| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
2. бхууд̇аг̇аамаваг̇г̇о
2. Bhūtagāmavaggo
1. бхууд̇аг̇аамасигкаабад̣̇аван̣н̣анаа
1. Bhūtagāmasikkhāpadavaṇṇanā
89. д̣̇уд̇ияаваг̇г̇асса батамз ниг̇г̇ахзд̇ум̣ асаггонд̇од̇и саакадтагавимаанз саакааяа чиж̇ж̇амаанааяа чиж̇ж̇анд̇з д̇ад̇т̇а ачзд̣̇анад̇т̇ааяа д̣̇звад̇ааяа убанийд̇ам̣ буд̇д̇ам̣ д̣̇исвааби гутааринигкзбавзг̇ам̣ нивад̇д̇зд̇ум̣ асаггонд̇од̇и ад̇т̇о. ругкад̇хаммзд̇и ругкасса бавад̇д̇ияам̣. ругкаанам̣ вияа чзд̣̇анаад̣̇ийсу агуббанан̃хи ругкад̇хаммо наама.
89. Dutiyavaggassa paṭhame niggahetuṃ asakkontoti sākhaṭṭhakavimāne sākhāya chijjamānāya chijjante tattha achedanatthāya devatāya upanītaṃ puttaṃ disvāpi kuṭhārinikkhepavegaṃ nivattetuṃ asakkontoti attho. Rukkhadhammeti rukkhassa pavattiyaṃ. Rukkhānaṃ viya chedanādīsu akuppanañhi rukkhadhammo nāma.
уббад̇ид̇анд̇и уббаннам̣. бханд̇анд̇и д̇хааванд̇ам̣. ваараязд̇и ниг̇г̇ан̣хзяяа. ид̇арод̇и уббаннам̣ год̇хам̣ аниг̇г̇ан̣ханд̇о рааж̇аубарааж̇аад̣̇ийнам̣ расмимад̇д̇аг̇г̇аахагаж̇ано вияа на уд̇д̇амасаарат̇ийд̇и ад̇т̇о. висадам̣ саббависанд̇и сарийрз д̣̇аатааван̣аанусаарзна вид̇т̇ин̣н̣ам̣ б̣яаабзд̇ваа тид̇ам̣ ган̣хасаббависам̣ вияа. ж̇ахаад̇и орабааранд̇и бан̃жорамбхааг̇ияасан̃н̃ож̇анаани д̇ад̇ияамаг̇г̇зна ж̇ахаад̇и. ‘‘орабаара’’нд̇и хи оримад̇ийрам̣ вужжад̇и . ат̇а ваа сод̇и д̇ад̇ияамаг̇г̇зна год̇хам̣ винзд̇ваа тид̇о бхигку арахад̇д̇амаг̇г̇зна орабаарам̣ ж̇ахаад̇ийд̇и ад̇т̇о. д̇ад̇т̇а орам̣ наама сагад̇д̇абхааво, аж̇жхад̇д̇игаани ваа ааяад̇анаани. баарам̣ наама бараад̇д̇абхааво, б̣аахираани ваа ааяад̇анаани. д̇ад̣̇убхаяз бана чанд̣̇арааг̇ам̣ ж̇аханд̇о ‘‘ж̇ахаад̇и оримабаара’’нд̇и вужжад̇и.
Uppatitanti uppannaṃ. Bhantanti dhāvantaṃ. Vārayeti niggaṇheyya. Itaroti uppannaṃ kodhaṃ aniggaṇhanto rājauparājādīnaṃ rasmimattaggāhakajano viya na uttamasārathīti attho. Visaṭaṃ sappavisanti sarīre dāṭhāvaṇānusārena vitthiṇṇaṃ byāpetvā ṭhitaṃ kaṇhasappavisaṃ viya. Jahāti orapāranti pañcorambhāgiyasaññojanāni tatiyamaggena jahāti. ‘‘Orapāra’’nti hi orimatīraṃ vuccati . Atha vā soti tatiyamaggena kodhaṃ vinetvā ṭhito bhikkhu arahattamaggena orapāraṃ jahātīti attho. Tattha oraṃ nāma sakattabhāvo, ajjhattikāni vā āyatanāni. Pāraṃ nāma paraattabhāvo, bāhirāni vā āyatanāni. Tadubhaye pana chandarāgaṃ jahanto ‘‘jahāti orimapāra’’nti vuccati.
