| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
36. பே⁴ஸஜ்ஜனித்³தே³ஸவண்ணனா
36. Bhesajjaniddesavaṇṇanā
274-5. ஜனஸ்ஸ பே⁴ஸஜ்ஜங் காதுங் தா³துங் வத்துஞ்ச ந லப்³ப⁴தீதி ஸம்ப³ந்தி⁴யங். லப்³ப⁴தீதி எத்த² ‘‘பி⁴க்கு²னா’’தி கத்தா ‘‘பே⁴ஸஜ்ஜ’’ந்தி வுத்தகம்மங். நனு ச காதுந்தி பா⁴வஸாத⁴னத்தா தஸ்ஸ அவுத்தகம்மேனாபி ப⁴விதப்³ப³ங் பா⁴வே விஹிதகிதகப்பச்சயானங் பயோகே³ கம்மகாரகஸ்ஸாபி இச்சி²தப்³ப³த்தாதி? ஸச்சங், ததா²பி பதா⁴னபூ⁴தகம்மஸத்தியா அபி⁴தா⁴னே ஸதி அப்பதா⁴னகிதககிரியாபி⁴ஸம்ப³ந்தே⁴ன கு³ணீபூ⁴தா கம்மஸத்தி அபி⁴ஹிதா விய விஞ்ஞாயதி. ததா² ச வுத்தங் அம்ஹேஹி யோக³வினிச்ச²யே ‘‘பதா⁴னானுயாயிதாய ஜனவோஹாராய பதா⁴னஸத்யாபி⁴தா⁴னே கு³ணஸத்தி அபி⁴ஹிதா விய பகாஸதீ’’தி. ஜனஸ்ஸாதி ஆக³தாக³தஜனஸ்ஸ. ஸஹத⁴ம்மீனஞ்ச பிதூனஞ்ச தது³பட்டா²கபி⁴க்கு²னிஸ்ஸிதப⁴ண்டூ³னஞ்ச வெய்யாவச்சகரஸ்ஸ ச பி⁴க்கா²சரியவிஞ்ஞத்திஸகேஹி பே⁴ஸஜ்ஜகரணங் லப்³ப⁴ந்தி ஸம்ப³ந்தோ⁴ . தத்த² ஸஹத⁴ம்மினந்தி ஸஹ சரிதப்³போ³ த⁴ம்மோ ஸீலஸத்³தா⁴பஞ்ஞாஸங்கா²தோ ஸஹத⁴ம்மோ, ஸோ ஏதேஸமத்தீ²தி ஸஹத⁴ம்மினோ, பி⁴க்கு² பி⁴க்கு²னீ ஸிக்க²மானா ஸாமணேரோ ஸாமணேரீதி பஞ்ச, தேஸங். பிதா ச மாதா ச பிதரோ ஏகஸேஸனயேன, உபி⁴ன்னங் ஸாமஞ்ஞனித்³தே³ஸோ வா, தேஸங். பி⁴க்கு²னிஸ்ஸிதோ நாம யோ விஹாரே ஸப்³ப³கம்மானி கரொந்தோ பி⁴க்கு²ங் நிஸ்ஸாய வஸதி. ப⁴ண்டு³ நாம யோ பப்³ப³ஜ்ஜாபெக்கோ² யாவ பத்தசீவரங் படியாதி³யதி, தாவ விஹாரே வஸதி, ஸோ பண்டு³பலாஸோ. வெய்யாவச்சகரஸ்ஸாதி அத்தனோ உபட்டா²கஸ்ஸ. ஏதேஸு பன மாதாபிதரோ ஸசே ரஜ்ஜேபி டி²தா பச்சாஸீஸந்தி, அகாதுங் ந வட்டதி. மாதரங் அனாமஸந்தேன ஸப்³ப³ங் பரிகம்மங் காதப்³ப³ங். பிதா பன ஸஹத்தே²ன நஹாபனஸம்பா³ஹனாதீ³னி கத்வா உபட்டா²தப்³போ³.
