| Library / Tipiṭaka / ติปิฎก • Tipiṭaka / เถรคาถาปาฬิ • Theragāthāpāḷi |
๙. นวกนิปาโต
9. Navakanipāto
๑. ภูตเตฺถรคาถา
1. Bhūtattheragāthā
๕๑๘.
518.
‘‘ยทา ทุกฺขํ ชรามรณนฺติ ปณฺฑิโต, อวิทฺทสู ยตฺถ สิตา ปุถุชฺชนา;
‘‘Yadā dukkhaṃ jarāmaraṇanti paṇḍito, aviddasū yattha sitā puthujjanā;
ทุกฺขํ ปริญฺญาย สโตว ฌายติ, ตโต รติํ ปรมตรํ น วินฺทติฯ
Dukkhaṃ pariññāya satova jhāyati, tato ratiṃ paramataraṃ na vindati.
๕๑๙.
519.
‘‘ยทา ทุกฺขสฺสาวหนิํ วิสตฺติกํ, ปปญฺจสงฺฆาตทุขาธิวาหินิํ;
‘‘Yadā dukkhassāvahaniṃ visattikaṃ, papañcasaṅghātadukhādhivāhiniṃ;
ตณฺหํ ปหนฺตฺวาน สโตว ฌายติ, ตโต รติํ ปรมตรํ น วินฺทติฯ
Taṇhaṃ pahantvāna satova jhāyati, tato ratiṃ paramataraṃ na vindati.
๕๒๐.
520.
‘‘ยทา สิวํ เทฺวจตุรงฺคคามินํ, มคฺคุตฺตมํ สพฺพกิเลสโสธนํ;
‘‘Yadā sivaṃ dvecaturaṅgagāminaṃ, magguttamaṃ sabbakilesasodhanaṃ;
ปญฺญาย ปสฺสิตฺว สโตว ฌายติ, ตโต รติํ ปรมตรํ น วินฺทติฯ
Paññāya passitva satova jhāyati, tato ratiṃ paramataraṃ na vindati.
๕๒๑.
521.
‘‘ยทา อโสกํ วิรชํ อสงฺขตํ, สนฺตํ ปทํ สพฺพกิเลสโสธนํ;
‘‘Yadā asokaṃ virajaṃ asaṅkhataṃ, santaṃ padaṃ sabbakilesasodhanaṃ;
ภาเวติ สโญฺญชนพนฺธนจฺฉิทํ, ตโต รติํ ปรมตรํ น วินฺทติฯ
Bhāveti saññojanabandhanacchidaṃ, tato ratiṃ paramataraṃ na vindati.
๕๒๒.
522.
‘‘ยทา นเภ คชฺชติ เมฆทุนฺทุภิ, ธารากุลา วิหคปเถ สมนฺตโต;
‘‘Yadā nabhe gajjati meghadundubhi, dhārākulā vihagapathe samantato;
ภิกฺขู จ ปพฺภารคโตว ฌายติ, ตโต รติํ ปรมตรํ น วินฺทติฯ
Bhikkhū ca pabbhāragatova jhāyati, tato ratiṃ paramataraṃ na vindati.
๕๒๓.
523.
‘‘ยทา นทีนํ กุสุมากุลานํ, วิจิตฺต-วาเนยฺย-วฎํสกานํ;
‘‘Yadā nadīnaṃ kusumākulānaṃ, vicitta-vāneyya-vaṭaṃsakānaṃ;
ตีเร นิสิโนฺน สุมโนว ฌายติ, ตโต รติํ ปรมตรํ น วินฺทติฯ
Tīre nisinno sumanova jhāyati, tato ratiṃ paramataraṃ na vindati.
๕๒๔.
524.
‘‘ยทา นิสีเถ รหิตมฺหิ กานเน, เทเว คฬนฺตมฺหิ นทนฺติ ทาฐิโน;
‘‘Yadā nisīthe rahitamhi kānane, deve gaḷantamhi nadanti dāṭhino;
ภิกฺขู จ ปพฺภารคโตว ฌายติ, ตโต รติํ ปรมตรํ น วินฺทติฯ
Bhikkhū ca pabbhāragatova jhāyati, tato ratiṃ paramataraṃ na vindati.
๕๒๕.
525.
‘‘ยทา วิตเกฺก อุปรุนฺธิยตฺตโน, นคนฺตเร นควิวรํ สมสฺสิโต;
‘‘Yadā vitakke uparundhiyattano, nagantare nagavivaraṃ samassito;
วีตทฺทโร วีตขิโลว ฌายติ, ตโต รติํ ปรมตรํ น วินฺทติฯ
Vītaddaro vītakhilova jhāyati, tato ratiṃ paramataraṃ na vindati.
๕๒๖.
526.
‘‘ยทา สุขี มลขิลโสกนาสโน, นิรคฺคโฬ นิพฺพนโถ วิสโลฺล;
‘‘Yadā sukhī malakhilasokanāsano, niraggaḷo nibbanatho visallo;
สพฺพาสเว พฺยนฺติกโตว ฌายติ, ตโต รติํ ปรมตรํ น วินฺทตี’’ติฯ
Sabbāsave byantikatova jhāyati, tato ratiṃ paramataraṃ na vindatī’’ti.
… ภูโต เถโร…ฯ
… Bhūto thero….
นวกนิปาโต นิฎฺฐิโตฯ
Navakanipāto niṭṭhito.
ตตฺรุทฺทานํ –
Tatruddānaṃ –
ภูโต ตถทฺทโส เถโร, เอโก ขคฺควิสาณวา;
Bhūto tathaddaso thero, eko khaggavisāṇavā;
นวกมฺหิ นิปาตมฺหิ, คาถาโยปิ อิมา นวาติฯ
Navakamhi nipātamhi, gāthāyopi imā navāti.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / เถรคาถา-อฎฺฐกถา • Theragāthā-aṭṭhakathā / ๑. ภูตเตฺถรคาถาวณฺณนา • 1. Bhūtattheragāthāvaṇṇanā
