| Library / Tipiṭaka / તિપિટક • Tipiṭaka / કઙ્ખાવિતરણી-અભિનવ-ટીકા • Kaṅkhāvitaraṇī-abhinava-ṭīkā |
૬. ચારિત્તસિક્ખાપદવણ્ણના
6. Cārittasikkhāpadavaṇṇanā
અન્તોઉપચારસીમાય દસ્સનૂપચારે ભિક્ખું દિસ્વાતિ યત્થ ઠિતસ્સ કુલાનિ પયિરુપાસનચિત્તં ઉપ્પન્નં, તતો પટ્ઠાય ગચ્છન્તો અન્તોઉપચારસીમાય દસ્સનૂપચારે ભિક્ખું પસ્સે વા અભિમુખે વા દિસ્વા. પકતિવચનેનાતિ યં દ્વાદસહત્થબ્ભન્તરે ઠિતેન સોતું સક્કા, તાદિસેન વચનેન, ઇતો ચિતો ચ પરિયેસિત્વા આરોચનકિચ્ચં પન નત્થિ. યો હિ એવં પરિયેસિતબ્બો, સો અસન્તોયેવ. તેનાહ ‘‘તાદિસ’’ન્તિઆદિ. અનાપુચ્છિત્વાતિ અનારોચેત્વા.
Antoupacārasīmāya dassanūpacāre bhikkhuṃ disvāti yattha ṭhitassa kulāni payirupāsanacittaṃ uppannaṃ, tato paṭṭhāya gacchanto antoupacārasīmāya dassanūpacāre bhikkhuṃ passe vā abhimukhe vā disvā. Pakativacanenāti yaṃ dvādasahatthabbhantare ṭhitena sotuṃ sakkā, tādisena vacanena, ito cito ca pariyesitvā ārocanakiccaṃ pana natthi. Yo hi evaṃ pariyesitabbo, so asantoyeva. Tenāha ‘‘tādisa’’ntiādi. Anāpucchitvāti anārocetvā.
અન્તરારામભિક્ખુનુપસ્સયતિત્થિયસેય્યપટિક્કમનભત્તિયઘરાનીતિ એત્થ અન્તરારામન્તિ અન્તોગામે વિહારો. પટિક્કમનન્તિ આસનસાલા. ભત્તિયઘરન્તિ નિમન્તિતઘરં વા સલાકભત્તાદિદાયકાનં વા ઘરં. આપદાસૂતિ જીવિતબ્રહ્મચરિયન્તરાયેસુ. કિરિયાકિરિયન્તિ એત્થ કુલેસુ ચારિત્તાપજ્જનં કિરિયં, અનાપુચ્છનં અકિરિયન્તિ વેદિતબ્બં.
Antarārāmabhikkhunupassayatitthiyaseyyapaṭikkamanabhattiyagharānīti ettha antarārāmanti antogāme vihāro. Paṭikkamananti āsanasālā. Bhattiyagharanti nimantitagharaṃ vā salākabhattādidāyakānaṃ vā gharaṃ. Āpadāsūti jīvitabrahmacariyantarāyesu. Kiriyākiriyanti ettha kulesu cārittāpajjanaṃ kiriyaṃ, anāpucchanaṃ akiriyanti veditabbaṃ.
ચારિત્તસિક્ખાપદવણ્ણના નિટ્ઠિતા.
Cārittasikkhāpadavaṇṇanā niṭṭhitā.