90. бхаванд̇ийд̇и вад̣дханд̇и. ахувунд̇ийд̇и б̣абхууву. д̇знааха ‘‘ж̇аад̇аа вад̣дхид̇аа’’д̇и. бхууд̇аанам̣ г̇аамод̇и махаабхууд̇аанам̣ харид̇ад̇ин̣аад̣̇ибхаавзна самаг̇г̇аанам̣ самуухо. д̇аб̣б̣инимуд̇д̇асса г̇аамасса абхаавам̣ д̣̇ассзд̇ум̣ ‘‘бхууд̇аа зва ваа г̇аамо’’д̇и вуд̇д̇ам̣. баад̇аб̣яа-сад̣̇д̣̇асса баа баанзд̇и д̇хаад̇вад̇т̇ам̣ санд̇хааяааха ‘‘барибхун̃ж̇ид̇аб̣б̣ад̇аа’’д̇и. саа жа баад̇аб̣яад̇аа чзд̣̇анаад̣̇и зва ход̇ийд̇и ааха ‘‘д̇ассаа…бз… бхууд̇аг̇аамасса ж̇аад̇аа чзд̣̇анаад̣̇ибажжаяаа’’д̇и.
90.Bhavantīti vaḍḍhanti. Ahuvuntīti babhūvu. Tenāha ‘‘jātā vaḍḍhitā’’ti. Bhūtānaṃ gāmoti mahābhūtānaṃ haritatiṇādibhāvena samaggānaṃ samūho. Tabbinimuttassa gāmassa abhāvaṃ dassetuṃ ‘‘bhūtā eva vā gāmo’’ti vuttaṃ. Pātabya-saddassa pā pāneti dhātvatthaṃ sandhāyāha ‘‘paribhuñjitabbatā’’ti. Sā ca pātabyatā chedanādi eva hotīti āha ‘‘tassā…pe… bhūtagāmassa jātā chedanādipaccayā’’ti.
91. ж̇аад̇а-сад̣̇д̣̇о зд̇т̇а виж̇аад̇абарияааяод̇и ‘‘буд̇д̇ам̣ виж̇аад̇аа ид̇т̇ий’’д̇иаад̣̇ийсу вияа басууд̇аважанод̇и ааха ‘‘басууд̇ааний’’д̇и, ниб̣б̣ад̇д̇абан̣н̣амуулаанийд̇и ад̇т̇о.
91.Jāta-saddo ettha vijātapariyāyoti ‘‘puttaṃ vijātā itthī’’tiādīsu viya pasūtavacanoti āha ‘‘pasūtānī’’ti, nibbattapaṇṇamūlānīti attho.
д̇аани д̣̇ассзнд̇од̇и д̇аани б̣ийж̇аани д̣̇ассзнд̇о. гаарияад̣̇ассанамукзнзва гааран̣ан̃жа г̇ахид̇анд̇и ааха ‘‘б̣ийж̇ад̇о ниб̣б̣ад̇д̇зна б̣ийж̇ам̣ д̣̇ассид̇а’’нд̇и.
Tānidassentoti tāni bījāni dassento. Kāriyadassanamukheneva kāraṇañca gahitanti āha ‘‘bījato nibbattena bījaṃ dassita’’nti.
92. ‘‘б̣ийж̇ад̇о самбхууд̇о бхууд̇аг̇аамо б̣ийж̇а’’нд̇и иминаа уд̇д̇арабад̣̇алобзна ‘‘бад̣̇умаг̇ажчад̇о ниб̣б̣ад̇д̇ам̣ бубпам̣ бад̣̇ума’’нд̇иаад̣̇ийсу вияааяам̣ вохаарод̇и д̣̇ассзд̇и. яам̣ б̣ийж̇ам̣ бхууд̇аг̇аамо наама ход̇ийд̇и ниб̣б̣ад̇д̇абан̣н̣амуулам̣ санд̇хааяа вад̣̇ад̇и. яат̇ааруд̇анд̇и яат̇аабаатам̣.
92.‘‘Bījato sambhūto bhūtagāmo bīja’’nti iminā uttarapadalopena ‘‘padumagacchato nibbattaṃ pupphaṃ paduma’’ntiādīsu viyāyaṃ vohāroti dasseti. Yaṃ bījaṃ bhūtagāmo nāma hotīti nibbattapaṇṇamūlaṃ sandhāya vadati. Yathārutanti yathāpāṭhaṃ.
