| Library / Tipiṭaka / තිපිටක • Tipiṭaka / චරියාපිටකපාළි • Cariyāpiṭakapāḷi |
7. චන්දකුමාරචරියා
7. Candakumāracariyā
45.
45.
‘‘පුනාපරං යදා හොමි, එකරාජස්ස අත්රජො;
‘‘Punāparaṃ yadā homi, ekarājassa atrajo;
නගරෙ පුප්ඵවතියා, කුමාරො චන්දසව්හයො.
Nagare pupphavatiyā, kumāro candasavhayo.
46.
46.
‘‘තදාහං යජනා මුත්තො, නික්ඛන්තො යඤ්ඤවාටතො;
‘‘Tadāhaṃ yajanā mutto, nikkhanto yaññavāṭato;
සංවෙගං ජනයිත්වාන, මහාදානං පවත්තයිං.
Saṃvegaṃ janayitvāna, mahādānaṃ pavattayiṃ.
47.
47.
‘‘නාහං පිවාමි ඛාදාමි, නපි භුඤ්ජාමි භොජනං;
‘‘Nāhaṃ pivāmi khādāmi, napi bhuñjāmi bhojanaṃ;
දක්ඛිණෙය්යෙ අදත්වාන, අපි ඡප්පඤ්චරත්තියො.
Dakkhiṇeyye adatvāna, api chappañcarattiyo.
48.
48.
‘‘යථාපි වාණිජො නාම, කත්වාන භණ්ඩසඤ්චයං;
‘‘Yathāpi vāṇijo nāma, katvāna bhaṇḍasañcayaṃ;
යත්ථ ලාභො මහා හොති, තත්ථ තං 1 හරති භණ්ඩකං.
Yattha lābho mahā hoti, tattha taṃ 2 harati bhaṇḍakaṃ.
49.
49.
‘‘තථෙව සකභුත්තාපි, පරෙ දින්නං මහප්ඵලං;
‘‘Tatheva sakabhuttāpi, pare dinnaṃ mahapphalaṃ;
තස්මා පරස්ස දාතබ්බං, සතභාගො භවිස්සති.
Tasmā parassa dātabbaṃ, satabhāgo bhavissati.
50.
50.
‘‘එතමත්ථවසං ඤත්වා, දෙමි දානං භවාභවෙ;
‘‘Etamatthavasaṃ ñatvā, demi dānaṃ bhavābhave;
න පටික්කමාමි දානතො, සම්බොධිමනුපත්තියා’’ති.
Na paṭikkamāmi dānato, sambodhimanupattiyā’’ti.
චන්දකුමාරචරියං සත්තමං.
Candakumāracariyaṃ sattamaṃ.
Footnotes:
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / චරියාපිටක-අට්ඨකථා • Cariyāpiṭaka-aṭṭhakathā / 7. චන්දකුමාරචරියාවණ්ණනා • 7. Candakumāracariyāvaṇṇanā
