| Library / Tipiṭaka / ತಿಪಿಟಕ • Tipiṭaka / ಜಾತಕಪಾಳಿ • Jātakapāḷi |
೪೪೧. ಚತುಪೋಸಥಿಯಜಾತಕಂ (೩)
441. Catuposathiyajātakaṃ (3)
೨೪.
24.
ಯೋ ಕೋಪನೇಯ್ಯೇ ನ ಕರೋತಿ ಕೋಪಂ, ನ ಕುಜ್ಝತಿ ಸಪ್ಪುರಿಸೋ ಕದಾಚಿ।
Yo kopaneyye na karoti kopaṃ, na kujjhati sappuriso kadāci;
ಕುದ್ಧೋಪಿ ಸೋ ನಾವಿಕರೋತಿ ಕೋಪಂ, ತಂ ವೇ ನರಂ ಸಮಣಮಾಹು 1 ಲೋಕೇ॥
Kuddhopi so nāvikaroti kopaṃ, taṃ ve naraṃ samaṇamāhu 2 loke.
೨೫.
25.
ಊನೂದರೋ ಯೋ ಸಹತೇ ಜಿಘಚ್ಛಂ, ದನ್ತೋ ತಪಸ್ಸೀ ಮಿತಪಾನಭೋಜನೋ।
Ūnūdaro yo sahate jighacchaṃ, danto tapassī mitapānabhojano;
ಆಹಾರಹೇತು ನ ಕರೋತಿ ಪಾಪಂ, ತಂ ವೇ ನರಂ ಸಮಣಮಾಹು ಲೋಕೇ॥
Āhārahetu na karoti pāpaṃ, taṃ ve naraṃ samaṇamāhu loke.
೨೬.
26.
ಖಿಡ್ಡಂ ರತಿಂ ವಿಪ್ಪಜಹಿತ್ವಾನ ಸಬ್ಬಂ, ನ ಚಾಲಿಕಂ ಭಾಸಸಿ ಕಿಞ್ಚಿ ಲೋಕೇ।
Khiḍḍaṃ ratiṃ vippajahitvāna sabbaṃ, na cālikaṃ bhāsasi kiñci loke;
ವಿಭೂಸಟ್ಠಾನಾ ವಿರತೋ ಮೇಥುನಸ್ಮಾ, ತಂ ವೇ ನರಂ ಸಮಣಮಾಹು ಲೋಕೇ॥
Vibhūsaṭṭhānā virato methunasmā, taṃ ve naraṃ samaṇamāhu loke.
೨೭.
27.
ಪರಿಗ್ಗಹಂ ಲೋಭಧಮ್ಮಞ್ಚ ಸಬ್ಬಂ, ಯೋ ವೇ ಪರಿಞ್ಞಾಯ ಪರಿಚ್ಚಜೇತಿ।
Pariggahaṃ lobhadhammañca sabbaṃ, yo ve pariññāya pariccajeti;
ದನ್ತಂ ಠಿತತ್ತಂ ಅಮಮಂ ನಿರಾಸಂ, ತಂ ವೇ ನರಂ ಸಮಣಮಾಹು ಲೋಕೇ॥
Dantaṃ ṭhitattaṃ amamaṃ nirāsaṃ, taṃ ve naraṃ samaṇamāhu loke.
೨೮.
28.
ಪುಚ್ಛಾಮ ಕತ್ತಾರಮನೋಮಪಞ್ಞಂ 3, ಕಥಾಸು ನೋ ವಿಗ್ಗಹೋ ಅತ್ಥಿ ಜಾತೋ।
Pucchāma kattāramanomapaññaṃ 4, kathāsu no viggaho atthi jāto;
ಛಿನ್ದಜ್ಜ ಕಙ್ಖಂ ವಿಚಿಕಿಚ್ಛಿತಾನಿ, ತದಜ್ಜ 5 ಕಙ್ಖಂ ವಿತರೇಮು ಸಬ್ಬೇ॥
Chindajja kaṅkhaṃ vicikicchitāni, tadajja 6 kaṅkhaṃ vitaremu sabbe.
೨೯.
29.
