| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၁၀. ဘိက္ခုနုပသ္သယသုတ္တဝဏ္ဏနာ
10. Bhikkhunupassayasuttavaṇṇanā
၃၇၆. ကမ္မဋ္ဌာနကမ္မိကာတိ ကမ္မဋ္ဌာနမနုယုတ္တာ။ ဝိသေသေတီတိ ဝိသေသော, အတိသယော, သ္ဝာယံ ပုဗ္ဗာပရဝိသေသော ဥပာဒာယုပာဒာယ ဂဟေတဗ္ဗောတိ တံ ဒသ္သေတုံ ‘‘တတ္ထာ’’တိအာဒိမာဟ။
376.Kammaṭṭhānakammikāti kammaṭṭhānamanuyuttā. Visesetīti viseso, atisayo, svāyaṃ pubbāparaviseso upādāyupādāya gahetabboti taṃ dassetuṃ ‘‘tatthā’’tiādimāha.
ဥပ္ပဇ္ဇတိ ကိလေသပရိဠာဟောတိ ကာယေ အသုဘာဒိဝသေန မနသိကာရံ အဒဟန္တသ္သ မနသိကာရသ္သ ဝီထိယံ အပဋိပန္နတာ သုဘာဒိဝသေန ကာယာရမ္မဏော ကိလေသပရိဠာဟော စ ဥပ္ပဇ္ဇတိ။ ဝီရိယာရမ္ဘသ္သ အဘာဝေန တသ္မိံ အာရမ္မဏေ စေတသော ဝာ လီနတ္တံ ဟောတိ, ဂောစရဇ္ဈတ္တတော ဗဟိဒ္ဓာ ပုထုတ္တာရမ္မဏေ စိတ္တံ ဝိက္ခိပတိ။ ဧဝံ ကိလေသပရိဠာဟေ စာတိအာဒိနာ တိဝိဓမ္ပိ ဘာဝနာနုယောဂသ္သ ကိလေသဝတ္ထုဘာဝံ ဥပာဒာယ သမုစ္စယဝသေန အဋ္ဌကထာယံ ဝုတ္တံ။ ယသ္မာ ပန တေ ပရိဠာဟလီနတ္တဝိက္ခေပာ ဧကဇ္ဈံ န ပဝတ္တန္တိ, တသ္မာ ပာဠိယံ ‘‘ကာယာရမ္မဏော ဝာ’’တိအာဒိနာ အနိယမတ္ထော ဝာ-သဒ္ဒော ဂဟိတော။ ကိလေသာနုရဉ္ဇိတေနာတိ ကိလေသဝိဝဏ္ဏိတစိတ္တေန ဟုတ္ဝာ န ဝတ္တိတဗ္ဗံ။ ကထံ ပန ဝတ္တိတဗ္ဗန္တိ အာဟ ‘‘ကိသ္မိဉ္စိဒေဝာ’’တိ။ န စ ဝိတက္ကေတိ န စ ဝိစာရေတီတိ ကိလေသသဟဂတေ ဝိတက္ကဝိစာရေ န ပဝတ္တေတိ။ သုခိတောတိ ဈာနသုခေန သုခိတော။
Uppajjatikilesapariḷāhoti kāye asubhādivasena manasikāraṃ adahantassa manasikārassa vīthiyaṃ apaṭipannatā subhādivasena kāyārammaṇo kilesapariḷāho ca uppajjati. Vīriyārambhassa abhāvena tasmiṃ ārammaṇe cetaso vā līnattaṃ hoti, gocarajjhattato bahiddhā puthuttārammaṇe cittaṃ vikkhipati. Evaṃ kilesapariḷāhe cātiādinā tividhampi bhāvanānuyogassa kilesavatthubhāvaṃ upādāya samuccayavasena aṭṭhakathāyaṃ vuttaṃ. Yasmā pana te pariḷāhalīnattavikkhepā ekajjhaṃ na pavattanti, tasmā pāḷiyaṃ ‘‘kāyārammaṇo vā’’tiādinā aniyamattho vā-saddo gahito. Kilesānurañjitenāti kilesavivaṇṇitacittena hutvā na vattitabbaṃ. Kathaṃ pana vattitabbanti āha ‘‘kismiñcidevā’’ti. Na ca vitakketi na ca vicāretīti kilesasahagate vitakkavicāre na pavatteti. Sukhitoti jhānasukhena sukhito.