274-5. Janassa bhesajjaṃ kātuṃ dātuṃ vattuñca na labbhatīti sambandhiyaṃ. Labbhatīti ettha ‘‘bhikkhunā’’ti kattā ‘‘bhesajja’’nti vuttakammaṃ. Nanu ca kātunti bhāvasādhanattā tassa avuttakammenāpi bhavitabbaṃ bhāve vihitakitakappaccayānaṃ payoge kammakārakassāpi icchitabbattāti? Saccaṃ, tathāpi padhānabhūtakammasattiyā abhidhāne sati appadhānakitakakiriyābhisambandhena guṇībhūtā kammasatti abhihitā viya viññāyati. Tathā ca vuttaṃ amhehi yogavinicchaye ‘‘padhānānuyāyitāya janavohārāya padhānasatyābhidhāne guṇasatti abhihitā viya pakāsatī’’ti. Janassāti āgatāgatajanassa. Sahadhammīnañca pitūnañca tadupaṭṭhākabhikkhunissitabhaṇḍūnañca veyyāvaccakarassa ca bhikkhācariyaviññattisakehi bhesajjakaraṇaṃ labbhanti sambandho . Tattha sahadhamminanti saha caritabbo dhammo sīlasaddhāpaññāsaṅkhāto sahadhammo, so etesamatthīti sahadhammino, bhikkhu bhikkhunī sikkhamānā sāmaṇero sāmaṇerīti pañca, tesaṃ. Pitā ca mātā ca pitaro ekasesanayena, ubhinnaṃ sāmaññaniddeso vā, tesaṃ. Bhikkhunissito nāma yo vihāre sabbakammāni karonto bhikkhuṃ nissāya vasati. Bhaṇḍu nāma yo pabbajjāpekkho yāva pattacīvaraṃ paṭiyādiyati, tāva vihāre vasati, so paṇḍupalāso. Veyyāvaccakarassāti attano upaṭṭhākassa. Etesu pana mātāpitaro sace rajjepi ṭhitā paccāsīsanti, akātuṃ na vaṭṭati. Mātaraṃ anāmasantena sabbaṃ parikammaṃ kātabbaṃ. Pitā pana sahatthena nahāpanasambāhanādīni katvā upaṭṭhātabbo.
276. பிதா ச மாதா ச பா⁴தா ச ப⁴கி³னீ சாதி த்³வந்தோ³ பிதா…பே॰… ப⁴கி³னியோ. மஹந்தோ ச சூளோ ச, மஹாசூளா ச தே பிதா…பே॰… ப⁴கி³னியோ சாதி கம்மதா⁴ரயோ. தா ஆதி³ யேஸந்தேதி அஞ்ஞபத³த்தோ². மஹாசூள-ஸத்³தா³ பிதாதி³-ஸத்³தே³ஹி பச்சேகங் யோஜேதப்³பா³ ‘‘மஹாபிதுனோ சூளபிதுனோ’’திஆதி³னா. ஆதி³-ஸத்³தே³ன பனெத்த² பிதுச்சா² மாதுலோ, தேஸங் த³ஸன்னம்பி யாவ ஸத்தமா குலபரிவட்டா புத்தபரம்பரஞ்ச ஸங்க³ண்ஹாதி. தேஸங் ஸகே பே⁴ஸஜ்ஜகரணங் லப்³ப⁴ந்தி யோஜனா. தேஸங் மஹாபிதாதீ³னங் ஸந்தகே ஸதி தேன பே⁴ஸஜ்ஜகரணங் லப்³ப⁴தீதி அத்தோ². நாதி நத்தி² சே. அத்தனியேதி பி⁴க்கு²னோ அத்தனோ ஸந்தகே ஸதீதி அத்தோ². தா³தப்³ப³ங் தாவகாலிகந்தி தாவகாலிகங் கத்வா தா³தப்³ப³ந்தி அத்தோ². தே பன ஸசே படிதெ³ந்தி, க³ஹேதப்³ப³ங், நோ சே தெ³ந்தி, ந சோதே³தப்³பா³. யாவ தஸ்ஸ தா³னங், தாவ காலோ அஸ்ஸாதி தாவகாலிகங். ணிகோ ஸமாஸந்தே.
