| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
২১. চম্মনিদ্দেসৰণ্ণনা
21. Cammaniddesavaṇṇanā
১৭৩. ইদানি ‘‘অনুজানামি, ভিক্খৰে, সব্বপচ্চন্তিমেসু জনপদেসু চম্মানি অত্থরণানি এল়কচম্মং অজচম্মং মিগচম্ম’’ন্তি (মহাৰ॰ ২৫৯) এৰং ৰুত্তচম্মানি দস্সেতুং ‘‘মিগাজেল়কচম্মানী’’তিআদিমাহ। পরিভুঞ্জিতুন্তি (মহাৰ॰ অট্ঠ॰ ২৬২) মঞ্চাদীসু যত্থ কত্থচি অত্থরিত্ৰা নিপজ্জিতুং ৰা নিসীদিতুং ৰা ৰট্টন্তীতি অত্থো। রোহিতেণীপসদা চ কুরুঙ্গা চ চ-সদ্দেন অঞ্ঞেপি ৰাল়মিগা মিগমাতুকাদযোপি মিগজাতিকা এৰাতি অধিপ্পাযো।
173. Idāni ‘‘anujānāmi, bhikkhave, sabbapaccantimesu janapadesu cammāni attharaṇāni eḷakacammaṃ ajacammaṃ migacamma’’nti (mahāva. 259) evaṃ vuttacammāni dassetuṃ ‘‘migājeḷakacammānī’’tiādimāha. Paribhuñjitunti (mahāva. aṭṭha. 262) mañcādīsu yattha katthaci attharitvā nipajjituṃ vā nisīdituṃ vā vaṭṭantīti attho. Rohiteṇīpasadā ca kuruṅgā ca ca-saddena aññepi vāḷamigā migamātukādayopi migajātikā evāti adhippāyo.
১৭৪. অনুঞ্ঞাতত্তযা অঞ্ঞন্তি –
174.Anuññātattayā aññanti –
‘‘মক্কটো কাল়সীহো চ, সরভো কদলীমিগো।
‘‘Makkaṭo kāḷasīho ca, sarabho kadalīmigo;
যে চ ৰাল়মিগা কেচি, তেসং চম্মং ন ৰট্টতী’’তি॥ –
Ye ca vāḷamigā keci, tesaṃ cammaṃ na vaṭṭatī’’ti. –
এত্থ ৰাল়মিগগ্গহণেন ৰুত্তাৰসেসা অন্তমসো গোমহিংসাদযো গহিতাতি ৰেদিতব্বা। থৰিকাতি উপাহনকোসকসত্থকোসককুঞ্চিককোসকাতি ৰেদিতব্বা, ন পত্তত্থৰিকাদযো। চম্মৰিনিচ্ছযো।
Ettha vāḷamigaggahaṇena vuttāvasesā antamaso gomahiṃsādayo gahitāti veditabbā. Thavikāti upāhanakosakasatthakosakakuñcikakosakāti veditabbā, na pattatthavikādayo. Cammavinicchayo.
চম্মনিদ্দেসৰণ্ণনা নিট্ঠিতা।
Cammaniddesavaṇṇanā niṭṭhitā.
