| Library / Tipiṭaka / तिपिटक • Tipiṭaka / अपदानपाळि • Apadānapāḷi |
३८. बोधिवन्दनवग्गो
38. Bodhivandanavaggo
१. बोधिवन्दकत्थेरअपदानं
1. Bodhivandakattheraapadānaṃ
१.
1.
‘‘पाटलिं हरितं दिस्वा, पादपं धरणीरुहं।
‘‘Pāṭaliṃ haritaṃ disvā, pādapaṃ dharaṇīruhaṃ;
एकंसं अञ्जलिं कत्वा, अवन्दिं पाटलिं अहं॥
Ekaṃsaṃ añjaliṃ katvā, avandiṃ pāṭaliṃ ahaṃ.
२.
2.
‘‘अञ्जलिं पग्गहेत्वान, गरुं कत्वान मानसं।
‘‘Añjaliṃ paggahetvāna, garuṃ katvāna mānasaṃ;
अन्तोसुद्धं बहिसुद्धं, सुविमुत्तमनासवं॥
Antosuddhaṃ bahisuddhaṃ, suvimuttamanāsavaṃ.
३.
3.
‘‘विपस्सिं लोकमहितं, करुणाञाणसागरं।
‘‘Vipassiṃ lokamahitaṃ, karuṇāñāṇasāgaraṃ;
सम्मुखा विय सम्बुद्धं, अवन्दिं पाटलिं अहं॥
Sammukhā viya sambuddhaṃ, avandiṃ pāṭaliṃ ahaṃ.
४.
4.
‘‘एकनवुतितो कप्पे, यं बोधिमभिवन्दहं।
‘‘Ekanavutito kappe, yaṃ bodhimabhivandahaṃ;
दुग्गतिं नाभिजानामि, वन्दनाय इदं फलं॥
Duggatiṃ nābhijānāmi, vandanāya idaṃ phalaṃ.
५.
5.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं आयस्मा बोधिवन्दको थेरो इमा गाथायो अभासित्थाति।
Itthaṃ sudaṃ āyasmā bodhivandako thero imā gāthāyo abhāsitthāti.
बोधिवन्दकत्थेरस्सापदानं पठमं।
Bodhivandakattherassāpadānaṃ paṭhamaṃ.