ဣမသ္သ ဘိက္ခုနော ဘာဝနာ ပဝတ္တာတိ သမ္ဗန္ဓော။ ယသ္မာ ဟိ ဣမသ္သ ဘိက္ခုနော တံ မူလကမ္မဋ္ဌာနံ ပရိပန္ထေ သတိ ဌပေတ္ဝာ ဗုဒ္ဓဂုဏာဒိအနုသ္သရဏေန စိတ္တံ ပသာဒေတ္ဝာ မူလကမ္မဋ္ဌာနဘာဝနာ ပဝတ္တာ, တသ္မာ ပဏိဓာယ ဘာဝနာတိ ဝုတ္တန္တိ သမ္ဗန္ဓော။ အဋ္ဌပေတ္ဝာတိ စိတ္တံ အပ္ပဝတ္တေတ္ဝာတိ အတ္ထော ဝေဒိတဗ္ဗော။ ကမ္မဋ္ဌာနာဒီနံ တိဏ္ဏမ္ပိ ဝသေန အတ္ထယောဇနာ သမ္ဘဝတိ။ တေနာဟ ‘‘တတ္ထာ’’တိအာဒိ။ သာရေန္တော ဝိယာတိ ရထံ ဝာဟယန္တော ဝိယ။ သမပ္ပမာဏတော အဋ္ဌကာဒိဝသေန သုတစ္ဆိတံ ပက္ခိပန္တော ဝိယ။ သုခေနေဝ ကိလေသာနံ ဩကာသံ အဒေန္တော အန္တရာ အသဇ္ဇန္တော အလဂ္ဂန္တော။ ဝိပသ္သနာစာရသ္သ အာရဒ္ဓဝုတ္တိတံ အပရိပန္ထတဉ္စ ဒသ္သေန္တော ဩပမ္မဒ္ဝယမာဟ။ ဗ္ယာဘင္ဂိယာတိ ကာဇဒဏ္ဍေန။ ကိလေသပရိဠာဟာဒီနန္တိ ကိလေသပရိဠာဟလီနတ္တဝိက္ခေပာနံ။
Imassa bhikkhuno bhāvanā pavattāti sambandho. Yasmā hi imassa bhikkhuno taṃ mūlakammaṭṭhānaṃ paripanthe sati ṭhapetvā buddhaguṇādianussaraṇena cittaṃ pasādetvā mūlakammaṭṭhānabhāvanā pavattā, tasmā paṇidhāya bhāvanāti vuttanti sambandho. Aṭṭhapetvāti cittaṃ appavattetvāti attho veditabbo. Kammaṭṭhānādīnaṃ tiṇṇampi vasena atthayojanā sambhavati. Tenāha ‘‘tatthā’’tiādi. Sārento viyāti rathaṃ vāhayanto viya. Samappamāṇato aṭṭhakādivasena sutacchitaṃ pakkhipanto viya. Sukheneva kilesānaṃ okāsaṃ adento antarā asajjanto alagganto. Vipassanācārassa āraddhavuttitaṃ aparipanthatañca dassento opammadvayamāha. Byābhaṅgiyāti kājadaṇḍena. Kilesapariḷāhādīnanti kilesapariḷāhalīnattavikkhepānaṃ.
ဂုဠခဏ္ဍာဒီနီတိ ဂုဠခဏ္ဍသက္ခရခဏ္ဍာဒီနိ ဥစ္ဆုဝိကာရဘူတာနိ။ ‘‘ကာယေ ကာယာနုပသ္သီ ဝိဟရာမီ’’တိအာဒိဝစနတော ‘‘ပုဗ္ဗဘာဂဝိပသ္သနာ ကထိတာ’’တိ ဝုတ္တံ။
Guḷakhaṇḍādīnīti guḷakhaṇḍasakkharakhaṇḍādīni ucchuvikārabhūtāni. ‘‘Kāye kāyānupassī viharāmī’’tiādivacanato ‘‘pubbabhāgavipassanā kathitā’’ti vuttaṃ.
အမ္ဗပာလိဝဂ္ဂဝဏ္ဏနာ နိဋ္ဌိတာ။
Ambapālivaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၀. ဘိက္ခုနုပသ္သယသုတ္တံ • 10. Bhikkhunupassayasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၀. ဘိက္ခုနုပသ္သယသုတ္တဝဏ္ဏနာ • 10. Bhikkhunupassayasuttavaṇṇanā
