴வா, வண்ணோ ச மே ஸப்³ப³தி³ஸா பபா⁴ஸதீ’’தி.
Tenamhi evaṃ jalitānubhāvā, vaṇṇo ca me sabbadisā pabhāsatī’’ti.
சதுத்த²பீட²விமானங் சதுத்த²ங்.
Catutthapīṭhavimānaṃ catutthaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / விமானவத்து²-அட்ட²கதா² • Vimānavatthu-aṭṭhakathā / 4. சதுத்த²பீட²விமானவண்ணனா • 4. Catutthapīṭhavimānavaṇṇanā
