| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೧೦. ಬುದ್ಧಸಬ್ಬಞ್ಞುಭಾವಪಞ್ಹೋ
10. Buddhasabbaññubhāvapañho
೧೦. ‘‘ಭನ್ತೇ ನಾಗಸೇನ, ತುಮ್ಹೇ ಭಣಥ ‘ತಥಾಗತೋ ಸಬ್ಬಞ್ಞೂ’ತಿ। ಪುನ ಚ ಭಣಥ ‘ತಥಾಗತೇನ ಸಾರಿಪುತ್ತಮೋಗ್ಗಲ್ಲಾನಪ್ಪಮುಖೇ ಭಿಕ್ಖುಸಙ್ಘೇ ಪಣಾಮಿತೇ ಚಾತುಮೇಯ್ಯಕಾ ಚ ಸಕ್ಯಾ ಬ್ರಹ್ಮಾ ಚ ಸಹಮ್ಪತಿ ಬೀಜೂಪಮಞ್ಚ ವಚ್ಛತರುಣೂಪಮಞ್ಚ ಉಪದಸ್ಸೇತ್ವಾ ಭಗವನ್ತಂ ಪಸಾದೇಸುಂ ಖಮಾಪೇಸುಂ ನಿಜ್ಝತ್ತಂ ಅಕಂಸೂ’ತಿ। ಕಿಂ ನು ಖೋ, ಭನ್ತೇ ನಾಗಸೇನ, ಅಞ್ಞಾತಾ ತಾ ಉಪಮಾ ತಥಾಗತಸ್ಸ, ಯಾಹಿ ತಥಾಗತೋ ಉಪಮಾಹಿ ಓರತೋ ಖಮಿತೋ ಉಪಸನ್ತೋ ನಿಜ್ಝತ್ತಂ ಗತೋ? ಯದಿ, ಭನ್ತೇ ನಾಗಸೇನ, ತಥಾಗತಸ್ಸ ತಾ ಉಪಮಾ ಅಞ್ಞಾತಾ, ತೇನ ಹಿ ಬುದ್ಧೋ ಅಸಬ್ಬಞ್ಞೂ, ಯದಿ ಞಾತಾ, ತೇನ ಹಿ ಓಕಸ್ಸ ಪಸಯ್ಹ ವೀಮಂಸಾಪೇಕ್ಖೋ ಪಣಾಮೇಸಿ, ತೇನ ಹಿ ತಸ್ಸ ಅಕಾರುಞ್ಞತಾ ಸಮ್ಭವತಿ। ಅಯಮ್ಪಿ ಉಭತೋ ಕೋಟಿಕೋ ಪಞ್ಹೋ ತವಾನುಪ್ಪತ್ತೋ, ಸೋ ತಯಾ ನಿಬ್ಬಾಹಿತಬ್ಬೋ’’ತಿ।
10. ‘‘Bhante nāgasena, tumhe bhaṇatha ‘tathāgato sabbaññū’ti. Puna ca bhaṇatha ‘tathāgatena sāriputtamoggallānappamukhe bhikkhusaṅghe paṇāmite cātumeyyakā ca sakyā brahmā ca sahampati bījūpamañca vacchataruṇūpamañca upadassetvā bhagavantaṃ pasādesuṃ khamāpesuṃ nijjhattaṃ akaṃsū’ti. Kiṃ nu kho, bhante nāgasena, aññātā tā upamā tathāgatassa, yāhi tathāgato upamāhi orato khamito upasanto nijjhattaṃ gato? Yadi, bhante nāgasena, tathāgatassa tā upamā aññātā, tena hi buddho asabbaññū, yadi ñātā, tena hi okassa pasayha vīmaṃsāpekkho paṇāmesi, tena hi tassa akāruññatā sambhavati. Ayampi ubhato koṭiko pañho tavānuppatto, so tayā nibbāhitabbo’’ti.
