| Library / Tipiṭaka / ติปิฎก • Tipiṭaka / เปตวตฺถุปาฬิ • Petavatthupāḷi |
๔. ภุสเปตวตฺถุ
4. Bhusapetavatthu
๔๔๗.
447.
‘‘ภุสานิ เอโก สาลิํ ปุนาปโร, อยญฺจ นารี สกมํสโลหิตํ;
‘‘Bhusāni eko sāliṃ punāparo, ayañca nārī sakamaṃsalohitaṃ;
ตุวญฺจ คูถํ อสุจิํ อกนฺตํ 1, ปริภุญฺชสิ กิสฺส อยํ วิปาโก’’ติฯ
Tuvañca gūthaṃ asuciṃ akantaṃ 2, paribhuñjasi kissa ayaṃ vipāko’’ti.
๔๔๘.
448.
‘‘อยํ ปุเร มาตรํ หิํสติ, อยํ ปน กูฎวาณิโช;
‘‘Ayaṃ pure mātaraṃ hiṃsati, ayaṃ pana kūṭavāṇijo;
อยํ มํสานิ ขาทิตฺวา, มุสาวาเทน วเญฺจติฯ
Ayaṃ maṃsāni khāditvā, musāvādena vañceti.
๔๔๙.
449.
‘‘อหํ มนุเสฺสสุ มนุสฺสภูตา, อคารินี สพฺพกุลสฺส อิสฺสรา;
‘‘Ahaṃ manussesu manussabhūtā, agārinī sabbakulassa issarā;
สเนฺตสุ ปริคุหามิ, มา จ กิญฺจิ อิโต อทํฯ
Santesu pariguhāmi, mā ca kiñci ito adaṃ.
๔๕๐.
450.
‘‘มุสาวาเทน ฉาเทมิ, ‘นตฺถิ เอตํ มม เคเห;
‘‘Musāvādena chādemi, ‘natthi etaṃ mama gehe;
สเจ สนฺตํ นิคุหามิ, คูโถ เม โหตุ โภชนํ’ฯ
Sace santaṃ niguhāmi, gūtho me hotu bhojanaṃ’.
๔๕๑.
451.
‘‘ตสฺส กมฺมสฺส วิปาเกน, มุสาวาทสฺส จูภยํ;
‘‘Tassa kammassa vipākena, musāvādassa cūbhayaṃ;
สุคนฺธํ สาลิโน ภตฺตํ, คูถํ เม ปริวตฺตติฯ
Sugandhaṃ sālino bhattaṃ, gūthaṃ me parivattati.
๔๕๒.
452.
‘‘อวญฺฌานิ จ กมฺมานิ, น หิ กมฺมํ วินสฺสติ;
‘‘Avañjhāni ca kammāni, na hi kammaṃ vinassati;
ทุคฺคนฺธํ กิมินํ 3 มีฬํ, ภุญฺชามิ จ ปิวามิ จา’’ติฯ
Duggandhaṃ kiminaṃ 4 mīḷaṃ, bhuñjāmi ca pivāmi cā’’ti.
ภุสเปตวตฺถุ จตุตฺถํฯ
Bhusapetavatthu catutthaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / เปตวตฺถุ-อฎฺฐกถา • Petavatthu-aṭṭhakathā / ๔. ภุสเปตวตฺถุวณฺณนา • 4. Bhusapetavatthuvaṇṇanā