276. Pitā ca mātā ca bhātā ca bhaginī cāti dvando pitā…pe… bhaginiyo. Mahanto ca cūḷo ca, mahācūḷā ca te pitā…pe… bhaginiyo cāti kammadhārayo. Tā ādi yesanteti aññapadattho. Mahācūḷa-saddā pitādi-saddehi paccekaṃ yojetabbā ‘‘mahāpituno cūḷapituno’’tiādinā. Ādi-saddena panettha pitucchā mātulo, tesaṃ dasannampi yāva sattamā kulaparivaṭṭā puttaparamparañca saṅgaṇhāti. Tesaṃ sake bhesajjakaraṇaṃ labbhanti yojanā. Tesaṃ mahāpitādīnaṃ santake sati tena bhesajjakaraṇaṃ labbhatīti attho. Nāti natthi ce. Attaniyeti bhikkhuno attano santake satīti attho. Dātabbaṃ tāvakālikanti tāvakālikaṃ katvā dātabbanti attho. Te pana sace paṭidenti, gahetabbaṃ, no ce denti, na codetabbā. Yāva tassa dānaṃ, tāva kālo assāti tāvakālikaṃ. Ṇiko samāsante.
277. பே⁴ஸஜ்ஜகரணாதீ³தி ஆதி³-ஸத்³தே³ன அனாமட்ட²பிண்ட³தா³னாதீ³னங் க³ஹணங், ஹி-ஸத்³தோ³ ஹேதும்ஹி, ஹி யஸ்மா ஏதேஸு குலதூ³ஸனாத³யோ ந ருஹந்தி, தஸ்மா தேஸங் பே⁴ஸஜ்ஜகரணங் லப்³ப⁴ங், அத்தனியே ச ஸதி தா³தப்³ப³ந்தி ஏவமெத்த² அத்தோ² த³ட்ட²ப்³போ³. ந ரூஹதீதி ந ரோஹதி நப்பவத்ததி ந ஹோதி, ஆபத்திங் ந ஜனேதீதி அதி⁴ப்பாயோ. தேஸங் அத்தா²ய ஞாதிஸாமணேரேஹி வா பே⁴ஸஜ்ஜங் ஆஹராபேதப்³ப³ங், அத்தனோ அத்தா²ய வா ஆஹராபெத்வா தா³தப்³ப³ங். தேஹிபி ‘‘உபஜ்ஜா²யாதீ³னங் ஆஹரிஸ்ஸாமா’’தி வத்தஸீஸேன ஆஹரிதப்³ப³ங். ஸசே அஞ்ஞேபி யே கி³லானா ஹுத்வா விஹாரங் பவிஸந்தி, தேஸங் ஸப்³பே³ஸம்பி அபச்சாஸீஸந்தேன பே⁴ஸஜ்ஜங் காதப்³ப³ங். ஸத்³த⁴ங் குலங் ஹோதி பி⁴க்கு²ஸங்க⁴ஸ்ஸ மாதாபிதுட்டா²னீயங், தத்ர சே கோசி கி³லானோ ஹோதி, தஸ்ஸத்தா²ய ‘‘ப⁴ந்தே, இத்த²ன்னாமஸ்ஸ ரோக³ஸ்ஸ கிங் பே⁴ஸஜ்ஜங் கரொந்தீ’’தி கப்பியங் கத்வா புச்ச²ந்தி, இத³ஞ்சித³ஞ்ச க³ஹெத்வா கரொந்தீதி வட்டதி, பி⁴க்கூ²ஹி அஞ்ஞமஞ்ஞங் வா கதா² காதப்³பா³.
277.Bhesajjakaraṇādīti ādi-saddena anāmaṭṭhapiṇḍadānādīnaṃ gahaṇaṃ, hi-saddo hetumhi, hi yasmā etesu kuladūsanādayo na ruhanti, tasmā tesaṃ bhesajjakaraṇaṃ labbhaṃ, attaniye ca sati dātabbanti evamettha attho daṭṭhabbo. Na rūhatīti na rohati nappavattati na hoti, āpattiṃ na janetīti adhippāyo. Tesaṃ atthāya ñātisāmaṇerehi vā bhesajjaṃ āharāpetabbaṃ, attano atthāya vā āharāpetvā dātabbaṃ. Tehipi ‘‘upajjhāyādīnaṃ āharissāmā’’ti vattasīsena āharitabbaṃ. Sace aññepi ye gilānā hutvā vihāraṃ pavisanti, tesaṃ sabbesampi apaccāsīsantena bhesajjaṃ kātabbaṃ. Saddhaṃ kulaṃ hoti bhikkhusaṅghassa mātāpituṭṭhānīyaṃ, tatra ce koci gilāno hoti, tassatthāya ‘‘bhante, itthannāmassa rogassa kiṃ bhesajjaṃ karontī’’ti kappiyaṃ katvā pucchanti, idañcidañca gahetvā karontīti vaṭṭati, bhikkhūhi aññamaññaṃ vā kathā kātabbā.
