| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
६. चारित्तसिक्खापदवण्णना
6. Cārittasikkhāpadavaṇṇanā
अन्तोउपचारसीमाय दस्सनूपचारे भिक्खुं दिस्वाति यत्थ ठितस्स कुलानि पयिरुपासनचित्तं उप्पन्नं, ततो पट्ठाय गच्छन्तो अन्तोउपचारसीमाय दस्सनूपचारे भिक्खुं पस्से वा अभिमुखे वा दिस्वा। पकतिवचनेनाति यं द्वादसहत्थब्भन्तरे ठितेन सोतुं सक्का, तादिसेन वचनेन, इतो चितो च परियेसित्वा आरोचनकिच्चं पन नत्थि। यो हि एवं परियेसितब्बो, सो असन्तोयेव। तेनाह ‘‘तादिस’’न्तिआदि। अनापुच्छित्वाति अनारोचेत्वा।
Antoupacārasīmāya dassanūpacāre bhikkhuṃ disvāti yattha ṭhitassa kulāni payirupāsanacittaṃ uppannaṃ, tato paṭṭhāya gacchanto antoupacārasīmāya dassanūpacāre bhikkhuṃ passe vā abhimukhe vā disvā. Pakativacanenāti yaṃ dvādasahatthabbhantare ṭhitena sotuṃ sakkā, tādisena vacanena, ito cito ca pariyesitvā ārocanakiccaṃ pana natthi. Yo hi evaṃ pariyesitabbo, so asantoyeva. Tenāha ‘‘tādisa’’ntiādi. Anāpucchitvāti anārocetvā.
अन्तरारामभिक्खुनुपस्सयतित्थियसेय्यपटिक्कमनभत्तियघरानीति एत्थ अन्तरारामन्ति अन्तोगामे विहारो। पटिक्कमनन्ति आसनसाला। भत्तियघरन्ति निमन्तितघरं वा सलाकभत्तादिदायकानं वा घरं। आपदासूति जीवितब्रह्मचरियन्तरायेसु। किरियाकिरियन्ति एत्थ कुलेसु चारित्तापज्जनं किरियं, अनापुच्छनं अकिरियन्ति वेदितब्बं।
Antarārāmabhikkhunupassayatitthiyaseyyapaṭikkamanabhattiyagharānīti ettha antarārāmanti antogāme vihāro. Paṭikkamananti āsanasālā. Bhattiyagharanti nimantitagharaṃ vā salākabhattādidāyakānaṃ vā gharaṃ. Āpadāsūti jīvitabrahmacariyantarāyesu. Kiriyākiriyanti ettha kulesu cārittāpajjanaṃ kiriyaṃ, anāpucchanaṃ akiriyanti veditabbaṃ.
चारित्तसिक्खापदवण्णना निट्ठिता।
Cārittasikkhāpadavaṇṇanā niṭṭhitā.
