| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೭. ಬುದ್ಧಪೂಜನಪಞ್ಹೋ
7. Buddhapūjanapañho
೭. ‘‘ಭನ್ತೇ ನಾಗಸೇನ, ಭಾಸಿತಮ್ಪೇತಂ ತಥಾಗತೇನ ‘ಅಬ್ಯಾವಟಾ ತುಮ್ಹೇ, ಆನನ್ದ, ಹೋಥ ತಥಾಗತಸ್ಸ ಸರೀರಪೂಜಾಯಾ’ತಿ। ಪುನ ಚ ಭಣಿತಂ –
7. ‘‘Bhante nāgasena, bhāsitampetaṃ tathāgatena ‘abyāvaṭā tumhe, ānanda, hotha tathāgatassa sarīrapūjāyā’ti. Puna ca bhaṇitaṃ –
‘‘‘ಪೂಜೇಥ ನಂ ಪೂಜನಿಯಸ್ಸ ಧಾತುಂ।
‘‘‘Pūjetha naṃ pūjaniyassa dhātuṃ;
ಏವಂ ಕರಾ ಸಗ್ಗಮಿತೋ ಗಮಿಸ್ಸಥಾ’ತಿ॥
Evaṃ karā saggamito gamissathā’ti.
‘‘ಯದಿ, ಭನ್ತೇ ನಾಗಸೇನ, ತಥಾಗತೇನ ಭಣಿತಂ ‘ಅಬ್ಯಾವಟಾ ತುಮ್ಹೇ, ಆನನ್ದ, ಹೋಥ ತಥಾಗತಸ್ಸ ಸರೀರಪೂಜಾಯಾ’ತಿ, ತೇನ ಹಿ ‘ಪೂಜೇಥ ನಂ ಪೂಜನಿಯಸ್ಸ ಧಾತುಂ, ಏವಂ ಕರಾ ಸಗ್ಗಮಿತೋ ಗಮಿಸ್ಸಥಾ’ತಿ ಯಂ ವಚನಂ, ತಂ ಮಿಚ್ಛಾ। ಯದಿ ತಥಾಗತೇನ ಭಣಿತಂ ‘ಪೂಜೇಥ ನಂ ಪೂಜನಿಯಸ್ಸ ಧಾತುಂ, ಏವಂ ಕರಾ ಸಗ್ಗಮಿತೋ ಗಮಿಸ್ಸಥಾ’ತಿ, ತೇನ ಹಿ ‘ಅಬ್ಯಾವಟಾ ತುಮ್ಹೇ ಆನನ್ದ, ಹೋಥ ತಥಾಗತಸ್ಸ ಸರೀರಪೂಜಾಯಾ’ತಿ ತಮ್ಪಿ ವಚನಂ ಮಿಚ್ಛಾ। ಅಯಮ್ಪಿ ಉಭತೋ ಕೋಟಿಕೋ ಪಞ್ಹೋ ತವಾನುಪ್ಪತ್ತೋ, ಸೋ ತಯಾ ನಿಬ್ಬಾಹಿತಬ್ಬೋ’’ತಿ।
‘‘Yadi, bhante nāgasena, tathāgatena bhaṇitaṃ ‘abyāvaṭā tumhe, ānanda, hotha tathāgatassa sarīrapūjāyā’ti, tena hi ‘pūjetha naṃ pūjaniyassa dhātuṃ, evaṃ karā saggamito gamissathā’ti yaṃ vacanaṃ, taṃ micchā. Yadi tathāgatena bhaṇitaṃ ‘pūjetha naṃ pūjaniyassa dhātuṃ, evaṃ karā saggamito