| Library / Tipiṭaka / તિપિટક • Tipiṭaka / મિલિન્દપઞ્હપાળિ • Milindapañhapāḷi |
૨. બુદ્ધસ્સ અનુત્તરભાવપઞ્હો
2. Buddhassa anuttarabhāvapañho
૨. રાજા આહ ‘‘ભન્તે નાગસેન, બુદ્ધો અનુત્તરો’’તિ? ‘‘આમ, મહારાજ, ભગવા અનુત્તરો’’તિ. ‘‘કથં, ભન્તે નાગસેન, અદિટ્ઠપુબ્બં જાનાસિ ‘બુદ્ધો અનુત્તરો’’’તિ? ‘‘તં કિં મઞ્ઞસિ, મહારાજ, યેહિ અદિટ્ઠપુબ્બો મહાસમુદ્દો, જાનેય્યું તે, મહારાજ, મહન્તો ખો મહાસમુદ્દો ગમ્ભીરો અપ્પમેય્યો દુપ્પરિયોગાહો, યત્થિમા પઞ્ચ મહાનદિયો સતતં સમિતં અપ્પેન્તિ, સેય્યથિદં, ગઙ્ગા યમુના અચિરવતી સરભૂ મહી, નેવ તસ્સ ઊનત્તં વા પૂરત્તં વા પઞ્ઞાયતી’’તિ ? ‘‘આમ, ભન્તે, જાનેય્યુ’’ન્તિ. ‘‘એવમેવ ખો, મહારાજ, સાવકે મહન્તે પરિનિબ્બુતે પસ્સિત્વા જાનામિ ‘ભગવા અનુત્તરો’’’તિ.
2. Rājā āha ‘‘bhante nāgasena, buddho anuttaro’’ti? ‘‘Āma, mahārāja, bhagavā anuttaro’’ti. ‘‘Kathaṃ, bhante nāgasena, adiṭṭhapubbaṃ jānāsi ‘buddho anuttaro’’’ti? ‘‘Taṃ kiṃ maññasi, mahārāja, yehi adiṭṭhapubbo mahāsamuddo, jāneyyuṃ te, mahārāja, mahanto kho mahāsamuddo gambhīro appameyyo duppariyogāho, yatthimā pañca mahānadiyo satataṃ samitaṃ appenti, seyyathidaṃ, gaṅgā yamunā aciravatī sarabhū mahī, neva tassa ūnattaṃ vā pūrattaṃ vā paññāyatī’’ti ? ‘‘Āma, bhante, jāneyyu’’nti. ‘‘Evameva kho, mahārāja, sāvake mahante parinibbute passitvā jānāmi ‘bhagavā anuttaro’’’ti.
‘‘કલ્લોસિ, ભન્તે નાગસેના’’તિ.
‘‘Kallosi, bhante nāgasenā’’ti.
બુદ્ધસ્સ અનુત્તરભાવપઞ્હો દુતિયો.
Buddhassa anuttarabhāvapañho dutiyo.
