| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১০. ব্যসনসুত্তং
10. Byasanasuttaṃ
১৩০. ‘‘পঞ্চিমানি , ভিক্খৰে, ব্যসনানি। কতমানি পঞ্চ? ঞাতিব্যসনং, ভোগব্যসনং, রোগব্যসনং, সীলব্যসনং, দিট্ঠিব্যসনং। ন, ভিক্খৰে, সত্তা ঞাতিব্যসনহেতু ৰা ভোগব্যসনহেতু ৰা রোগব্যসনহেতু ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জন্তি। সীলব্যসনহেতু ৰা, ভিক্খৰে, সত্তা দিট্ঠিব্যসনহেতু ৰা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জন্তি। ইমানি খো, ভিক্খৰে, পঞ্চ ব্যসনানি।
130. ‘‘Pañcimāni , bhikkhave, byasanāni. Katamāni pañca? Ñātibyasanaṃ, bhogabyasanaṃ, rogabyasanaṃ, sīlabyasanaṃ, diṭṭhibyasanaṃ. Na, bhikkhave, sattā ñātibyasanahetu vā bhogabyasanahetu vā rogabyasanahetu vā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjanti. Sīlabyasanahetu vā, bhikkhave, sattā diṭṭhibyasanahetu vā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjanti. Imāni kho, bhikkhave, pañca byasanāni.
‘‘পঞ্চিমা, ভিক্খৰে, সম্পদা। কতমা পঞ্চ? ঞাতিসম্পদা, ভোগসম্পদা, আরোগ্যসম্পদা, সীলসম্পদা, দিট্ঠিসম্পদা। ন, ভিক্খৰে, সত্তা ঞাতিসম্পদাহেতু ৰা ভোগসম্পদাহেতু ৰা আরোগ্যসম্পদাহেতু ৰা কাযস্স ভেদা পরং মরণা সুগতিং সগ্গং লোকং উপপজ্জন্তি। সীলসম্পদাহেতু ৰা, ভিক্খৰে, সত্তা দিট্ঠিসম্পদাহেতু ৰা কাযস্স ভেদা পরং মরণা সুগতিং সগ্গং লোকং উপপজ্জন্তি। ইমা খো, ভিক্খৰে, পঞ্চ সম্পদা’’তি। দসমং।
‘‘Pañcimā, bhikkhave, sampadā. Katamā pañca? Ñātisampadā, bhogasampadā, ārogyasampadā, sīlasampadā, diṭṭhisampadā. Na, bhikkhave, sattā ñātisampadāhetu vā bhogasampadāhetu vā ārogyasampadāhetu vā kāyassa bhedā paraṃ maraṇā sugatiṃ saggaṃ lokaṃ upapajjanti. Sīlasampadāhetu vā, bhikkhave, sattā diṭṭhisampadāhetu vā kāyassa bhedā paraṃ maraṇā sugatiṃ saggaṃ lokaṃ upapajjanti. Imā kho, bhikkhave, pañca sampadā’’ti. Dasamaṃ.
গিলানৰগ্গো ততিযো।
Gilānavaggo tatiyo.
তস্সুদ্দানং –
Tassuddānaṃ –
গিলানো সতিসূপট্ঠি, দ্ৰে উপট্ঠাকা দুৰাযুসা।
Gilāno satisūpaṭṭhi, dve upaṭṭhākā duvāyusā;
ৰপকাসসমণসুখা, পরিকুপ্পং ব্যসনেন চাতি॥
Vapakāsasamaṇasukhā, parikuppaṃ byasanena cāti.
Related texts:
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / (১৩) ৩. গিলানৰগ্গো • (13) 3. Gilānavaggo