gamissathā’ti, tena hi ‘abyāvaṭā tumhe ānanda, hotha tathāgatassa sarīrapūjāyā’ti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘ಭಾಸಿತಮ್ಪೇತಂ, ಮಹಾರಾಜ, ಭಗವತಾ ‘ಅಬ್ಯಾವಟಾ ತುಮ್ಹೇ, ಆನನ್ದ, ಹೋಥ ತಥಾಗತಸ್ಸ ಸರೀರಪೂಜಾಯಾ’ತಿ, ಪುನ ಚ ಭಣಿತಂ ‘ಪೂಜೇಥ ನಂ ಪೂಜನಿಯಸ್ಸ ಧಾತುಂ, ಏವಂ ಕರಾ ಸಗ್ಗಮಿತೋ ಗಮಿಸ್ಸಥಾ’ತಿ, ತಞ್ಚ ಪನ ನ ಸಬ್ಬೇಸಂ ಜಿನಪುತ್ತಾನಂ ಯೇವ ಆರಬ್ಭ ಭಣಿತಂ ‘ಅಬ್ಯಾವಟಾ ತುಮ್ಹೇ, ಆನನ್ದ, ಹೋಥ ತಥಾಗತಸ್ಸ ಸರೀರಪೂಜಾಯಾ’ತಿ। ಅಕಮ್ಮಂ ಹೇತಂ, ಮಹಾರಾಜ, ಜಿನಪುತ್ತಾನಂ ಯದಿದಂ ಪೂಜಾ, ಸಮ್ಮಸನಂ ಸಙ್ಖಾರಾನಂ, ಯೋನಿಸೋ ಮನಸಿಕಾರೋ, ಸತಿಪಟ್ಠಾನಾನುಪಸ್ಸನಾ, ಆರಮ್ಮಣಸಾರಗ್ಗಾಹೋ, ಕಿಲೇಸಯುದ್ಧಂ, ಸದತ್ಥಮನುಯುಞ್ಜನಾ, ಏತಂ ಜಿನಪುತ್ತಾನಂ ಕರಣೀಯಂ, ಅವಸೇಸಾನಂ ದೇವಮನುಸ್ಸಾನಂ ಪೂಜಾ ಕರಣೀಯಾ।
‘‘Bhāsitampetaṃ, mahārāja, bhagavatā ‘abyāvaṭā tumhe, ānanda, hotha tathāgatassa sarīrapūjāyā’ti, puna ca bhaṇitaṃ ‘pūjetha naṃ pūjaniyassa dhātuṃ, evaṃ karā saggamito gamissathā’ti, tañca pana na sabbesaṃ jinaputtānaṃ yeva ārabbha bhaṇitaṃ ‘abyāvaṭā tumhe, ānanda, hotha tathāgatassa sarīrapūjāyā’ti. Akammaṃ hetaṃ, mahārāja, jinaputtānaṃ yadidaṃ pūjā, sammasanaṃ saṅkhārānaṃ, yoniso manasikāro, satipaṭṭhānānupassanā, ārammaṇasāraggāho, kilesayuddhaṃ, sadatthamanuyuñjanā, etaṃ jinaputtānaṃ karaṇīyaṃ, avasesānaṃ devamanussānaṃ pūjā karaṇīyā.
