| Library / Tipiṭaka / තිපිටක • Tipiṭaka / අපදානපාළි • Apadānapāḷi |
8. චඞ්කමනදායකත්ථෙරඅපදානං
8. Caṅkamanadāyakattheraapadānaṃ
93.
93.
‘‘අත්ථදස්සිස්ස මුනිනො, ලොකජෙට්ඨස්ස තාදිනො;
‘‘Atthadassissa munino, lokajeṭṭhassa tādino;
ඉට්ඨකාහි චිනිත්වාන, චඞ්කමං කාරයිං අහං.
Iṭṭhakāhi cinitvāna, caṅkamaṃ kārayiṃ ahaṃ.
94.
94.
‘‘උච්චතො පඤ්චරතනං, චඞ්කමං සාධුමාපිතං;
‘‘Uccato pañcaratanaṃ, caṅkamaṃ sādhumāpitaṃ;
ආයාමතො හත්ථසතං, භාවනීය්යං මනොරමං.
Āyāmato hatthasataṃ, bhāvanīyyaṃ manoramaṃ.
95.
95.
‘‘පටිග්ගහෙසි භගවා, අත්ථදස්සී නරුත්තමො;
‘‘Paṭiggahesi bhagavā, atthadassī naruttamo;
හත්ථෙන පුලිනං ගය්හ, ඉමා ගාථා අභාසථ.
Hatthena pulinaṃ gayha, imā gāthā abhāsatha.
96.
96.
‘‘‘ඉමිනා පුලිනදානෙන, චඞ්කමං සුකතෙන ච;
‘‘‘Iminā pulinadānena, caṅkamaṃ sukatena ca;
සත්තරතනසම්පන්නං, පුලිනං අනුභොස්සති.
Sattaratanasampannaṃ, pulinaṃ anubhossati.
97.
97.
‘‘‘තීණි කප්පානි දෙවෙසු, දෙවරජ්ජං කරිස්සති;
‘‘‘Tīṇi kappāni devesu, devarajjaṃ karissati;
අනුභොස්සති සම්පත්තිං, අච්ඡරාහි පුරක්ඛතො.
Anubhossati sampattiṃ, accharāhi purakkhato.
98.
98.
‘‘‘මනුස්සලොකමාගන්ත්වා , රාජා රට්ඨෙ භවිස්සති;
‘‘‘Manussalokamāgantvā , rājā raṭṭhe bhavissati;
තික්ඛත්තුං චක්කවත්තී ච, මහියා සො භවිස්සති’.
Tikkhattuṃ cakkavattī ca, mahiyā so bhavissati’.
99.
99.
‘‘අට්ඨාරසෙ කප්පසතෙ, යං කම්මමකරිං තදා;
‘‘Aṭṭhārase kappasate, yaṃ kammamakariṃ tadā;
දුග්ගතිං නාභිජානාමි, චඞ්කමස්ස ඉදං ඵලං.
Duggatiṃ nābhijānāmi, caṅkamassa idaṃ phalaṃ.
100.
100.
‘‘පටිසම්භිදා චතස්සො…පෙ.… කතං බුද්ධස්ස සාසනං’’.
‘‘Paṭisambhidā catasso…pe… kataṃ buddhassa sāsanaṃ’’.
ඉත්ථං සුදං ආයස්මා චඞ්කමනදායකො ථෙරො ඉමා ගාථායො අභාසිත්ථාති.
Itthaṃ sudaṃ āyasmā caṅkamanadāyako thero imā gāthāyo abhāsitthāti.
චඞ්කමනදායකත්ථෙරස්සාපදානං අට්ඨමං.
Caṅkamanadāyakattherassāpadānaṃ aṭṭhamaṃ.
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / අපදාන-අට්ඨකථා • Apadāna-aṭṭhakathā / 8. චඞ්කමනදායකත්ථෙරඅපදානවණ්ණනා • 8. Caṅkamanadāyakattheraapadānavaṇṇanā