ಯೇ ಪಣ್ಡಿತಾ ಅತ್ಥದಸಾ ಭವನ್ತಿ, ಭಾಸನ್ತಿ ತೇ ಯೋನಿಸೋ ತತ್ಥ ಕಾಲೇ।
Ye paṇḍitā atthadasā bhavanti, bhāsanti te yoniso tattha kāle;
ಕಥಂ ನು ಕಥಾನಂ ಅಭಾಸಿತಾನಂ, ಅತ್ಥಂ ನಯೇಯ್ಯುಂ ಕುಸಲಾ ಜನಿನ್ದಾ॥
Kathaṃ nu kathānaṃ abhāsitānaṃ, atthaṃ nayeyyuṃ kusalā janindā.
೩೦.
30.
ಕಥಂ ಹವೇ ಭಾಸತಿ ನಾಗರಾಜಾ, ಗರುಳೋ ಪನ ವೇನತೇಯ್ಯೋ ಕಿಮಾಹ।
Kathaṃ have bhāsati nāgarājā, garuḷo pana venateyyo kimāha;
ಗನ್ಧಬ್ಬರಾಜಾ ಪನ ಕಿಂ ವದೇಸಿ, ಕಥಂ ಪನ ಕುರೂನಂ ರಾಜಸೇಟ್ಠೋ॥
Gandhabbarājā pana kiṃ vadesi, kathaṃ pana kurūnaṃ rājaseṭṭho.
೩೧.
31.
ಖನ್ತಿಂ ಹವೇ ಭಾಸತಿ ನಾಗರಾಜಾ, ಅಪ್ಪಾಹಾರಂ ಗರುಳೋ ವೇನತೇಯ್ಯೋ।
Khantiṃ have bhāsati nāgarājā, appāhāraṃ garuḷo venateyyo;
ಗನ್ಧಬ್ಬರಾಜಾ ರತಿವಿಪ್ಪಹಾನಂ, ಅಕಿಞ್ಚನಂ ಕುರೂನಂ ರಾಜಸೇಟ್ಠೋ॥
Gandhabbarājā rativippahānaṃ, akiñcanaṃ kurūnaṃ rājaseṭṭho.
೩೨.
32.
ಸಬ್ಬಾನಿ ಏತಾನಿ ಸುಭಾಸಿತಾನಿ, ನ ಹೇತ್ಥ ದುಬ್ಭಾಸಿತಮತ್ಥಿ ಕಿಞ್ಚಿ।
Sabbāni etāni subhāsitāni, na hettha dubbhāsitamatthi kiñci;
ಯಸ್ಮಿಞ್ಚ ಏತಾನಿ ಪತಿಟ್ಠಿತಾನಿ, ಅರಾವ ನಾಭ್ಯಾ ಸುಸಮೋಹಿತಾನಿ।
Yasmiñca etāni patiṭṭhitāni, arāva nābhyā susamohitāni;
ಚತುಬ್ಭಿ ಧಮ್ಮೇಹಿ ಸಮಙ್ಗಿಭೂತಂ, ತಂ ವೇ ನರಂ ಸಮಣಮಾಹು ಲೋಕೇ॥
Catubbhi dhammehi samaṅgibhūtaṃ, taṃ ve naraṃ samaṇamāhu loke.
೩೩.
33.
ತುವಞ್ಹಿ 7 ಸೇಟ್ಠೋ ತ್ವಮನುತ್ತರೋಸಿ, ತ್ವಂ ಧಮ್ಮಗೂ ಧಮ್ಮವಿದೂ ಸುಮೇಧೋ।
Tuvañhi 8 seṭṭho tvamanuttarosi, tvaṃ dhammagū dhammavidū sumedho;
ಪಞ್ಞಾಯ ಪಞ್ಹಂ ಸಮಧಿಗ್ಗಹೇತ್ವಾ, ಅಚ್ಛೇಚ್ಛಿ ಧೀರೋ ವಿಚಿಕಿಚ್ಛಿತಾನಿ।
Paññāya pañhaṃ samadhiggahetvā, acchecchi dhīro vicikicchitāni;
ಅಚ್ಛೇಚ್ಛಿ ಕಙ್ಖಂ ವಿಚಿಕಿಚ್ಛಿತಾನಿ, ಚುನ್ದೋ ಯಥಾ ನಾಗದನ್ತಂ ಖರೇನ॥
Acchecchi kaṅkhaṃ vicikicchitāni, cundo yathā nāgadantaṃ kharena.
೩೪.