‘‘сан̃жижжаа’’д̇и вуд̇д̇ад̇д̇аа сарийрз лаг̇г̇абхаавам̣ н̃ад̇вааби удтахад̇и, ‘‘д̇ам̣ уд̣̇д̇хариссаамий’’д̇исан̃н̃ааяа абхаавад̇о ваддад̇и. ананд̇ага-г̇г̇ахан̣зна саасабамад̇д̇игаа г̇ахид̇аа, нааман̃хзд̇ам̣ д̇ассаа сзваалаж̇аад̇ияаа. муулабан̣н̣аанам̣ абхаавзна ‘‘асамбун̣н̣абхууд̇аг̇аамо наамаа’’д̇и вуд̇д̇ам̣. со б̣ийж̇аг̇аамзна сан̇г̇ахид̇од̇и. авад̣дхамаанзби бхууд̇аг̇аамамуулагад̇д̇аа вуд̇д̇ам̣ ‘‘амуулагабхууд̇аг̇аамз сан̇г̇ахам̣ г̇ажчад̇ий’’д̇и. наал̣игзрасса аавзн̣игам̣ гад̇ваа вад̣̇ад̇и.
‘‘Sañciccā’’ti vuttattā sarīre laggabhāvaṃ ñatvāpi uṭṭhahati, ‘‘taṃ uddharissāmī’’tisaññāya abhāvato vaṭṭati. Anantaka-ggahaṇena sāsapamattikā gahitā, nāmañhetaṃ tassā sevālajātiyā. Mūlapaṇṇānaṃ abhāvena ‘‘asampuṇṇabhūtagāmo nāmā’’ti vuttaṃ. So bījagāmena saṅgahitoti. Avaḍḍhamānepi bhūtagāmamūlakattā vuttaṃ ‘‘amūlakabhūtagāme saṅgahaṃ gacchatī’’ti. Nāḷikerassa āveṇikaṃ katvā vadati.
сзлзяяагам̣ наама силааяа самбхууд̇аа згаа г̇анд̇хаж̇аад̇и. бубпид̇агаалад̇о бадтааяаад̇и вигасид̇агаалад̇о бабхуд̇и. чад̇д̇агам̣ г̇ан̣ханд̇од̇и вигасид̇ам̣ г̇ан̣ханд̇о. магул̣ам̣ бана ругкад̇д̇ажам̣ агобзнд̇знаби г̇ахзд̇ум̣ на ваддад̇и, пуллам̣ ваддад̇и. хад̇т̇агуггужжзнаад̇и хад̇т̇ажаабаллзна.
Seleyyakaṃ nāma silāya sambhūtā ekā gandhajāti. Pupphitakālato paṭṭhāyāti vikasitakālato pabhuti. Chattakaṃ gaṇhantoti vikasitaṃ gaṇhanto. Makuḷaṃ pana rukkhattacaṃ akopentenapi gahetuṃ na vaṭṭati, phullaṃ vaṭṭati. Hatthakukkuccenāti hatthacāpallena.
‘‘баанийяам̣ на ваасзд̇аб̣б̣а’’нд̇и ид̣̇ам̣ ад̇д̇ано биванабаанийяам̣ санд̇хааяа вуд̇д̇ам̣, ан̃н̃зсам̣ бана ваддад̇и ануг̇г̇ахид̇ад̇д̇аа. д̇знааха ‘‘ад̇д̇анаа каад̣̇ид̇угаамзнаа’’д̇и. язсам̣ ругкаанам̣ саакаа рухад̇ийд̇и муулам̣ анод̇аарзд̇ваа бан̣н̣амад̇д̇аниг̇г̇аманамад̇д̇знаби вад̣дхад̇и. д̇ад̇т̇а габбияамби агаронд̇о чиннанаал̣игзравзл̣уд̣̇ан̣д̣аад̣̇аяо гобзд̇ум̣ ваддад̇и.
‘‘Pānīyaṃ na vāsetabba’’nti idaṃ attano pivanapānīyaṃ sandhāya vuttaṃ, aññesaṃ pana vaṭṭati anuggahitattā. Tenāha ‘‘attanā khāditukāmenā’’ti. Yesaṃ rukkhānaṃ sākhā ruhatīti mūlaṃ anotāretvā paṇṇamattaniggamanamattenapi vaḍḍhati. Tattha kappiyampi akaronto chinnanāḷikeraveḷudaṇḍādayo kopetuṃ vaṭṭati.
‘‘жан̇гамид̇адтаанам̣ д̣̇ассзссаамий’’д̇и вуд̇д̇ад̇д̇аа гзвалам̣ жан̇гаманаад̇хиббааязна ваа маг̇г̇аг̇аманаад̇хиббааязна ваа аггаманд̇асса, д̇ин̣аанам̣ убари нисийд̣̇анаад̇хиббааязна нисийд̣̇анд̇асса жа д̣̇осо над̇т̇и.
