| Library / Tipiṭaka / තිපිටක • Tipiṭaka / කඞ්ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
6. චාරිත්තසික්ඛාපදවණ්ණනා
6. Cārittasikkhāpadavaṇṇanā
අන්තොඋපචාරසීමාය දස්සනූපචාරෙ භික්ඛුං දිස්වාති යත්ථ ඨිතස්ස කුලානි පයිරුපාසනචිත්තං උප්පන්නං, තතො පට්ඨාය ගච්ඡන්තො අන්තොඋපචාරසීමාය දස්සනූපචාරෙ භික්ඛුං පස්සෙ වා අභිමුඛෙ වා දිස්වා. පකතිවචනෙනාති යං ද්වාදසහත්ථබ්භන්තරෙ ඨිතෙන සොතුං සක්කා, තාදිසෙන වචනෙන, ඉතො චිතො ච පරියෙසිත්වා ආරොචනකිච්චං පන නත්ථි. යො හි එවං පරියෙසිතබ්බො, සො අසන්තොයෙව. තෙනාහ ‘‘තාදිස’’න්තිආදි. අනාපුච්ඡිත්වාති අනාරොචෙත්වා.
Antoupacārasīmāya dassanūpacāre bhikkhuṃ disvāti yattha ṭhitassa kulāni payirupāsanacittaṃ uppannaṃ, tato paṭṭhāya gacchanto antoupacārasīmāya dassanūpacāre bhikkhuṃ passe vā abhimukhe vā disvā. Pakativacanenāti yaṃ dvādasahatthabbhantare ṭhitena sotuṃ sakkā, tādisena vacanena, ito cito ca pariyesitvā ārocanakiccaṃ pana natthi. Yo hi evaṃ pariyesitabbo, so asantoyeva. Tenāha ‘‘tādisa’’ntiādi. Anāpucchitvāti anārocetvā.
අන්තරාරාමභික්ඛුනුපස්සයතිත්ථියසෙය්යපටික්කමනභත්තියඝරානීති එත්ථ අන්තරාරාමන්ති අන්තොගාමෙ විහාරො. පටික්කමනන්ති ආසනසාලා. භත්තියඝරන්ති නිමන්තිතඝරං වා සලාකභත්තාදිදායකානං වා ඝරං. ආපදාසූති ජීවිතබ්රහ්මචරියන්තරායෙසු. කිරියාකිරියන්ති එත්ථ කුලෙසු චාරිත්තාපජ්ජනං කිරියං, අනාපුච්ඡනං අකිරියන්ති වෙදිතබ්බං.
Antarārāmabhikkhunupassayatitthiyaseyyapaṭikkamanabhattiyagharānīti ettha antarārāmanti antogāme vihāro. Paṭikkamananti āsanasālā. Bhattiyagharanti nimantitagharaṃ vā salākabhattādidāyakānaṃ vā gharaṃ. Āpadāsūti jīvitabrahmacariyantarāyesu. Kiriyākiriyanti ettha kulesu cārittāpajjanaṃ kiriyaṃ, anāpucchanaṃ akiriyanti veditabbaṃ.
චාරිත්තසික්ඛාපදවණ්ණනා නිට්ඨිතා.
Cārittasikkhāpadavaṇṇanā niṭṭhitā.