‘‘ಯಥಾ, ಮಹಾರಾಜ, ಮಹಿಯಾ ರಾಜಪುತ್ತಾನಂ ಹತ್ಥಿಅಸ್ಸರಥಧನುಥರುಲೇಖಮುದ್ದಾಸಿಕ್ಖಾಖಗ್ಗಮನ್ತಸುತಿ- ಸಮ್ಮುತಿಯುದ್ಧಯುಜ್ಝಾಪನಕಿರಿಯಾ ಕರಣೀಯಾ, ಅವಸೇಸಾನಂ ಪುಥುವೇಸ್ಸಸುದ್ದಾನಂ ಕಸಿ ವಣಿಜ್ಜಾ ಗೋರಕ್ಖಾ ಕರಣೀಯಾ, ಏವಮೇವ ಖೋ, ಮಹಾರಾಜ, ಅಕಮ್ಮಂ ಹೇತಂ ಜಿನಪುತ್ತಾನಂ ಯದಿದಂ ಪೂಜಾ, ಸಮ್ಮಸನಂ ಸಙ್ಖಾರಾನಂ, ಯೋನಿಸೋ ಮನಸಿಕಾರೋ, ಸತಿಪಟ್ಠಾನಾನುಪಸ್ಸನಾ, ಆರಮ್ಮಣಸಾರಗ್ಗಾಹೋ, ಕಿಲೇಸಯುದ್ಧಂ, ಸದತ್ಥಮನುಯುಞ್ಜನಾ, ಏತಂ ಜಿನಪುತ್ತಾನಂ ಕರಣೀಯಂ, ಅವಸೇಸಾನಂ ದೇವಮನುಸ್ಸಾನಂ ಪೂಜಾ ಕರಣೀಯಾ।
‘‘Yathā, mahārāja, mahiyā rājaputtānaṃ hatthiassarathadhanutharulekhamuddāsikkhākhaggamantasuti- sammutiyuddhayujjhāpanakiriyā karaṇīyā, avasesānaṃ puthuvessasuddānaṃ kasi vaṇijjā gorakkhā karaṇīyā, evameva kho, mahārāja, akammaṃ hetaṃ jinaputtānaṃ yadidaṃ pūjā, sammasanaṃ saṅkhārānaṃ, yoniso manasikāro, satipaṭṭhānānupassanā, ārammaṇasāraggāho, kilesayuddhaṃ, sadatthamanuyuñjanā, etaṃ jinaputtānaṃ karaṇīyaṃ, avasesānaṃ devamanussānaṃ pūjā karaṇīyā.
‘‘ಯಥಾ ವಾ ಪನ, ಮಹಾರಾಜ, ಬ್ರಾಹ್ಮಣಮಾಣವಕಾನಂ ಇರುವೇದಂ ಯಜುವೇದಂ ಸಾಮವೇದಂ ಅಥಬ್ಬಣವೇದಂ ಲಕ್ಖಣಂ ಇತಿಹಾಸಂ ಪುರಾಣಂ ನಿಘಣ್ಡು ಕೇಟುಭಂ ಅಕ್ಖರಪ್ಪಭೇದಂ ಪದಂ ವೇಯ್ಯಾಕರಣಂ ಭಾಸಮಗ್ಗಂ ಉಪ್ಪಾತಂ ಸುಪಿನಂ ನಿಮಿತ್ತಂ ಛಳಙ್ಗಂ ಚನ್ದಗ್ಗಾಹಂ ಸೂರಿಯಗ್ಗಾಹಂ ಸುಕ್ಕರಾಹುಚರಿತಂ ಉಳುಗ್ಗಹಯುದ್ಧಂ 1 ದೇವದುನ್ದುಭಿಸ್ಸರಂ ಓಕ್ಕನ್ತಿ ಉಕ್ಕಾಪಾತಂ ಭೂಮಿಕಮ್ಮಂ 2 ದಿಸಾದಾಹಂ ಭುಮ್ಮನ್ತಲಿಕ್ಖಂ ಜೋತಿಸಂ ಲೋಕಾಯತಿಕಂ ಸಾಚಕ್ಕಂ ಮಿಗಚಕ್ಕಂ ಅನ್ತರಚಕ್ಕಂ ಮಿಸ್ಸಕುಪ್ಪಾದಂ ಸಕುಣರುತರವಿತಂ 3 ಸಿಕ್ಖಾ ಕರಣೀಯಾ, ಅವಸೇಸಾನಂ ಪುಥುವೇಸ್ಸಸುದ್ದಾನಂ ಕಸಿ ವಣಿಜ್ಜಾ ಗೋರಕ್ಖಾ ಕರಣೀಯಾ, ಏವಮೇವ ಖೋ, ಮಹಾರಾಜ, ಅಕಮ್ಮಂ ಹೇತಂ ಜಿನಪುತ್ತಾನಂ ಯದಿದಂ ಪೂಜಾ, ಸಮ್ಮಸನಂ ಸಙ್ಖಾರಾನಂ, ಯೋನಿಸೋ ಮನಸಿಕಾರೋ, ಸತಿಪಟ್ಠಾನಾನುಪಸ್ಸನಾ, ಆರಮ್ಮಣಸಾರಗ್ಗಾಹೋ, ಕಿಲೇಸಯುದ್ಧಂ, ಸದತ್ಥಮನುಯುಞ್ಜನಾ, ಏತಂ ಜಿನಪುತ್ತಾನಂ ಕರಣೀಯಂ, ಅವಸೇಸಾನಂ ದೇವಮನುಸ್ಸಾನಂ ಪೂಜಾ ಕರಣೀಯಾ, ತಸ್ಮಾ, ಮಹಾರಾಜ, ತಥಾಗತೋ ‘ಮಾ ಇಮೇ ಅಕಮ್ಮೇ ಯುಞ್ಜನ್ತು, ಕಮ್ಮೇ ಇಮೇ ಯುಞ್ಜನ್ತೂ’ತಿ ಆಹ ‘ಅಬ್ಯಾವಟಾ ತುಮ್ಹೇ, ಆನನ್ದ, ಹೋಥ ತಥಾಗತಸ್ಸ ಸರೀರಪೂಜಾಯಾ’ತಿ। ಯದೇತಂ, ಮಹಾರಾಜ, ತಥಾಗತೋ ನ ಭಣೇಯ್ಯ, ಪತ್ತಚೀವರಮ್ಪಿ ಅತ್ತನೋ ಪರಿಯಾದಾಪೇತ್ವಾ ಭಿಕ್ಖೂ ಬುದ್ಧಪೂಜಂ ಯೇವ ಕರೇಯ್ಯು’’ನ್ತಿ। ‘‘ಸಾಧು, ಭನ್ತೇ ನಾಗಸೇನ, ಏವಮೇತಂ ತಥಾ ಸಮ್ಪಟಿಚ್ಛಾಮೀ’’ತಿ।
‘‘Yathā vā pana, mahārāja, brāhmaṇamāṇavakānaṃ iruvedaṃ yajuvedaṃ sāmavedaṃ athabbaṇavedaṃ lakkhaṇaṃ itihāsaṃ purāṇaṃ nighaṇḍu keṭubhaṃ akkharappabhedaṃ padaṃ veyyākaraṇaṃ bhāsamaggaṃ uppātaṃ supinaṃ nimittaṃ chaḷaṅgaṃ candaggāhaṃ sūriyaggāhaṃ sukkarāhucaritaṃ uḷuggahayuddhaṃ 4 devadundubhissaraṃ okkanti ukkāpātaṃ bhūmikammaṃ 5 disādāhaṃ bhummantalikkhaṃ jotisaṃ lokāyatikaṃ sācakkaṃ migacakkaṃ antaracakkaṃ missakuppādaṃ sakuṇarutaravitaṃ 6 sikkhā karaṇīyā, avasesānaṃ puthuvessasuddānaṃ kasi vaṇijjā gorakkhā karaṇīyā, evameva kho, mahārāja, akammaṃ hetaṃ jinaputtānaṃ yadidaṃ pūjā, sammasanaṃ saṅkhārānaṃ, yoniso manasikāro, satipaṭṭhānānupassanā, ārammaṇasāraggāho, kilesayuddhaṃ, sadatthamanuyuñjanā, etaṃ jinaputtānaṃ karaṇīyaṃ, avasesānaṃ devamanussānaṃ pūjā karaṇīyā, tasmā, mahārāja, tathāgato ‘mā ime akamme yuñjantu, kamme ime yuñjantū’ti āha ‘abyāvaṭā tumhe, ānanda, hotha tathāgatassa sarīrapūjāyā’ti. Yadetaṃ, mahārāja, tathāgato na bhaṇeyya, pattacīvarampi attano pariyādāpetvā bhikkhū buddhapūjaṃ yeva kareyyu’’nti. ‘‘Sādhu, bhante nāgasena, evametaṃ tathā sampaṭicchāmī’’ti.
ಬುದ್ಧಪೂಜನಪಞ್ಹೋ ಸತ್ತಮೋ।
Buddhapūjanapañho sattamo.
Footnotes:
