| Library / Tipiṭaka / ತಿಪಿಟಕ • Tipiṭaka / ವಿಮತಿವಿನೋದನೀ-ಟೀಕಾ • Vimativinodanī-ṭīkā |
ಚತುಕ್ಕವಾರವಣ್ಣನಾ
Catukkavāravaṇṇanā
೩೨೪. ಚತುಕ್ಕೇಸು ಸೋತಿ ಗಿಹಿಪರಿಕ್ಖಾರೋ। ಅವಾಪುರಣಂ ದಾತುನ್ತಿ ಗಬ್ಭಂ ವಿವರಿತ್ವಾ ಅನ್ತೋ ಪರಿಕ್ಖಾರಟ್ಠಪನತ್ಥಾಯ ವಿವರಣಕುಞ್ಚಿಕಂ ದಾತುಂ। ಸಙ್ಘತ್ಥಾಯ ಉಪನೀತಂ ಸಯಮೇವ ಅನ್ತೋ ಪಟಿಸಾಮಿತುಮ್ಪಿ ವಟ್ಟತಿ। ತೇನಾಹ ‘‘ಅನ್ತೋ ಠಪಾಪೇತುಞ್ಚ ವಟ್ಟತೀ’’ತಿ।
324. Catukkesu soti gihiparikkhāro. Avāpuraṇaṃ dātunti gabbhaṃ vivaritvā anto parikkhāraṭṭhapanatthāya vivaraṇakuñcikaṃ dātuṃ. Saṅghatthāya upanītaṃ sayameva anto paṭisāmitumpi vaṭṭati. Tenāha ‘‘anto ṭhapāpetuñca vaṭṭatī’’ti.
ಆದಿಕಮ್ಮಿಕೇಸು ಪಠಮಂ ಪುರಿಸಲಿಙ್ಗಂ ಉಪ್ಪಜ್ಜತೀತಿ ಆಹ ‘‘ಪಠಮಂ ಉಪ್ಪನ್ನವಸೇನಾ’’ತಿ। ಪಾಳಿಯಂ ಅನಾಪತ್ತಿ ವಸ್ಸಚ್ಛೇದಸ್ಸಾತಿ ವಸ್ಸಚ್ಛೇದಸಮ್ಬನ್ಧಿನಿಯಾ ಅನಾಪತ್ತಿಯಾ ಏವಮತ್ಥೋ। ಮನ್ತಭಾಸಾತಿ ಮನ್ತಾಯ ಪಞ್ಞಾಯ ಕಥನಂ। ‘‘ನವಮಭಿಕ್ಖುನಿತೋ ಪಟ್ಠಾಯಾ’’ತಿ ಇದಂ ‘‘ಅನುಜಾನಾಮಿ, ಭಿಕ್ಖವೇ, ಅಟ್ಠನ್ನಂ ಭಿಕ್ಖುನೀನಂ ಯಥಾವುಡ್ಢಂ ಅವಸೇಸಾನಂ ಯಥಾಕತಿಕ’’ನ್ತಿ (ಚೂಳವ॰ ೪೨೬) ವಚನತೋ ಆದಿತೋ ಅಟ್ಠನ್ನಂ ಭಿಕ್ಖುನೀನಂ ಪಚ್ಚುಟ್ಠಾತಬ್ಬತ್ತಾ ವುತ್ತಂ।
Ādikammikesu paṭhamaṃ purisaliṅgaṃ uppajjatīti āha ‘‘paṭhamaṃ uppannavasenā’’ti. Pāḷiyaṃ anāpatti vassacchedassāti vassacchedasambandhiniyā anāpattiyā evamattho. Mantabhāsāti mantāya paññāya kathanaṃ. ‘‘Navamabhikkhunito paṭṭhāyā’’ti idaṃ ‘‘anujānāmi, bhikkhave, aṭṭhannaṃ bhikkhunīnaṃ yathāvuḍḍhaṃ avasesānaṃ yathākatika’’nti (cūḷava. 426) vacanato ādito aṭṭhannaṃ bhikkhunīnaṃ paccuṭṭhātabbattā vuttaṃ.
‘‘ಇಧ ನ ಕಪ್ಪನ್ತೀತಿ ವದನ್ತೋಪಿ ಪಚ್ಚನ್ತಿಮೇಸು ಆಪಜ್ಜತೀ’’ತಿಆದಿನಾ ಸಞ್ಚಿಚ್ಚ ಕಪ್ಪಿಯಂ ಅಕಪ್ಪಿಯನ್ತಿ ವಾ ಅಕಪ್ಪಿಯಂ ಕಪ್ಪಿಯನ್ತಿ ವಾ ಕಥೇನ್ತಸ್ಸ ಸಬ್ಬತ್ಥ ದುಕ್ಕಟನ್ತಿ ದಸ್ಸೇತಿ।
‘‘Idha na kappantīti vadantopi paccantimesu āpajjatī’’tiādinā sañcicca kappiyaṃ akappiyanti vā akappiyaṃ kappiyanti vā kathentassa sabbattha dukkaṭanti dasseti.
ಪುಬ್ಬಕರಣನ್ತಿ ವುಚ್ಚತೀತಿ ಅಟ್ಠಕಥಾಸು ವುತ್ತಂ, ತಾನಿ ಇಧ ಪರಿವಾರೇ ಉದ್ಧಟಾನೀತಿ ಅಧಿಪ್ಪಾಯೋ। ಇಧಾಧಿಪ್ಪೇತಾನಿ ಪನ ದಸ್ಸೇನ್ತೋ ‘‘ಛನ್ದಪಾರಿಸುದ್ಧೀ’’ತಿಆದಿಮಾಹ।
Pubbakaraṇanti vuccatīti aṭṭhakathāsu vuttaṃ, tāni idha parivāre uddhaṭānīti adhippāyo. Idhādhippetāni pana dassento ‘‘chandapārisuddhī’’tiādimāha.
ಚತುಕ್ಕವಾರವಣ್ಣನಾ ನಿಟ್ಠಿತಾ।
Catukkavāravaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಪರಿವಾರಪಾಳಿ • Parivārapāḷi / ೪. ಚತುಕ್ಕವಾರೋ • 4. Catukkavāro
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಪರಿವಾರ-ಅಟ್ಠಕಥಾ • Parivāra-aṭṭhakathā / ಚತುಕ್ಕವಾರವಣ್ಣನಾ • Catukkavāravaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಚತುಕ್ಕವಾರವಣ್ಣನಾ • Catukkavāravaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಚತುಕ್ಕವಾರವಣ್ಣನಾ • Catukkavāravaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಏಕುತ್ತರಿಕನಯೋ ಚತುಕ್ಕವಾರವಣ್ಣನಾ • Ekuttarikanayo catukkavāravaṇṇanā
