| Library / Tipiṭaka / තිපිටක • Tipiṭaka / අපදානපාළි • Apadānapāḷi |
38. බොධිවන්දනවග්ගො
38. Bodhivandanavaggo
1. බොධිවන්දකත්ථෙරඅපදානං
1. Bodhivandakattheraapadānaṃ
1.
1.
‘‘පාටලිං හරිතං දිස්වා, පාදපං ධරණීරුහං;
‘‘Pāṭaliṃ haritaṃ disvā, pādapaṃ dharaṇīruhaṃ;
එකංසං අඤ්ජලිං කත්වා, අවන්දිං පාටලිං අහං.
Ekaṃsaṃ añjaliṃ katvā, avandiṃ pāṭaliṃ ahaṃ.
2.
2.
‘‘අඤ්ජලිං පග්ගහෙත්වාන, ගරුං කත්වාන මානසං;
‘‘Añjaliṃ paggahetvāna, garuṃ katvāna mānasaṃ;
අන්තොසුද්ධං බහිසුද්ධං, සුවිමුත්තමනාසවං.
Antosuddhaṃ bahisuddhaṃ, suvimuttamanāsavaṃ.
3.
3.
‘‘විපස්සිං ලොකමහිතං, කරුණාඤාණසාගරං;
‘‘Vipassiṃ lokamahitaṃ, karuṇāñāṇasāgaraṃ;
සම්මුඛා විය සම්බුද්ධං, අවන්දිං පාටලිං අහං.
Sammukhā viya sambuddhaṃ, avandiṃ pāṭaliṃ ahaṃ.
4.
4.
‘‘එකනවුතිතො කප්පෙ, යං බොධිමභිවන්දහං;
‘‘Ekanavutito kappe, yaṃ bodhimabhivandahaṃ;
දුග්ගතිං නාභිජානාමි, වන්දනාය ඉදං ඵලං.
Duggatiṃ nābhijānāmi, vandanāya idaṃ phalaṃ.
5.
5.
‘‘පටිසම්භිදා චතස්සො, විමොක්ඛාපි ච අට්ඨිමෙ;
‘‘Paṭisambhidā catasso, vimokkhāpi ca aṭṭhime;
ඡළභිඤ්ඤා සච්ඡිකතා, කතං බුද්ධස්ස සාසනං’’.
Chaḷabhiññā sacchikatā, kataṃ buddhassa sāsanaṃ’’.
ඉත්ථං සුදං ආයස්මා බොධිවන්දකො ථෙරො ඉමා ගාථායො අභාසිත්ථාති.
Itthaṃ sudaṃ āyasmā bodhivandako thero imā gāthāyo abhāsitthāti.
බොධිවන්දකත්ථෙරස්සාපදානං පඨමං.
Bodhivandakattherassāpadānaṃ paṭhamaṃ.