278. ச²ன்னங் மாதாதீ³னஞ்ச தா³மரிகசோரஸ்ஸ இஸ்ஸரியஸ்ஸ அனாமட்டோ² பிண்ட³பாதோ தா³துங் அவாரிதோதி யோஜேதப்³ப³ங். ச²ன்னந்தி மாதாதீ³னங் ச²ன்னங் மஜ்ஜே². மாதாதீ³னந்தி பி⁴க்கு²னிஸ்ஸிதங் ட²பெத்வா அவஸேஸானங் பஞ்சன்னங் மாதாதீ³னங். ‘‘ச²ன்ன’’ந்தி பன யோஜனாய அட்ட²கதா²ய விருஜ்ஜ²தி. தத்த² ஹி ‘‘மாதாபிதூன’’ந்திஆதி³னா பி⁴க்கு²னிஸ்ஸிதங் ஓஹாய ஸத்தேவ வுத்தா. ஆசரியபு³த்³த⁴த³த்தத்தே²ரேன ச ததே²வ வுத்தங் –
278. Channaṃ mātādīnañca dāmarikacorassa issariyassa anāmaṭṭho piṇḍapāto dātuṃ avāritoti yojetabbaṃ. Channanti mātādīnaṃ channaṃ majjhe. Mātādīnanti bhikkhunissitaṃ ṭhapetvā avasesānaṃ pañcannaṃ mātādīnaṃ. ‘‘Channa’’nti pana yojanāya aṭṭhakathāya virujjhati. Tattha hi ‘‘mātāpitūna’’ntiādinā bhikkhunissitaṃ ohāya satteva vuttā. Ācariyabuddhadattattherena ca tatheva vuttaṃ –
‘‘அனாமட்டோ²பி தா³தப்³போ³, பிண்ட³பாதோ விஜானதா;
‘‘Anāmaṭṭhopi dātabbo, piṇḍapāto vijānatā;
த்³வின்னங் மாதாபிதூனம்பி, தது³பட்டா²யகஸ்ஸ ச.
Dvinnaṃ mātāpitūnampi, tadupaṭṭhāyakassa ca.
‘‘இஸ்ஸரஸ்ஸாபி தா³தப்³போ³, சோரதா³மரிகஸ்ஸ ச;
‘‘Issarassāpi dātabbo, coradāmarikassa ca;
ப⁴ண்டு³கஸ்ஸத்தனோ சேவ, வெய்யாவச்சகரஸ்ஸபீ’’தி. (வினய வி॰ 493-495);
Bhaṇḍukassattano ceva, veyyāvaccakarassapī’’ti. (vinaya vi. 493-495);
தா³மரிகசோரஸ்ஸாதி ரஜ்ஜங் பத்த²யமானஸ்ஸ பாகடசோரஸ்ஸ. அனாமட்டோ²தி அபப்³ப³ஜிதஸ்ஸ ஹத்த²தோ லத்³தா⁴ அத்தனா அஞ்ஞேன வா பப்³ப³ஜிதேன அக்³க³ஹிதஅக்³கோ³, அயங் அனாமட்ட²பிண்ட³பாதோ. படிஸந்தா²ரோ ‘‘விஹாரப்பத்தங் ஆக³ந்துகங் வா த³லித்³தா³தி³ங் வா தி³ஸ்வா ‘பானீயங் பிவா’தி தா³தப்³ப³ங், பாத³மக்க²னதேலங் தா³தப்³ப³ங், காலே ஆக³தஸ்ஸ யாகு³ப⁴த்தங், விகாலே ஆக³தஸ்ஸ ஸசே தண்டு³லா அத்தி², தண்டு³லா தா³தப்³பா³, ஸயனட்டா²னங் தா³தப்³ப³ங், சோரானங் பன ஸங்கி⁴கம்பிதா³தப்³ப³’’ந்தி வுத்தோ. அவஸேஸபடிஸந்தா²ரோ பன அபச்சாஸீஸந்தேன காதப்³போ³. ததா² த⁴ம்மபடிஸந்தா²ரோபி யஸ்ஸ கஸ்ஸசி தா³தப்³போ³வ.
