| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၅၃. ဘိက္ခုနီဒူသကဝတ္ထု
53. Bhikkhunīdūsakavatthu
၁၁၅. တေန ခော ပန သမယေန သမ္ဗဟုလာ ဘိက္ခုနိယော သာကေတာ သာဝတ္ထိံ အဒ္ဓာနမဂ္ဂပ္ပဋိပန္နာ ဟောန္တိ။ အန္တရာမဂ္ဂေ စောရာ နိက္ခမိတ္ဝာ ဧကစ္စာ ဘိက္ခုနိယော အစ္ဆိန္ဒိံသု, ဧကစ္စာ ဘိက္ခုနိယော ဒူသေသုံ။ သာဝတ္ထိယာ ရာဇဘဋာ နိက္ခမိတ္ဝာ ဧကစ္စေ စောရေ အဂ္ဂဟေသုံ, ဧကစ္စေ စောရာ ပလာယိံသု။ ယေ တေ ပလာယိံသု, တေ ဘိက္ခူသု ပဗ္ဗဇိံသု။ ယေ တေ ဂဟိတာ, တေ ဝဓာယ ဩနိယ္ယန္တိ။ အဒ္ဒသံသု ခော တေ ပလာယိတ္ဝာ ပဗ္ဗဇိတာ တေ စောရေ ဝဓာယ ဩနိယ္ယမာနေ, ဒိသ္ဝာန ဧဝမာဟံသု ‘‘သာဓု ခော မယံ ပလာယိမ္ဟာ, သစာ စ မယံ ဂယ္ဟေယ္ယာမ, မယမ္ပိ ဧဝမေဝ ဟညေယ္ယာမာ’’တိ။ ဘိက္ခူ ဧဝမာဟံသု ‘‘ကိံ ပန တုမ္ဟေ, အာဝုသော, အကတ္ထာ’’တိ။ အထ ခော တေ ပဗ္ဗဇိတာ ဘိက္ခူနံ ဧတမတ္ထံ အာရောစေသုံ။ ဘိက္ခူ ဘဂဝတော ဧတမတ္ထံ အာရောစေသုံ။ ဘိက္ခုနိဒူသကော, ဘိက္ခဝေ , အနုပသမ္ပန္နော န ဥပသမ္ပာဒေတဗ္ဗော, ဥပသမ္ပန္နော နာသေတဗ္ဗောတိ။ သင္ဃဘေဒကော, ဘိက္ခဝေ, အနုပသမ္ပန္နော န ဥပသမ္ပာဒေတဗ္ဗော, ဥပသမ္ပန္နော နာသေတဗ္ဗောတိ။ လောဟိတုပ္ပာဒကော, ဘိက္ခဝေ, အနုပသမ္ပန္နော န ဥပသမ္ပာဒေတဗ္ဗော, ဥပသမ္ပန္နော နာသေတဗ္ဗောတိ။
115. Tena kho pana samayena sambahulā bhikkhuniyo sāketā sāvatthiṃ addhānamaggappaṭipannā honti. Antarāmagge corā nikkhamitvā ekaccā bhikkhuniyo acchindiṃsu, ekaccā bhikkhuniyo dūsesuṃ. Sāvatthiyā rājabhaṭā nikkhamitvā ekacce core aggahesuṃ, ekacce corā palāyiṃsu. Ye te palāyiṃsu, te bhikkhūsu pabbajiṃsu. Ye te gahitā, te vadhāya oniyyanti. Addasaṃsu kho te palāyitvā pabbajitā te core vadhāya oniyyamāne, disvāna evamāhaṃsu ‘‘sādhu kho mayaṃ palāyimhā, sacā ca mayaṃ gayheyyāma, mayampi evameva haññeyyāmā’’ti. Bhikkhū evamāhaṃsu ‘‘kiṃ pana tumhe, āvuso, akatthā’’ti. Atha kho te pabbajitā bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ. Bhikkhunidūsako, bhikkhave , anupasampanno na upasampādetabbo, upasampanno nāsetabboti. Saṅghabhedako, bhikkhave, anupasampanno na upasampādetabbo, upasampanno nāsetabboti. Lohituppādako, bhikkhave, anupasampanno na upasampādetabbo, upasampanno nāsetabboti.
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / မာတုဃာတကာဒိဝတ္ထုကထာ • Mātughātakādivatthukathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / မာတုဃာတကာဒိဝတ္ထုကထာဝဏ္ဏနာ • Mātughātakādivatthukathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / မာတုဃာတကာဒိဝတ္ထုကထာဝဏ္ဏနာ • Mātughātakādivatthukathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / မာတုဃာတကာဒိကထာဝဏ္ဏနာ • Mātughātakādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၅၀. မာတုဃာတကာဒိဝတ္ထုကထာ • 50. Mātughātakādivatthukathā
