| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৭. ভোগসুত্তং
7. Bhogasuttaṃ
২২৭. ‘‘পঞ্চিমে, ভিক্খৰে, আদীনৰা ভোগেসু। কতমে পঞ্চ? অগ্গিসাধারণা ভোগা, উদকসাধারণা ভোগা, রাজসাধারণা ভোগা, চোরসাধারণা ভোগা, অপ্পিযেহি দাযাদেহি সাধারণা ভোগা। ইমে খো, ভিক্খৰে, পঞ্চ আদীনৰা ভোগেসু।
227. ‘‘Pañcime, bhikkhave, ādīnavā bhogesu. Katame pañca? Aggisādhāraṇā bhogā, udakasādhāraṇā bhogā, rājasādhāraṇā bhogā, corasādhāraṇā bhogā, appiyehi dāyādehi sādhāraṇā bhogā. Ime kho, bhikkhave, pañca ādīnavā bhogesu.
‘‘পঞ্চিমে, ভিক্খৰে, আনিসংসা ভোগেসু। কতমে পঞ্চ? ভোগে নিস্সায অত্তানং সুখেতি পীণেতি সম্মা সুখং পরিহরতি, মাতাপিতরো সুখেতি পীণেতি সম্মা সুখং পরিহরতি, পুত্তদারদাসকম্মকরপোরিসে সুখেতি পীণেতি সম্মা সুখং পরিহরতি, মিত্তামচ্চে সুখেতি পীণেতি সম্মা সুখং পরিহরতি, সমণব্রাহ্মণেসু উদ্ধগ্গিকং দক্খিণং পতিট্ঠাপেতি সোৰগ্গিকং সুখৰিপাকং সগ্গসংৰত্তনিকং। ইমে খো, ভিক্খৰে, পঞ্চ আনিসংসা ভোগেসূ’’তি। সত্তমং।
‘‘Pañcime, bhikkhave, ānisaṃsā bhogesu. Katame pañca? Bhoge nissāya attānaṃ sukheti pīṇeti sammā sukhaṃ pariharati, mātāpitaro sukheti pīṇeti sammā sukhaṃ pariharati, puttadāradāsakammakaraporise sukheti pīṇeti sammā sukhaṃ pariharati, mittāmacce sukheti pīṇeti sammā sukhaṃ pariharati, samaṇabrāhmaṇesu uddhaggikaṃ dakkhiṇaṃ patiṭṭhāpeti sovaggikaṃ sukhavipākaṃ saggasaṃvattanikaṃ. Ime kho, bhikkhave, pañca ānisaṃsā bhogesū’’ti. Sattamaṃ.
Related texts:
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-১০. পঠমদীঘচারিকসুত্তাদিৰণ্ণনা • 1-10. Paṭhamadīghacārikasuttādivaṇṇanā
