| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೨. ಚಕ್ಕವಾಕಙ್ಗಪಞ್ಹೋ
2. Cakkavākaṅgapañho
೨. ‘‘ಭನ್ತೇ ನಾಗಸೇನ, ‘ಚಕ್ಕವಾಕಸ್ಸ ತೀಣಿ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ತೀಣಿ ಅಙ್ಗಾನಿ ಗಹೇತಬ್ಬಾನೀತಿ’’? ‘‘ಯಥಾ, ಮಹಾರಾಜ, ಚಕ್ಕವಾಕೋ ಯಾವ ಜೀವಿತಪರಿಯಾದಾನಾ ದುತಿಯಿಕಂ ನ ವಿಜಹತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಯಾವ ಜೀವಿತಪರಿಯಾದಾನಾ ಯೋನಿಸೋ ಮನಸಿಕಾರೋ ನ ವಿಜಹಿತಬ್ಬೋ। ಇದಂ, ಮಹಾರಾಜ, ಚಕ್ಕವಾಕಸ್ಸ ಪಠಮಂ ಅಙ್ಗಂ ಗಹೇತಬ್ಬಂ।
2. ‘‘Bhante nāgasena, ‘cakkavākassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānīti’’? ‘‘Yathā, mahārāja, cakkavāko yāva jīvitapariyādānā dutiyikaṃ na vijahati, evameva kho, mahārāja, yoginā yogāvacarena yāva jīvitapariyādānā yoniso manasikāro na vijahitabbo. Idaṃ, mahārāja, cakkavākassa paṭhamaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಚಕ್ಕವಾಕೋ ಸೇವಾಲಪಣಕಭಕ್ಖೋ, ತೇನ ಚ ಸನ್ತುಟ್ಠಿಂ ಆಪಜ್ಜತಿ, ತಾಯ ಚ ಸನ್ತುಟ್ಠಿಯಾ ಬಲೇನ ಚ ವಣ್ಣೇನ ಚ ನ ಪರಿಹಾಯತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಯಥಾಲಾಭಸನ್ತೋಸೋ ಕರಣೀಯೋ, ಯಥಾಲಾಭಸನ್ತುಟ್ಠೋ ಖೋ, ಮಹಾರಾಜ, ಯೋಗೀ ಯೋಗಾವಚರೋ ನ ಪರಿಹಾಯತಿ ಸೀಲೇನ, ನ ಪರಿಹಾಯತಿ ಸಮಾಧಿನಾ, ನ ಪರಿಹಾಯತಿ ಪಞ್ಞಾಯ, ನ ಪರಿಹಾಯತಿ ವಿಮುತ್ತಿಯಾ, ನ ಪರಿಹಾಯತಿ ವಿಮುತ್ತಿಞಾಣದಸ್ಸನೇನ, ನ ಪರಿಹಾಯತಿ ಸಬ್ಬೇಹಿ ಕುಸಲೇಹಿ ಧಮ್ಮೇಹಿ। ಇದಂ, ಮಹಾರಾಜ, ಚಕ್ಕವಾಕಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ।
‘‘Puna caparaṃ, mahārāja, cakkavāko sevālapaṇakabhakkho, tena ca santuṭṭhiṃ āpajjati, tāya ca santuṭṭhiyā balena ca vaṇṇena ca na parihāyati, evameva kho, mahārāja, yoginā yogāvacarena yathālābhasantoso karaṇīyo, yathālābhasantuṭṭho kho, mahārāja, yogī yogāvacaro na parihāyati sīlena, na parihāyati samādhinā, na parihāyati paññāya, na parihāyati vimuttiyā, na parihāyati vimuttiñāṇadassanena, na parihāyati sabbehi kusalehi dhammehi. Idaṃ, mahārāja, cakkavākassa dutiyaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಚಕ್ಕವಾಕೋ ಪಾಣೇ ನ ವಿಹೇಠಯತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ನಿಹಿತದಣ್ಡೇನ ನಿಹಿತಸತ್ಥೇನ ಲಜ್ಜಿನಾ ದಯಾಪನ್ನೇನ ಸಬ್ಬಪಾಣಭೂತಹಿತಾನುಕಮ್ಪಿನಾ ಭವಿತಬ್ಬಂ। ಇದಂ, ಮಹಾರಾಜ, ಚಕ್ಕವಾಕಸ್ಸ ತತಿಯಂ ಅಙ್ಗಂ ಗಹೇತಬ್ಬಂ। ಭಾಸತಮ್ಪೇತಂ, ಮಹಾರಾಜ, ಭಗವತಾ ದೇವಾತಿದೇವೇನ ಚಕ್ಕವಾಕಜಾತಕೇ –
‘‘Puna caparaṃ, mahārāja, cakkavāko pāṇe na viheṭhayati, evameva kho, mahārāja, yoginā yogāvacarena nihitadaṇḍena nihitasatthena lajjinā dayāpannena sabbapāṇabhūtahitānukampinā bhavitabbaṃ. Idaṃ, mahārāja, cakkavākassa tatiyaṃ aṅgaṃ gahetabbaṃ. Bhāsatampetaṃ, mahārāja, bhagavatā devātidevena cakkavākajātake –
‘‘‘ಯೋ ನ ಹನ್ತಿ ನ ಘಾತೇತಿ, ನ ಜಿನಾತಿ ನ ಜಾಪಯೇ।
‘‘‘Yo na hanti na ghāteti, na jināti na jāpaye;
ಚಕ್ಕವಾಕಙ್ಗಪಞ್ಹೋ ದುತಿಯೋ।
Cakkavākaṅgapañho dutiyo.
Footnotes:
