| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೧೦. ಬುದ್ಧನಿದಸ್ಸನಪಞ್ಹೋ
10. Buddhanidassanapañho
೧೦. ರಾಜಾ ಆಹ ‘‘ಭನ್ತೇ ನಾಗಸೇನ, ಬುದ್ಧೋ ಅತ್ಥೀ’’ತಿ? ‘‘ಆಮ, ಮಹಾರಾಜ, ಭಗವಾ ಅತ್ಥೀ’’ತಿ। ‘‘ಸಕ್ಕಾ ಪನ, ಭನ್ತೇ ನಾಗಸೇನ, ಬುದ್ಧೋ ನಿದಸ್ಸೇತುಂ ಇಧವಾ ಇಧವಾ’’ತಿ? ‘‘ಪರಿನಿಬ್ಬುತೋ, ಮಹಾರಾಜ, ಭಗವಾ ಅನುಪಾದಿಸೇಸಾಯ ನಿಬ್ಬಾನಧಾತುಯಾ, ನ ಸಕ್ಕಾ ಭಗವಾ ನಿದಸ್ಸೇತುಂ ‘ಇಧ ವಾ ಇಧ ವಾ’’’ತಿ।
10. Rājā āha ‘‘bhante nāgasena, buddho atthī’’ti? ‘‘Āma, mahārāja, bhagavā atthī’’ti. ‘‘Sakkā pana, bhante nāgasena, buddho nidassetuṃ idhavā idhavā’’ti? ‘‘Parinibbuto, mahārāja, bhagavā anupādisesāya nibbānadhātuyā, na sakkā bhagavā nidassetuṃ ‘idha vā idha vā’’’ti.
‘‘ಓಪಮ್ಮಂ ಕರೋಹೀ’’ತಿ। ‘‘ತಂ ಕಿಂ ಮಞ್ಞಸಿ, ಮಹಾರಾಜ, ಮಹತೋ ಅಗ್ಗಿಕ್ಖನ್ಧಸ್ಸ ಜಲಮಾನಸ್ಸ ಯಾ ಅಚ್ಚಿ ಅತ್ಥಙ್ಗತಾ, ಸಕ್ಕಾ ಸಾ ಅಚ್ಚಿ ದಸ್ಸೇತುಂ ‘ಇಧ ವಾ ಇಧ ವಾ’’’ತಿ? ‘‘ನ ಹಿ, ಭನ್ತೇ, ನಿರುದ್ಧಾ ಸಾ ಅಚ್ಚಿ ಅಪ್ಪಞ್ಞತ್ತಿಂ ಗತಾ’’ತಿ। ‘‘ಏವಮೇವ ಖೋ, ಮಹಾರಾಜ, ಭಗವಾ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ಪರಿನಿಬ್ಬುತೋ ಅತ್ಥಙ್ಗತೋ, ನ ಸಕ್ಕಾ ಭಗವಾ ನಿದಸ್ಸೇತುಂ ‘ಇಧ ವಾ ಇಧ ವಾ’ ತಿ, ಧಮ್ಮಕಾಯೇನ ಪನ ಖೋ, ಮಹಾರಾಜ, ಸಕ್ಕಾ ಭಗವಾ ನಿದಸ್ಸೇತುಂ। ಧಮ್ಮೋ ಹಿ, ಮಹಾರಾಜ, ಭಗವತಾ ದೇಸಿತೋ’’ತಿ।
‘‘Opammaṃ karohī’’ti. ‘‘Taṃ kiṃ maññasi, mahārāja, mahato aggikkhandhassa jalamānassa yā acci atthaṅgatā, sakkā sā acci dassetuṃ ‘idha vā idha vā’’’ti? ‘‘Na hi, bhante, niruddhā sā acci appaññattiṃ gatā’’ti. ‘‘Evameva kho, mahārāja, bhagavā anupādisesāya nibbānadhātuyā parinibbuto atthaṅgato, na sakkā bhagavā nidassetuṃ ‘idha vā idha vā’ ti, dhammakāyena pana kho, mahārāja, sakkā bhagavā nidassetuṃ. Dhammo hi, mahārāja, bhagavatā desito’’ti.
‘‘ಕಲ್ಲೋಸಿ, ಭನ್ತೇ ನಾಗಸೇನಾ’’ತಿ।
‘‘Kallosi, bhante nāgasenā’’ti.
ಬುದ್ಧನಿದಸ್ಸನಪಞ್ಹೋ ದಸಮೋ।
Buddhanidassanapañho dasamo.
ಬುದ್ಧವಗ್ಗೋ ಪಞ್ಚಮೋ।
Buddhavaggo pañcamo.
ಇಮಸ್ಮಿಂ ವಗ್ಗೇ ದಸ ಪಞ್ಹಾ।
Imasmiṃ vagge dasa pañhā.