Dāmarikacorassāti rajjaṃ patthayamānassa pākaṭacorassa. Anāmaṭṭhoti apabbajitassa hatthato laddhā attanā aññena vā pabbajitena aggahitaaggo, ayaṃ anāmaṭṭhapiṇḍapāto. Paṭisanthāro ‘‘vihārappattaṃ āgantukaṃ vā daliddādiṃ vā disvā ‘pānīyaṃ pivā’ti dātabbaṃ, pādamakkhanatelaṃ dātabbaṃ, kāle āgatassa yāgubhattaṃ, vikāle āgatassa sace taṇḍulā atthi, taṇḍulā dātabbā, sayanaṭṭhānaṃ dātabbaṃ, corānaṃ pana saṅghikampidātabba’’nti vutto. Avasesapaṭisanthāro pana apaccāsīsantena kātabbo. Tathā dhammapaṭisanthāropi yassa kassaci dātabbova.
279. தேஸந்தி அஞ்ஞாதகாதீ³னங் கி³ஹீனங். கயிராதி ‘‘ப⁴ணதா²’’தி வுத்தே கரெய்ய. ‘‘ந கரோமா’’தி வுத்தே ஸசே விப்படிஸாரினோ ப⁴விஸ்ஸந்தி, காதப்³ப³ங். நத்தனோதி அத்தனோ ஸுத்தோத³கேஹி ந கயிராதி யோஜனீயங். ஏவங் ஸாமஞ்ஞேன பரித்தே படிபஜ்ஜனவிதி⁴ங் த³ஸ்ஸெத்வா இதா³னி ஆடானாடியபரித்தே படிபஜ்ஜிதப்³ப³விதி⁴ங் த³ஸ்ஸேதுங் ‘‘ப⁴ணிதப்³ப³’’ந்திஆதி³மாஹ. ப⁴ணாபெந்தேதி ‘‘ப⁴ணதா²’’தி அஜ்ஜே²ஸனபுப்³ப³கங் பயோஜெந்தே. பரித்தங் ஸாஸனோக³த⁴ந்தி பட²மமேவ ஆடானாடியஸுத்தங் அப⁴ணித்வா ஸாஸனபரியாபன்னங் மெத்தஸுத்தங் த⁴ஜக்³க³ஸுத்தங் ரதனஸுத்தந்தி இமானி ஸுத்தானி ஸத்தாஹங் ப⁴ணித்வா யதா²பரிகம்மங் பரித்தங் ஆடானாடியபரித்தங் ப⁴ணிதப்³ப³ந்தி யோஜனா.
279.Tesanti aññātakādīnaṃ gihīnaṃ. Kayirāti ‘‘bhaṇathā’’ti vutte kareyya. ‘‘Na karomā’’ti vutte sace vippaṭisārino bhavissanti, kātabbaṃ. Nattanoti attano suttodakehi na kayirāti yojanīyaṃ. Evaṃ sāmaññena paritte paṭipajjanavidhiṃ dassetvā idāni āṭānāṭiyaparitte paṭipajjitabbavidhiṃ dassetuṃ ‘‘bhaṇitabba’’ntiādimāha. Bhaṇāpenteti ‘‘bhaṇathā’’ti ajjhesanapubbakaṃ payojente. Parittaṃ sāsanogadhanti paṭhamameva āṭānāṭiyasuttaṃ abhaṇitvā sāsanapariyāpannaṃ mettasuttaṃ dhajaggasuttaṃ ratanasuttanti imāni suttāni sattāhaṃ bhaṇitvā yathāparikammaṃ parittaṃ āṭānāṭiyaparittaṃ bhaṇitabbanti yojanā.
280. ‘‘ஆக³ந்த்வா ஸீலங் தே³து, த⁴ம்மங் பரித்தஞ்ச பா⁴ஸதூ’’தி கேனசி பேஸிதோ க³ந்த்வா ஸீலங் வா தா³துங் த⁴ம்மங் பரித்தங் வா வத்துங் லப்³ப⁴தீதி ஸம்ப³ந்தோ⁴.
280. ‘‘Āgantvā sīlaṃ detu, dhammaṃ parittañca bhāsatū’’ti kenaci pesito gantvā sīlaṃ vā dātuṃ dhammaṃ parittaṃ vā vattuṃ labbhatīti sambandho.
பே⁴ஸஜ்ஜனித்³தே³ஸவண்ணனா நிட்டி²தா.
Bhesajjaniddesavaṇṇanā niṭṭhitā.
