11. Bhikkhadāyivaggo

1. Bhikkhadāyakattheraapadānaṃ

1.

‘‘Suvaṇṇavaṇṇaṃ sambuddhaṃ, āhutīnaṃ paṭiggahaṃ;

Pavarā ³ abhinikkhantaṃ, vanā nibbanamāgataṃ ⁴.

2.

‘‘Kaṭacchubhikkhaṃ pādāsiṃ, siddhatthassa mahesino;

Paññāya upasantassa, mahāvīrassa tādino.

3.

‘‘Padenānupadāyantaṃ ⁶, nibbāpente mahājanaṃ;

Uḷārā vitti me jātā, buddhe ādiccabandhune ⁸.

4.

‘‘Catunnavutito kappe, yaṃ dānamadadiṃ tadā;

Duggatiṃ nābhijānāmi, bhikkhādānassidaṃ phalaṃ.

5.

‘‘Sattāsītimhito kappe, mahāreṇu sanāmakā;

Sattaratanasampannā, sattete cakkavattino.

6.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā bhikkhadāyako thero imā gāthāyo abhāsitthāti.

Bhikkhadāyakattherassāpadānaṃ paṭhamaṃ.