| Library / Tipiṭaka / तिपिटक • Tipiṭaka / अपदानपाळि • Apadānapāḷi |
१०. बुद्धुपट्ठाकत्थेरअपदानं
10. Buddhupaṭṭhākattheraapadānaṃ
५६.
56.
‘‘विपस्सिस्स भगवतो, अहोसिं सङ्खधम्मको।
‘‘Vipassissa bhagavato, ahosiṃ saṅkhadhammako;
निच्चुपट्ठानयुत्तोम्हि, सुगतस्स महेसिनो॥
Niccupaṭṭhānayuttomhi, sugatassa mahesino.
५७.
57.
‘‘उपट्ठानफलं पस्स, लोकनाथस्स तादिनो।
‘‘Upaṭṭhānaphalaṃ passa, lokanāthassa tādino;
सट्ठितूरियसहस्सानि, परिवारेन्ति मं सदा॥
Saṭṭhitūriyasahassāni, parivārenti maṃ sadā.
५८.
58.
‘‘एकनवुतितो कप्पे, उपट्ठहिं महाइसिं।
‘‘Ekanavutito kappe, upaṭṭhahiṃ mahāisiṃ;
दुग्गतिं नाभिजानामि, उपट्ठानस्सिदं फलं॥
Duggatiṃ nābhijānāmi, upaṭṭhānassidaṃ phalaṃ.
५९.
59.
सोळसासिंसु राजानो, चक्कवत्ती महब्बला॥
Soḷasāsiṃsu rājāno, cakkavattī mahabbalā.
६०.
60.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा बुद्धुपट्ठाको थेरो इमा गाथायो अभासित्थाति।
Itthaṃ sudaṃ āyasmā buddhupaṭṭhāko thero imā gāthāyo abhāsitthāti.
बुद्धुपट्ठाकत्थेरस्सापदानं दसमं।
Buddhupaṭṭhākattherassāpadānaṃ dasamaṃ.
सुधावग्गो दसमो।
Sudhāvaggo dasamo.
तस्सुद्दानं –
Tassuddānaṃ –
सुधा सुचिन्ति चेळञ्च, सूची च गन्धमालियो।
Sudhā sucinti ceḷañca, sūcī ca gandhamāliyo;
तिपुप्फियो मधुसेना, वेय्यावच्चो चुपट्ठको।
Tipupphiyo madhusenā, veyyāvacco cupaṭṭhako;
समसट्ठि च गाथायो, अस्मिं वग्गे पकित्तिता॥
Samasaṭṭhi ca gāthāyo, asmiṃ vagge pakittitā.
अथ वग्गुद्दानं –
Atha vagguddānaṃ –
बुद्धवग्गो हि पठमो, सीहासनि सुभूति च।
Buddhavaggo hi paṭhamo, sīhāsani subhūti ca;
कुण्डधानो उपालि च, बीजनिसकचिन्ति च॥
Kuṇḍadhāno upāli ca, bījanisakacinti ca.
नागसमालो तिमिरो, सुधावग्गेन ते दस।
Nāgasamālo timiro, sudhāvaggena te dasa;
चतुद्दससता गाथा, पञ्चपञ्ञासमेव च॥
Catuddasasatā gāthā, pañcapaññāsameva ca.
बुद्धवग्गदसकं।
Buddhavaggadasakaṃ.
पठमसतकं समत्तं।
Paṭhamasatakaṃ samattaṃ.
Footnotes:
