| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
7. சந்த³ங்க³பஞ்ஹோ
7. Candaṅgapañho
7. ‘‘ப⁴ந்தே நாக³ஸேன, ‘சந்த³ஸ்ஸ பஞ்ச அங்கா³னி க³ஹேதப்³பா³னீ’தி யங் வதே³ஸி, கதமானி தானி பஞ்ச அங்கா³னி க³ஹேதப்³பா³னீ’’தி? ‘‘யதா², மஹாராஜ, சந்தோ³ ஸுக்கபக்கே² உத³யந்தோ உத்தருத்தரிங் வட்³ட⁴தி, ஏவமேவ கோ², மஹாராஜ, யோகி³னா யோகா³வசரேன ஆசாரஸீலகு³ணவத்தப்படிபத்தியா ஆக³மாதி⁴க³மே படிஸல்லானே ஸதிபட்டா²னே இந்த்³ரியேஸு கு³த்தத்³வாரதாய போ⁴ஜனே மத்தஞ்ஞுதாய ஜாக³ரியானுயோகே³ உத்தருத்தரிங் வட்³டி⁴தப்³ப³ங். இத³ங், மஹாராஜ, சந்த³ஸ்ஸ பட²மங் அங்க³ங் க³ஹேதப்³ப³ங்.
7. ‘‘Bhante nāgasena, ‘candassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, cando sukkapakkhe udayanto uttaruttariṃ vaḍḍhati, evameva kho, mahārāja, yoginā yogāvacarena ācārasīlaguṇavattappaṭipattiyā āgamādhigame paṭisallāne satipaṭṭhāne indriyesu guttadvāratāya bhojane mattaññutāya jāgariyānuyoge uttaruttariṃ vaḍḍhitabbaṃ. Idaṃ, mahārāja, candassa paṭhamaṃ aṅgaṃ gahetabbaṃ.
‘‘புன சபரங், மஹாராஜ, சந்தோ³ உளாராதி⁴பதி, ஏவமேவ கோ², மஹாராஜ, யோகி³னா யோகா³வசரேன உளாரேன ச²ந்தா³தி⁴பதினா ப⁴விதப்³ப³ங். இத³ங், மஹாராஜ, சந்த³ஸ்ஸ து³தியங் அங்க³ங் க³ஹேதப்³ப³ங்.
‘‘Puna caparaṃ, mahārāja, cando uḷārādhipati, evameva kho, mahārāja, yoginā yogāvacarena uḷārena chandādhipatinā bhavitabbaṃ. Idaṃ, mahārāja, candassa dutiyaṃ aṅgaṃ gahetabbaṃ.
‘‘புன சபரங், மஹாராஜ, சந்தோ³ நிஸாய சரதி, ஏவமேவ கோ², மஹாராஜ, யோகி³னா யோகா³வசரேன பவிவித்தேன ப⁴விதப்³ப³ங். இத³ங், மஹாராஜ, சந்த³ஸ்ஸ ததியங் அங்க³ங் க³ஹேதப்³ப³ங்.
‘‘Puna caparaṃ, mahārāja, cando nisāya carati, evameva kho, mahārāja, yoginā yogāvacarena pavivittena bhavitabbaṃ. Idaṃ, mahārāja, candassa tatiyaṃ aṅgaṃ gahetabbaṃ.
‘‘புன சபரங், மஹாராஜ, சந்தோ³ விமானகேது, ஏவமேவ கோ², மஹாராஜ, யோகி³னா யோகா³வசரேன ஸீலகேதுனா ப⁴விதப்³ப³ங். இத³ங், மஹாராஜ, சந்த³ஸ்ஸ சதுத்த²ங் அங்க³ங் க³ஹேதப்³ப³ங்.
‘‘Puna caparaṃ, mahārāja, cando vimānaketu, evameva kho, mahārāja, yoginā yogāvacarena sīlaketunā bhavitabbaṃ. Idaṃ, mahārāja, candassa catutthaṃ aṅgaṃ gahetabbaṃ.
‘‘புன சபரங், மஹாராஜ, சந்தோ³ ஆயாசிதபத்தி²தோ உதே³தி, ஏவமேவ கோ², மஹாராஜ, யோகி³னா யோகா³வசரேன ஆயாசிதபத்தி²தேன குலானி உபஸங்கமிதப்³பா³னி. இத³ங், மஹாராஜ, சந்த³ஸ்ஸ பஞ்சமங் அங்க³ங் க³ஹேதப்³ப³ங். பா⁴ஸிதம்பேதங், மஹாராஜ, ப⁴க³வதா தே³வாதிதே³வேன ஸங்யுத்தனிகாயவரே ‘சந்தூ³பமா, பி⁴க்க²வே, குலானி உபஸங்கமத², அபகஸ்ஸேவ காயங் அபகஸ்ஸ சித்தங் நிச்சனவகா குலேஸு அப்பக³ப்³பா⁴’’’தி 1.
‘‘Puna caparaṃ, mahārāja, cando āyācitapatthito udeti, evameva kho, mahārāja, yoginā yogāvacarena āyācitapatthitena kulāni upasaṅkamitabbāni. Idaṃ, mahārāja, candassa pañcamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare ‘candūpamā, bhikkhave, kulāni upasaṅkamatha, apakasseva kāyaṃ apakassa cittaṃ niccanavakā kulesu appagabbhā’’’ti 2.
சந்த³ங்க³பஞ்ஹோ ஸத்தமோ.
Candaṅgapañho sattamo.
Footnotes:
