| Library / Tipiṭaka / តិបិដក • Tipiṭaka / កង្ខាវិតរណី-បុរាណ-ដីកា • Kaṅkhāvitaraṇī-purāṇa-ṭīkā |
៦. ចារិត្តសិក្ខាបទវណ្ណនា
6. Cārittasikkhāpadavaṇṇanā
សភត្តោ សមានោតិ និមន្តនភត្តោតិ បោរាណា។ សន្តំ ភិក្ខុំ, អនាបុច្ឆា, បុរេភត្តំ បច្ឆាភត្តំ, អញ្ញត្រ សមយាតិ អយមេត្ថ ចតុព្ពិធា អនុបញ្ញត្តិ។ តត្ថ សមយា ទ្វេ សមយា។ ភត្តិយឃរន្តិ និមន្តិតស្ស ឃរំ វា សលាកាភត្តាទិទាយកានំ វា ឃរំ។ ‘‘សមុដ្ឋានាទីនិ បឋមកថិនសទិសានិ, ឥទំ បន កិរិយាកិរិយ’’ន្តិ បាឋោ, ‘‘ឥធ និមន្តនា អកប្បិយនិមន្តនា’’តិ ឯកេ។
Sabhattosamānoti nimantanabhattoti porāṇā. Santaṃ bhikkhuṃ, anāpucchā, purebhattaṃ pacchābhattaṃ, aññatra samayāti ayamettha catubbidhā anupaññatti. Tattha samayā dve samayā. Bhattiyagharanti nimantitassa gharaṃ vā salākābhattādidāyakānaṃ vā gharaṃ. ‘‘Samuṭṭhānādīni paṭhamakathinasadisāni, idaṃ pana kiriyākiriya’’nti pāṭho, ‘‘idha nimantanā akappiyanimantanā’’ti eke.
បុរេភត្តញ្ច បិណ្ឌាយ, ចរិត្វា យទិ ភុញ្ជតិ;
Purebhattañca piṇḍāya, caritvā yadi bhuñjati;
សិយា បរម្បរាបត្តិ, បច្ឆាភត្តំ ន សា សិយា។
Siyā paramparāpatti, pacchābhattaṃ na sā siyā.
បច្ឆាភត្តញ្ច គមិកោ, បុព្ពគេហំ យទិ គច្ឆេ;
Pacchābhattañca gamiko, pubbagehaṃ yadi gacche;
ឯកេ អាបត្តិយេវាតិ, អនាបត្តីតិ ឯកច្ចេ។
Eke āpattiyevāti, anāpattīti ekacce.
កុលន្តរស្សោក្កមនេ, អាបត្តិមតយោ ហិ តេ;
Kulantarassokkamane, āpattimatayo hi te;
សមានភត្តបច្ចាសា, ឥតិ អាហុ ឥធាបរេ។
Samānabhattapaccāsā, iti āhu idhāpare.
មតា គណិកភត្តេន, សមេន្តិ នំ និមន្តនេ;
Matā gaṇikabhattena, samenti naṃ nimantane;
វិស្សជ្ជនំ សមានន្តិ, ឯកេ សម្មុខតាបរេ។
Vissajjanaṃ samānanti, eke sammukhatāpare.
សន្និដ្ឋានត្ថិកេហេវ, វិចារេតព្ពភេទតោ;
Sanniṭṭhānatthikeheva, vicāretabbabhedato;
វិញ្ញូ ចារិត្តមិច្ចេវ, សិក្ខាបទមិទំ វិទូ។ (វជិរ. ដី. បាចិត្តិយ ២៩៤);
Viññū cārittamicceva, sikkhāpadamidaṃ vidū. (vajira. ṭī. pācittiya 294);
ចារិត្តសិក្ខាបទវណ្ណនា និដ្ឋិតា។
Cārittasikkhāpadavaṇṇanā niṭṭhitā.
