| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
५. भिक्खुसुत्तवण्णना
5. Bhikkhusuttavaṇṇanā
१८६. बोधायाति एत्थ बोधो नाम बुज्झनं, तं पन किस्स केनाति पुच्छन्तो ‘‘किं बुज्झनत्थाया’’ति वत्वा तं दस्सेन्तो ‘‘मग्गेना’’तिआदिमाह। मग्गेन निब्बानं बुज्झनत्थाय संवत्तन्ति, पच्चवेक्खणाय कतकिच्चतं बुज्झनत्थाय संवत्तन्ति, पठमविकप्पे सच्छिकिरियाभिसमयो एव दस्सितोति तेन अतुट्ठे ‘‘मग्गेन वा’’ति दुतियविकप्पमाह। विवेकनिस्सितं विरागनिस्सितन्ति पदेहि सब्बं मग्गकिच्चं तस्स फलञ्च दस्सितं। निरोधनिस्सितन्ति इमिना निब्बानसच्छिकिरिया। कामासवापि चित्तं विमुच्चतीतिआदिना किलेसप्पहानं। विमुत्तस्मिं विमुत्तमिति ञाणं होतीतिआदिना पच्चवेक्खणा दस्सिता।
186.Bodhāyāti ettha bodho nāma bujjhanaṃ, taṃ pana kissa kenāti pucchanto ‘‘kiṃ bujjhanatthāyā’’ti vatvā taṃ dassento ‘‘maggenā’’tiādimāha. Maggena nibbānaṃ bujjhanatthāya saṃvattanti, paccavekkhaṇāya katakiccataṃ bujjhanatthāya saṃvattanti, paṭhamavikappe sacchikiriyābhisamayo eva dassitoti tena atuṭṭhe ‘‘maggena vā’’ti dutiyavikappamāha. Vivekanissitaṃ virāganissitanti padehi sabbaṃ maggakiccaṃ tassa phalañca dassitaṃ. Nirodhanissitanti iminā nibbānasacchikiriyā. Kāmāsavāpi cittaṃ vimuccatītiādinā kilesappahānaṃ. Vimuttasmiṃ vimuttamiti ñāṇaṃ hotītiādinā paccavekkhaṇā dassitā.
भिक्खुसुत्तवण्णना निट्ठिता।
Bhikkhusuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / ५. भिक्खुसुत्तं • 5. Bhikkhusuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ५. भिक्खुसुत्तवण्णना • 5. Bhikkhusuttavaṇṇanā