34.
ನೀಲುಪ್ಪಲಾಭಂ ವಿಮಲಂ ಅನಗ್ಘಂ, ವತ್ಥಂ ಇದಂ ಧೂಮಸಮಾನವಣ್ಣಂ।
Nīluppalābhaṃ vimalaṃ anagghaṃ, vatthaṃ idaṃ dhūmasamānavaṇṇaṃ;
ಪಞ್ಹಸ್ಸ ವೇಯ್ಯಾಕರಣೇನ ತುಟ್ಠೋ, ದದಾಮಿ ತೇ ಧಮ್ಮಪೂಜಾಯ ಧೀರ॥
Pañhassa veyyākaraṇena tuṭṭho, dadāmi te dhammapūjāya dhīra.
೩೫.
35.
ಸುವಣ್ಣಮಾಲಂ ಸತಪತ್ತಫುಲ್ಲಿತಂ, ಸಕೇಸರಂ ರತ್ನಸಹಸ್ಸಮಣ್ಡಿತಂ।
Suvaṇṇamālaṃ satapattaphullitaṃ, sakesaraṃ ratnasahassamaṇḍitaṃ;
ಪಞ್ಹಸ್ಸ ವೇಯ್ಯಾಕರಣೇನ ತುಟ್ಠೋ, ದದಾಮಿ ತೇ ಧಮ್ಮಪೂಜಾಯ ಧೀರ॥
Pañhassa veyyākaraṇena tuṭṭho, dadāmi te dhammapūjāya dhīra.
೩೬.
36.
ಮಣಿಂ ಅನಗ್ಘಂ ರುಚಿರಂ ಪಭಸ್ಸರಂ, ಕಣ್ಠಾವಸತ್ತಂ 9 ಮಣಿಭೂಸಿತಂ ಮೇ।
Maṇiṃ anagghaṃ ruciraṃ pabhassaraṃ, kaṇṭhāvasattaṃ 10 maṇibhūsitaṃ me;
ಪಞ್ಹಸ್ಸ ವೇಯ್ಯಾಕರಣೇನ ತುಟ್ಠೋ, ದದಾಮಿ ತೇ ಧಮ್ಮಪೂಜಾಯ ಧೀರ॥
Pañhassa veyyākaraṇena tuṭṭho, dadāmi te dhammapūjāya dhīra.
೩೭.
37.
ಗವಂ ಸಹಸ್ಸಂ ಉಸಭಞ್ಚ ನಾಗಂ, ಆಜಞ್ಞಯುತ್ತೇ ಚ ರಥೇ ದಸ ಇಮೇ।
Gavaṃ sahassaṃ usabhañca nāgaṃ, ājaññayutte ca rathe dasa ime;
ಪಞ್ಹಸ್ಸ ವೇಯ್ಯಾಕರಣೇನ ತುಟ್ಠೋ, ದದಾಮಿ ತೇ ಗಾಮವರಾನಿ ಸೋಳಸ॥
Pañhassa veyyākaraṇena tuṭṭho, dadāmi te gāmavarāni soḷasa.
೩೮.
38.
ಸಾರಿಪುತ್ತೋ ತದಾ ನಾಗೋ, ಸುಪಣ್ಣೋ ಪನ ಕೋಲಿತೋ।
Sāriputto tadā nāgo, supaṇṇo pana kolito;
ಗನ್ಧಬ್ಬರಾಜಾ ಅನುರುದ್ಧೋ, ರಾಜಾ ಆನನ್ದ ಪಣ್ಡಿತೋ।
Gandhabbarājā anuruddho, rājā ānanda paṇḍito;
ವಿಧುರೋ ಬೋಧಿಸತ್ತೋ ಚ, ಏವಂ ಧಾರೇಥ ಜಾತಕನ್ತಿ॥
Vidhuro bodhisatto ca, evaṃ dhāretha jātakanti.
ಚತುಪೋಸಥಿಯಜಾತಕಂ ತತಿಯಂ।
Catuposathiyajātakaṃ tatiyaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಜಾತಕ-ಅಟ್ಠಕಥಾ • Jātaka-aṭṭhakathā / [೪೪೧] ೩. ಚತುಪೋಸಥಿಕಜಾತಕವಣ್ಣನಾ • [441] 3. Catuposathikajātakavaṇṇanā
