| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
२. बुद्धस्स अनुत्तरभावपञ्हो
2. Buddhassa anuttarabhāvapañho
२. राजा आह ‘‘भन्ते नागसेन, बुद्धो अनुत्तरो’’ति? ‘‘आम, महाराज, भगवा अनुत्तरो’’ति। ‘‘कथं, भन्ते नागसेन, अदिट्ठपुब्बं जानासि ‘बुद्धो अनुत्तरो’’’ति? ‘‘तं किं मञ्ञसि, महाराज, येहि अदिट्ठपुब्बो महासमुद्दो, जानेय्युं ते, महाराज, महन्तो खो महासमुद्दो गम्भीरो अप्पमेय्यो दुप्परियोगाहो, यत्थिमा पञ्च महानदियो सततं समितं अप्पेन्ति, सेय्यथिदं, गङ्गा यमुना अचिरवती सरभू मही, नेव तस्स ऊनत्तं वा पूरत्तं वा पञ्ञायती’’ति ? ‘‘आम, भन्ते, जानेय्यु’’न्ति। ‘‘एवमेव खो, महाराज, सावके महन्ते परिनिब्बुते पस्सित्वा जानामि ‘भगवा अनुत्तरो’’’ति।
2. Rājā āha ‘‘bhante nāgasena, buddho anuttaro’’ti? ‘‘Āma, mahārāja, bhagavā anuttaro’’ti. ‘‘Kathaṃ, bhante nāgasena, adiṭṭhapubbaṃ jānāsi ‘buddho anuttaro’’’ti? ‘‘Taṃ kiṃ maññasi, mahārāja, yehi adiṭṭhapubbo mahāsamuddo, jāneyyuṃ te, mahārāja, mahanto kho mahāsamuddo gambhīro appameyyo duppariyogāho, yatthimā pañca mahānadiyo satataṃ samitaṃ appenti, seyyathidaṃ, gaṅgā yamunā aciravatī sarabhū mahī, neva tassa ūnattaṃ vā pūrattaṃ vā paññāyatī’’ti ? ‘‘Āma, bhante, jāneyyu’’nti. ‘‘Evameva kho, mahārāja, sāvake mahante parinibbute passitvā jānāmi ‘bhagavā anuttaro’’’ti.
‘‘कल्लोसि, भन्ते नागसेना’’ति।
‘‘Kallosi, bhante nāgasenā’’ti.
बुद्धस्स अनुत्तरभावपञ्हो दुतियो।
Buddhassa anuttarabhāvapañho dutiyo.
