| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৪. চতুক্কনিপাতো
4. Catukkanipāto
১. ব্রাহ্মণধম্মযাগসুত্তং
1. Brāhmaṇadhammayāgasuttaṃ
১০০. ৰুত্তঞ্হেতং ভগৰতা, ৰুত্তমরহতাতি মে সুতং –
100. Vuttañhetaṃ bhagavatā, vuttamarahatāti me sutaṃ –
‘‘অহমস্মি, ভিক্খৰে, ব্রাহ্মণো যাচযোগো সদা পযতপাণি 1 অন্তিমদেহধরো অনুত্তরো ভিসক্কো সল্লকত্তো। তস্স মে তুম্হে পুত্তা ওরসা মুখতো জাতা ধম্মজা ধম্মনিম্মিতা ধম্মদাযাদা, নো আমিসদাযাদা।
‘‘Ahamasmi, bhikkhave, brāhmaṇo yācayogo sadā payatapāṇi 2 antimadehadharo anuttaro bhisakko sallakatto. Tassa me tumhe puttā orasā mukhato jātā dhammajā dhammanimmitā dhammadāyādā, no āmisadāyādā.
‘‘দ্ৰেমানি, ভিক্খৰে, দানানি – আমিসদানঞ্চ ধম্মদানঞ্চ। এতদগ্গং, ভিক্খৰে, ইমেসং দ্ৰিন্নং দানানং যদিদং – ধম্মদানং।
‘‘Dvemāni, bhikkhave, dānāni – āmisadānañca dhammadānañca. Etadaggaṃ, bhikkhave, imesaṃ dvinnaṃ dānānaṃ yadidaṃ – dhammadānaṃ.
‘‘দ্ৰেমে, ভিক্খৰে, সংৰিভাগা – আমিসসংৰিভাগো চ ধম্মসংৰিভাগো চ। এতদগ্গং, ভিক্খৰে, ইমেসং দ্ৰিন্নং সংৰিভাগানং যদিদং – ধম্মসংৰিভাগো।
‘‘Dveme, bhikkhave, saṃvibhāgā – āmisasaṃvibhāgo ca dhammasaṃvibhāgo ca. Etadaggaṃ, bhikkhave, imesaṃ dvinnaṃ saṃvibhāgānaṃ yadidaṃ – dhammasaṃvibhāgo.
‘‘দ্ৰেমে, ভিক্খৰে, অনুগ্গহা – আমিসানুগ্গহো চ ধম্মানুগ্গহো চ। এতদগ্গং, ভিক্খৰে, ইমেসং দ্ৰিন্নং অনুগ্গহানং যদিদং – ধম্মানুগ্গহো।
‘‘Dveme, bhikkhave, anuggahā – āmisānuggaho ca dhammānuggaho ca. Etadaggaṃ, bhikkhave, imesaṃ dvinnaṃ anuggahānaṃ yadidaṃ – dhammānuggaho.
‘‘দ্ৰেমে, ভিক্খৰে, যাগা – আমিসযাগো চ ধম্মযাগো চ। এতদগ্গং, ভিক্খৰে, ইমেসং দ্ৰিন্নং যাগানং যদিদং – ধম্মযাগো’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Dveme, bhikkhave, yāgā – āmisayāgo ca dhammayāgo ca. Etadaggaṃ, bhikkhave, imesaṃ dvinnaṃ yāgānaṃ yadidaṃ – dhammayāgo’’ti. Etamatthaṃ bhagavā avoca. Tatthetaṃ iti vuccati –
‘‘যো ধম্মযাগং অযজী অমচ্ছরী, তথাগতো সব্বভূতানুকম্পী 3।
‘‘Yo dhammayāgaṃ ayajī amaccharī, tathāgato sabbabhūtānukampī 4;
তং তাদিসং দেৰমনুস্সসেট্ঠং, সত্তা নমস্সন্তি ভৰস্স পারগু’’ন্তি॥
Taṃ tādisaṃ devamanussaseṭṭhaṃ, sattā namassanti bhavassa pāragu’’nti.
অযম্পি অত্থো ৰুত্তো ভগৰতা, ইতি মে সুতন্তি। পঠমং।
Ayampi attho vutto bhagavatā, iti me sutanti. Paṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ১. ব্রাহ্মণধম্মযাগসুত্তৰণ্ণনা • 1. Brāhmaṇadhammayāgasuttavaṇṇanā