‘‘ಸಬ್ಬಞ್ಞೂ, ಮಹಾರಾಜ, ತಥಾಗತೋ, ತಾಹಿ ಚ ಉಪಮಾಹಿ ಭಗವಾ ಪಸನ್ನೋ ಓರತೋ ಖಮಿತೋ ಉಪಸನ್ತೋ ನಿಜ್ಝತ್ತಂ ಗತೋ। ಧಮ್ಮಸ್ಸಾಮೀ, ಮಹಾರಾಜ, ತಥಾಗತೋ, ತಥಾಗತಪ್ಪವೇದಿತೇಹೇವ ತೇ ಓಪಮ್ಮೇಹಿ ತಥಾಗತಂ ಆರಾಧೇಸುಂ ತೋಸೇಸುಂ ಪಸಾದೇಸುಂ, ತೇಸಞ್ಚ ತಥಾಗತೋ ಪಸನ್ನೋ ‘ಸಾಧೂ’ತಿ ಅಬ್ಭಾನುಮೋದಿ।
‘‘Sabbaññū, mahārāja, tathāgato, tāhi ca upamāhi bhagavā pasanno orato khamito upasanto nijjhattaṃ gato. Dhammassāmī, mahārāja, tathāgato, tathāgatappavediteheva te opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumodi.
‘‘ಯಥಾ, ಮಹಾರಾಜ, ಇತ್ಥೀ ಸಾಮಿಕಸ್ಸ ಸನ್ತಕೇನೇವ ಧನೇನ ಸಾಮಿಕಂ ಆರಾಧೇತಿ ತೋಸೇತಿ ಪಸಾದೇತಿ, ತಞ್ಚ ಸಾಮಿಕೋ ‘ಸಾಧೂ’ತಿ ಅಬ್ಭಾನುಮೋದತಿ, ಏವಮೇವ ಖೋ, ಮಹಾರಾಜ, ಚಾತುಮೇಯ್ಯಕಾ ಚ ಸಕ್ಯಾ ಬ್ರಹ್ಮಾ ಚ ಸಹಮ್ಪತಿ ತಥಾಗತಪ್ಪವೇದಿತೇಹೇವ ಓಪಮ್ಮೇಹಿ ತಥಾಗತಂ ಆರಾಧೇಸುಂ ತೋಸೇಸುಂ ಪಸಾದೇಸುಂ, ತೇಸಞ್ಚ ತಥಾಗತೋ ಪಸನ್ನೋ ‘ಸಾಧೂ’ತಿ ಅಬ್ಭಾನುಮೋದಿ।
‘‘Yathā, mahārāja, itthī sāmikassa santakeneva dhanena sāmikaṃ ārādheti toseti pasādeti, tañca sāmiko ‘sādhū’ti abbhānumodati, evameva kho, mahārāja, cātumeyyakā ca sakyā brahmā ca sahampati tathāgatappavediteheva opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumodi.
‘‘ಯಥಾ ವಾ ಪನ, ಮಹಾರಾಜ, ಕಪ್ಪಕೋ ರಞ್ಞೋ ಸನ್ತಕೇನೇವ ಸುವಣ್ಣಫಣಕೇನ ರಞ್ಞೋ ಉತ್ತಮಙ್ಗಂ ಪಸಾಧಯಮಾನೋ ರಾಜಾನಂ ಆರಾಧೇತಿ ತೋಸೇತಿ ಪಸಾದೇತಿ, ತಸ್ಸ ಚ ರಾಜಾ ಪಸನ್ನೋ ‘ಸಾಧೂ’ತಿ ಅಬ್ಭಾನುಮೋದತಿ, ಯಥಿಚ್ಛಿತಮನುಪ್ಪದೇತಿ, ಏವಮೇವ ಖೋ, ಮಹಾರಾಜ, ಚಾತುಮೇಯ್ಯಕಾ ಚ ಸಕ್ಯಾ ಬ್ರಹ್ಮಾ ಚ ಸಹಮ್ಪತಿ ತಥಾಗತಪ್ಪವೇದಿತೇಹೇವ ಓಪಮ್ಮೇಹಿ ತಥಾಗತಂ ಆರಾಧೇಸುಂ ತೋಸೇಸುಂ ಪಸಾದೇಸುಂ, ತೇಸಞ್ಚ ತಥಾಗತೋ ಪಸನ್ನೋ ‘ಸಾಧೂ’ತಿ ಅಬ್ಭಾನುಮೋದಿ।
‘‘Yathā vā pana, mahārāja, kappako rañño santakeneva suvaṇṇaphaṇakena rañño uttamaṅgaṃ pasādhayamāno rājānaṃ ārādheti toseti pasādeti, tassa ca rājā pasanno ‘sādhū’ti abbhānumodati, yathicchitamanuppadeti, evameva kho, mahārāja, cātumeyyakā ca sakyā brahmā ca sahampati tathāgatappavediteheva opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumodi.
