| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
49. චතුරාරක්ඛනිද්දෙසො
49. Caturārakkhaniddeso
චතුරක්ඛාති –
Caturakkhāti –
461.
461.
බුද්ධානුස්සති මෙත්තා ච, අසුභං මරණස්සති;
Buddhānussati mettā ca, asubhaṃ maraṇassati;
ආරකත්තාදිනාරහං, සම්මා සාමඤ්ච බුද්ධතො.
Ārakattādinārahaṃ, sammā sāmañca buddhato.
462.
462.
සම්මාසම්බුද්ධඉති වානුස්සති යා පුනප්පුනං;
Sammāsambuddhaiti vānussati yā punappunaṃ;
නවභෙදෙ භගවතො, බුද්ධානුස්සති සා ගුණෙ.
Navabhede bhagavato, buddhānussati sā guṇe.
463.
463.
සීමට්ඨසඞ්ඝෙ සීමට්ඨදෙවතාසු ච ඉස්සරෙ;
Sīmaṭṭhasaṅghe sīmaṭṭhadevatāsu ca issare;
ජනෙ ගොචරගාමම්හි, තත්ථුපාදාය මානුසෙ.
Jane gocaragāmamhi, tatthupādāya mānuse.
464.
464.
සබ්බසත්තෙසු සුඛිතා, හොන්තාවෙරාතිආදිනා;
Sabbasattesu sukhitā, hontāverātiādinā;
පරිච්ඡිජ්ජ පරිච්ඡිජ්ජ, භාවනා මෙත්තභාවනා.
Paricchijja paricchijja, bhāvanā mettabhāvanā.
465.
465.
වණ්ණසණ්ඨානඔකාස-දිසතො පරිච්ඡෙදතො;
Vaṇṇasaṇṭhānaokāsa-disato paricchedato;
වවත්ථපෙත්වා කෙසාදි-කොට්ඨාසෙ අනුපුබ්බතො.
Vavatthapetvā kesādi-koṭṭhāse anupubbato.
466.
466.
නාතිසීඝඤ්ච සණිකං, වික්ඛෙපං පටිබාහයං;
Nātisīghañca saṇikaṃ, vikkhepaṃ paṭibāhayaṃ;
පණ්ණත්තිං සමතික්කම්ම, මුඤ්චන්තස්සානුපුබ්බතො.
Paṇṇattiṃ samatikkamma, muñcantassānupubbato.
467.
467.
වණ්ණආසයසණ්ඨාන-ගන්ධොකාසෙහි භාවනා;
Vaṇṇaāsayasaṇṭhāna-gandhokāsehi bhāvanā;
පටික්කූලාති කොට්ඨාසෙ, උද්ධුමාතාදිවත්ථුසු;
Paṭikkūlāti koṭṭhāse, uddhumātādivatthusu;
ගහෙත්වා අසුභාකාරං, පවත්තා භාවනාසුභං.
Gahetvā asubhākāraṃ, pavattā bhāvanāsubhaṃ.
468.
468.
‘‘මරණං මෙ භවිස්සති, ජීවිතං උච්ඡිජ්ජිස්සති;
‘‘Maraṇaṃ me bhavissati, jīvitaṃ ucchijjissati;
මරණං මරණං වා’’ති, භාවයිත්වාන යොනිසො.
Maraṇaṃ maraṇaṃ vā’’ti, bhāvayitvāna yoniso.
469.
469.
වධකස්සෙවුපට්ඨානා, සම්පත්තීනං විපත්තිතො;
Vadhakassevupaṭṭhānā, sampattīnaṃ vipattito;
උපසංහරතො කායබහුසාධාරණා තථා.
Upasaṃharato kāyabahusādhāraṇā tathā.
470.
470.
ආයුදුබ්බලතො කාලවවත්ථානස්සභාවතො;
Āyudubbalato kālavavatthānassabhāvato;
අද්ධානස්ස පරිච්ඡෙදා, භාවනා මරණස්සතීති.
Addhānassa paricchedā, bhāvanā maraṇassatīti.
