| Library / Tipiṭaka / তিপিটক • Tipiṭaka / কঙ্খাৰিতরণী-পুরাণ-টীকা • Kaṅkhāvitaraṇī-purāṇa-ṭīkā |
৬. চারিত্তসিক্খাপদৰণ্ণনা
6. Cārittasikkhāpadavaṇṇanā
সভত্তো সমানোতি নিমন্তনভত্তোতি পোরাণা। সন্তং ভিক্খুং, অনাপুচ্ছা, পুরেভত্তং পচ্ছাভত্তং, অঞ্ঞত্র সমযাতি অযমেত্থ চতুব্বিধা অনুপঞ্ঞত্তি। তত্থ সমযা দ্ৰে সমযা। ভত্তিযঘরন্তি নিমন্তিতস্স ঘরং ৰা সলাকাভত্তাদিদাযকানং ৰা ঘরং। ‘‘সমুট্ঠানাদীনি পঠমকথিনসদিসানি, ইদং পন কিরিযাকিরিয’’ন্তি পাঠো, ‘‘ইধ নিমন্তনা অকপ্পিযনিমন্তনা’’তি একে।
Sabhattosamānoti nimantanabhattoti porāṇā. Santaṃ bhikkhuṃ, anāpucchā, purebhattaṃ pacchābhattaṃ, aññatra samayāti ayamettha catubbidhā anupaññatti. Tattha samayā dve samayā. Bhattiyagharanti nimantitassa gharaṃ vā salākābhattādidāyakānaṃ vā gharaṃ. ‘‘Samuṭṭhānādīni paṭhamakathinasadisāni, idaṃ pana kiriyākiriya’’nti pāṭho, ‘‘idha nimantanā akappiyanimantanā’’ti eke.
পুরেভত্তঞ্চ পিণ্ডায, চরিত্ৰা যদি ভুঞ্জতি।
Purebhattañca piṇḍāya, caritvā yadi bhuñjati;
সিযা পরম্পরাপত্তি, পচ্ছাভত্তং ন সা সিযা॥
Siyā paramparāpatti, pacchābhattaṃ na sā siyā.
পচ্ছাভত্তঞ্চ গমিকো, পুব্বগেহং যদি গচ্ছে।
Pacchābhattañca gamiko, pubbagehaṃ yadi gacche;
একে আপত্তিযেৰাতি, অনাপত্তীতি একচ্চে॥
Eke āpattiyevāti, anāpattīti ekacce.
কুলন্তরস্সোক্কমনে, আপত্তিমতযো হি তে।
Kulantarassokkamane, āpattimatayo hi te;
সমানভত্তপচ্চাসা, ইতি আহু ইধাপরে॥
Samānabhattapaccāsā, iti āhu idhāpare.
মতা গণিকভত্তেন, সমেন্তি নং নিমন্তনে।
Matā gaṇikabhattena, samenti naṃ nimantane;
ৰিস্সজ্জনং সমানন্তি, একে সম্মুখতাপরে॥
Vissajjanaṃ samānanti, eke sammukhatāpare.
সন্নিট্ঠানত্থিকেহেৰ, ৰিচারেতব্বভেদতো।
Sanniṭṭhānatthikeheva, vicāretabbabhedato;
ৰিঞ্ঞূ চারিত্তমিচ্চেৰ, সিক্খাপদমিদং ৰিদূ॥ (ৰজির॰ টী॰ পাচিত্তিয ২৯৪)।
Viññū cārittamicceva, sikkhāpadamidaṃ vidū. (vajira. ṭī. pācittiya 294);
চারিত্তসিক্খাপদৰণ্ণনা নিট্ঠিতা।
Cārittasikkhāpadavaṇṇanā niṭṭhitā.