‘‘ಯಥಾ ವಾ ಪನ, ಮಹಾರಾಜ, ಸದ್ಧಿವಿಹಾರಿಕೋ ಉಪಜ್ಝಾಯಾಭತಂ ಪಿಣ್ಡಪಾತಂ ಗಹೇತ್ವಾ ಉಪಜ್ಝಾಯಸ್ಸ ಉಪನಾಮೇನ್ತೋ ಉಪಜ್ಝಾಯಂ ಆರಾಧೇತಿ ತೋಸೇತಿ ಪಸಾದೇತಿ, ತಞ್ಚ ಉಪಜ್ಝಾಯೋ ಪಸನ್ನೋ ‘ಸಾಧೂ’ತಿ ಅಬ್ಭಾನುಮೋದತಿ, ಏವಮೇವ ಖೋ, ಮಹಾರಾಜ, ಚಾತುಮೇಯ್ಯಕಾ ಚ ಸಕ್ಯಾ ಬ್ರಹ್ಮಾ ಚ ಸಹಮ್ಪತಿ ತಥಾಗತಪ್ಪವೇದಿತೇಹೇವ ಓಪಮ್ಮೇಹಿ ತಥಾಗತಂ ಆರಾಧೇಸುಂ ತೋಸೇಸುಂ ಪಸಾದೇಸುಂ, ತೇಸಞ್ಚ ತಥಾಗತೋ ಪಸನ್ನೋ ‘ಸಾಧೂ’ತಿ ಅಬ್ಭಾನುಮೋದಿತ್ವಾ ಸಬ್ಬದುಕ್ಖಪರಿಮುತ್ತಿಯಾ ಧಮ್ಮಂ ದೇಸೇಸೀ’’ತಿ। ‘‘ಸಾಧು, ಭನ್ತೇ ನಾಗಸೇನ, ಏವಮೇತಂ ತಥಾ ಸಮ್ಪಟಿಚ್ಛಾಮೀತಿ।
‘‘Yathā vā pana, mahārāja, saddhivihāriko upajjhāyābhataṃ piṇḍapātaṃ gahetvā upajjhāyassa upanāmento upajjhāyaṃ ārādheti toseti pasādeti, tañca upajjhāyo pasanno ‘sādhū’ti abbhānumodati, evameva kho, mahārāja, cātumeyyakā ca sakyā brahmā ca sahampati tathāgatappavediteheva opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumoditvā sabbadukkhaparimuttiyā dhammaṃ desesī’’ti. ‘‘Sādhu, bhante nāgasena, evametaṃ tathā sampaṭicchāmīti.
ಬುದ್ಧಸಬ್ಬಞ್ಞುಭಾವಪಞ್ಹೋ ದಸಮೋ।
Buddhasabbaññubhāvapañho dasamo.
ಸಬ್ಬಞ್ಞುತಞಾಣವಗ್ಗೋ ಚತುತ್ಥೋ।
Sabbaññutañāṇavaggo catuttho.
ಇಮಸ್ಮಿಂ ವಗ್ಗೇ ದಸ ಪಞ್ಹಾ।
Imasmiṃ vagge dasa pañhā.
