7. Buddhasaññakattheraapadānaṃ

57.

‘‘Yadā vipassī lokaggo, āyusaṅkhāramossaji;

Pathavī sampakampittha, medanī jalamekhalā.

58.

‘‘Otataṃ vitthataṃ ³ mayhaṃ, suvicittavaṭaṃsakaṃ ⁴;

Bhavanampi pakampittha, buddhassa āyusaṅkhaye.

59.

‘‘Tāso mayhaṃ samuppanno, bhavane sampakampite;

Uppādo ⁶ nu kimatthāya, āloko vipulo ahu.

60.

‘‘Vessavaṇo idhāgamma, nibbāpesi mahājanaṃ;

Pāṇabhūte ⁹ bhayaṃ natthi, ekaggā hotha saṃvutā ¹⁰.

61.

‘‘Aho buddho aho dhammo, aho no satthu sampadā;

Yasmiṃ uppajjamānamhi, pathavī ¹² sampakampati.

62.

‘‘Buddhānubhāvaṃ kittetvā, kappaṃ saggamhi modahaṃ;

Avasesesu kappesu, kusalaṃ caritaṃ ¹⁴ mayā.

63.

‘‘Ekanavutito kappe, yaṃ saññamalabhiṃ tadā;

Duggatiṃ nābhijānāmi, buddhasaññāyidaṃ phalaṃ.

64.

‘‘Ito cuddasakappamhi, rājā āsiṃ patāpavā;

Samito nāma nāmena, cakkavattī mahabbalo.

65.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā buddhasaññako thero imā gāthāyo abhāsitthāti.

Buddhasaññakattherassāpadānaṃ sattamaṃ.