‘‘Caṅkamitaṭṭhānaṃ dassessāmī’’ti vuttattā kevalaṃ caṅkamanādhippāyena vā maggagamanādhippāyena vā akkamantassa, tiṇānaṃ upari nisīdanādhippāyena nisīdantassa ca doso natthi.
саман̣агаббзхийд̇и саман̣аанам̣ габбияавохаарзхи, аб̣ийж̇аниб̣б̣аддаб̣ийж̇ааниби габбияабхаавад̇о ‘‘саман̣агаббааний’’д̇и вуд̇д̇аани. аб̣ийж̇ам̣ наама д̇арун̣аамб̣апалаад̣̇ийни. ниб̣б̣аддзд̇аб̣б̣ам̣ вияож̇зд̇аб̣б̣ам̣ б̣ийж̇ам̣ яасмим̣, д̇ам̣ банасаад̣̇и ниб̣б̣аддаб̣ийж̇ам̣ наама. габбияанд̇и вад̇вааваад̇и буб̣б̣агаалагирияаавасзна вуд̇д̇зби важанагкан̣зва аг̇г̇исад̇т̇аад̣̇инаа б̣ийж̇аг̇аамз ван̣ам̣ гаад̇аб̣б̣анд̇и важанад̇о бана буб̣б̣з гаад̇ум̣ на ваддад̇и, д̇ан̃жа д̣̇вид̇хаа агад̇ваа чзд̣̇анабхзд̣̇анамзва д̣̇ассзд̇аб̣б̣ам̣. гаронд̇зна жа бхигкунаа ‘‘габбияам̣ гарохий’’д̇и яааяа гааяажи бхаасааяа вуд̇д̇зязва гаад̇аб̣б̣ам̣. б̣ийж̇аг̇аамабариможанад̇т̇ам̣ буна габбияам̣ гаарзд̇аб̣б̣анд̇и гаараабанасса батамамзва ад̇хигад̇ад̇д̇аа. ‘‘гадаахзби гаад̇ум̣ ваддад̇ий’’д̇и вуд̇д̇ад̇д̇аа гадаахад̇о нийхад̇ааяа мин̃ж̇ааяа ваа б̣ийж̇з ваа яад̇т̇а гад̇т̇ажи виж̇жхид̇ум̣ ваддад̇и зва. бхууд̇аг̇аамо, бхууд̇аг̇аамасан̃н̃ид̇аа, вигобанам̣ ваа вигобаабанам̣ ваад̇и имаанзд̇т̇а д̇ийн̣и ан̇г̇аани.
Samaṇakappehīti samaṇānaṃ kappiyavohārehi, abījanibbaṭṭabījānipi kappiyabhāvato ‘‘samaṇakappānī’’ti vuttāni. Abījaṃ nāma taruṇaambaphalādīni. Nibbaṭṭetabbaṃ viyojetabbaṃ bījaṃ yasmiṃ, taṃ panasādi nibbaṭṭabījaṃ nāma. Kappiyanti vatvāvāti pubbakālakiriyāvasena vuttepi vacanakkhaṇeva aggisatthādinā bījagāme vaṇaṃ kātabbanti vacanato pana pubbe kātuṃ na vaṭṭati, tañca dvidhā akatvā chedanabhedanameva dassetabbaṃ. Karontena ca bhikkhunā ‘‘kappiyaṃ karohī’’ti yāya kāyaci bhāsāya vutteyeva kātabbaṃ. Bījagāmaparimocanatthaṃ puna kappiyaṃ kāretabbanti kārāpanassa paṭhamameva adhikatattā. ‘‘Kaṭāhepi kātuṃ vaṭṭatī’’ti vuttattā kaṭāhato nīhatāya miñjāya vā bīje vā yattha katthaci vijjhituṃ vaṭṭati eva. Bhūtagāmo, bhūtagāmasaññitā, vikopanaṃ vā vikopāpanaṃ vāti imānettha tīṇi aṅgāni.
бхууд̇аг̇аамасигкаабад̣̇аван̣н̣анаа нидтид̇аа.
Bhūtagāmasikkhāpadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 2. бхууд̇аг̇аамаваг̇г̇о • 2. Bhūtagāmavaggo
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 1. бхууд̇аг̇аамасигкаабад̣̇аван̣н̣анаа • 1. Bhūtagāmasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 1. бхууд̇аг̇аамасигкаабад̣̇аван̣н̣анаа • 1. Bhūtagāmasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 1. бхууд̇аг̇аамасигкаабад̣̇аван̣н̣анаа • 1. Bhūtagāmasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 1. бхууд̇аг̇аамасигкаабад̣̇а-ад̇т̇аяож̇анаа • 1. Bhūtagāmasikkhāpada-atthayojanā
