| Library / Tipiṭaka / តិបិដក • Tipiṭaka / ឥតិវុត្តកបាឡិ • Itivuttakapāḷi |
២. ចក្ខុសុត្តំ
2. Cakkhusuttaṃ
៦១. វុត្តញ្ហេតំ ភគវតា, វុត្តមរហតាតិ មេ សុតំ –
61. Vuttañhetaṃ bhagavatā, vuttamarahatāti me sutaṃ –
‘‘តីណិមានិ, ភិក្ខវេ, ចក្ខូនិ។ កតមានិ តីណិ? មំសចក្ខុ, ទិព្ពចក្ខុ, បញ្ញាចក្ខុ – ឥមានិ ខោ, ភិក្ខវេ, តីណិ ចក្ខូនី’’តិ។ ឯតមត្ថំ ភគវា អវោច។ តត្ថេតំ ឥតិ វុច្ចតិ –
‘‘Tīṇimāni, bhikkhave, cakkhūni. Katamāni tīṇi? Maṃsacakkhu, dibbacakkhu, paññācakkhu – imāni kho, bhikkhave, tīṇi cakkhūnī’’ti. Etamatthaṃ bhagavā avoca. Tatthetaṃ iti vuccati –
‘‘មំសចក្ខុ ទិព្ពចក្ខុ, បញ្ញាចក្ខុ អនុត្តរំ;
‘‘Maṃsacakkhu dibbacakkhu, paññācakkhu anuttaraṃ;
ឯតានិ តីណិ ចក្ខូនិ, អក្ខាសិ បុរិសុត្តមោ។
Etāni tīṇi cakkhūni, akkhāsi purisuttamo.
‘‘មំសចក្ខុស្ស ឧប្បាទោ, មគ្គោ ទិព្ពស្ស ចក្ខុនោ;
‘‘Maṃsacakkhussa uppādo, maggo dibbassa cakkhuno;
យតោ ញាណំ ឧទបាទិ, បញ្ញាចក្ខុ អនុត្តរំ;
Yato ñāṇaṃ udapādi, paññācakkhu anuttaraṃ;
យស្ស ចក្ខុស្ស បដិលាភា, សព្ពទុក្ខា បមុច្ចតី’’តិ។
Yassa cakkhussa paṭilābhā, sabbadukkhā pamuccatī’’ti.
អយម្បិ អត្ថោ វុត្តោ ភគវតា, ឥតិ មេ សុតន្តិ។ ទុតិយំ។
Ayampi attho vutto bhagavatā, iti me sutanti. Dutiyaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឥតិវុត្តក-អដ្ឋកថា • Itivuttaka-aṭṭhakathā / ២. ចក្ខុសុត្តវណ្ណនា • 2. Cakkhusuttavaṇṇanā
