| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
4. சதுத்த²னயோ ஸங்க³ஹிதேனஸங்க³ஹிதபத³வண்ணனா
4. Catutthanayo saṅgahitenasaṅgahitapadavaṇṇanā
191. இதா³னி ஸங்க³ஹிதேனஸங்க³ஹிதபத³ங் பா⁴ஜேதுங் ஸமுத³யஸச்சேனாதிஆதி³ ஆரத்³த⁴ங். தத்த² யங் க²ந்தா⁴தீ³ஹி ஸங்க³ஹிதேன க²ந்தா⁴தி³வஸேன ஸங்க³ஹிதங், புன தஸ்ஸேவ க²ந்தா⁴தீ³ஹி ஸங்க³ஹங் புச்சி²த்வா விஸ்ஸஜ்ஜனங் கதங். தங் க²ந்தா⁴யதனதா⁴தூஸு ஏகம்பி ஸகலகொட்டா²ஸங் க³ஹெத்வா டி²தபதே³ஸு ந யுஜ்ஜதி. ஸகலேன ஹி க²ந்தா⁴தி³பதே³ன அஞ்ஞங் க²ந்தா⁴தி³வஸேன ஸங்க³ஹிதங் நாம நத்தி², யங் அத்தனோ ஸங்கா³ஹகங் ஸங்க³ண்ஹித்வா புன தேனேவ ஸங்க³ஹங் க³ச்செ²ய்ய. தஸ்மா ததா²ரூபானி பதா³னி இமஸ்மிங் வாரே ந க³ஹிதானி. யானி பன பதா³னி ஸங்கா²ரேகதே³ஸங் வா அஞ்ஞேன அஸம்மிஸ்ஸங் தீ³பெந்தி – வேத³னேகதே³ஸங் வா ஸுகு²மரூபங் வா ஸத்³தே³கதே³ஸங் வா, தானி இத⁴ க³ஹிதானி. தேஸங் இத³முத்³தா³னங் –
191. Idāni saṅgahitenasaṅgahitapadaṃ bhājetuṃ samudayasaccenātiādi āraddhaṃ. Tattha yaṃ khandhādīhi saṅgahitena khandhādivasena saṅgahitaṃ, puna tasseva khandhādīhi saṅgahaṃ pucchitvā vissajjanaṃ kataṃ. Taṃ khandhāyatanadhātūsu ekampi sakalakoṭṭhāsaṃ gahetvā ṭhitapadesu na yujjati. Sakalena hi khandhādipadena aññaṃ khandhādivasena saṅgahitaṃ nāma natthi, yaṃ attano saṅgāhakaṃ saṅgaṇhitvā puna teneva saṅgahaṃ gaccheyya. Tasmā tathārūpāni padāni imasmiṃ vāre na gahitāni. Yāni pana padāni saṅkhārekadesaṃ vā aññena asammissaṃ dīpenti – vedanekadesaṃ vā sukhumarūpaṃ vā saddekadesaṃ vā, tāni idha gahitāni. Tesaṃ idamuddānaṃ –
‘‘த்³வே ஸச்சா பன்னரஸிந்த்³ரியா, ஏகாத³ஸ படிச்சபதா³;
‘‘Dve saccā pannarasindriyā, ekādasa paṭiccapadā;
உத்³த⁴ங் புன ஏகாத³ஸ, கொ³ச்ச²கபத³மெத்த² திங்ஸவித⁴’’ந்தி.
Uddhaṃ puna ekādasa, gocchakapadamettha tiṃsavidha’’nti.
பஞ்ஹா பனெத்த² த்³வேயேவ ஹொந்தி. தத்த² யங் புச்சா²ய உத்³த⁴டங் பத³ங், ததே³வ யேஹி த⁴ம்மேஹி க²ந்தா⁴தி³வஸேன ஸங்க³ஹிதங், தே த⁴ம்மே ஸந்தா⁴ய ஸப்³ப³த்த² ஏகேன க²ந்தே⁴னாதிஆதி³ வுத்தங். தத்ராயங் நயோ – ஸமுத³யஸச்சேன ஹி தண்ஹாவஜ்ஜா ஸேஸா ஸங்கா²ரா க²ந்தா⁴தி³ஸங்க³ஹேன ஸங்க³ஹிதா. புன தேஹி தண்ஹாவ ஸங்க³ஹிதா. ஸா தண்ஹா புன ஸங்கா²ரேஹேவ க²ந்தா⁴தி³ஸங்க³ஹேன ஸங்க³ஹிதாதி. ஏஸேவ நயோ ஸப்³ப³த்த². அரூபத⁴ம்மபுச்சா²ஸு பனெத்த² ஸங்கா²ரக்க²ந்தோ⁴ வா வேத³னாக்க²ந்தோ⁴ வா ஏகோ க²ந்தோ⁴ நாம. ரூபத⁴ம்மபுச்சா²ஸு ரூபக்க²ந்தோ⁴. பரிதே³வபுச்சா²ய ஸத்³தா³யதனங் ஏகங் ஆயதனங் நாம. ஸத்³த³தா⁴து ஏகா தா⁴து நாம, ஸேஸட்டா²னேஸு த⁴ம்மாயதனத⁴ம்மதா⁴துவஸேனேவ அத்தோ² வேதி³தப்³போ³தி.
Pañhā panettha dveyeva honti. Tattha yaṃ pucchāya uddhaṭaṃ padaṃ, tadeva yehi dhammehi khandhādivasena saṅgahitaṃ, te dhamme sandhāya sabbattha ekena khandhenātiādi vuttaṃ. Tatrāyaṃ nayo – samudayasaccena hi taṇhāvajjā sesā saṅkhārā khandhādisaṅgahena saṅgahitā. Puna tehi taṇhāva saṅgahitā. Sā taṇhā puna saṅkhāreheva khandhādisaṅgahena saṅgahitāti. Eseva nayo sabbattha. Arūpadhammapucchāsu panettha saṅkhārakkhandho vā vedanākkhandho vā eko khandho nāma. Rūpadhammapucchāsu rūpakkhandho. Paridevapucchāya saddāyatanaṃ ekaṃ āyatanaṃ nāma. Saddadhātu ekā dhātu nāma, sesaṭṭhānesu dhammāyatanadhammadhātuvaseneva attho veditabboti.
ஸங்க³ஹிதேனஸங்க³ஹிதபத³வண்ணனா.
Saṅgahitenasaṅgahitapadavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / தா⁴துகதா²பாளி • Dhātukathāpāḷi / 4. ஸங்க³ஹிதேனஸங்க³ஹிதபத³னித்³தே³ஸோ • 4. Saṅgahitenasaṅgahitapadaniddeso
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 4. சதுத்த²னயோ ஸங்க³ஹிதேனஸங்க³ஹிதபத³வண்ணனா • 4. Catutthanayo saṅgahitenasaṅgahitapadavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 4. சதுத்த²னயோ ஸங்க³ஹிதேனஸங்க³ஹிதபத³வண்ணனா • 4. Catutthanayo saṅgahitenasaṅgahitapadavaṇṇanā
