| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
11. பே⁴தா³னுவத்தகஸிக்கா²பத³வண்ணனா
11. Bhedānuvattakasikkhāpadavaṇṇanā
தஸ்ஸேவாதி பே⁴தா³ய பரக்கமந்தஸ்ஸேவ. கோ²தி நிபாதமத்தங். பனாதி விஸேஸே நிபாதோ. யங் வசனங் ஸமக்³கே³பி வக்³கே³ அவயவபூ⁴தே கரோதி பி⁴ந்த³தி, தங் கலஹகாரகவசனங் இத⁴ ‘‘வக்³க³’’ந்தி வுச்சதீதி ஆஹ ‘‘வக்³க³ங் அஸாமக்³கி³பக்கி²யவசனங் வத³ந்தீ’’தி. அஸாமக்³கி³பக்கே² ப⁴வா அஸாமக்³கி³பக்கி²யா, கலஹகாரகா, தேஸங் வசனங் அஸாமக்³கி³பக்கி²யவசனங், அஸாமக்³கி³பக்கே² வா ப⁴வங் வசனங் அஸாமக்³கி³பக்கி²யவசனங். ‘‘ந ஹி ஸங்கோ⁴ ஸங்க⁴ஸ்ஸ கம்மங் கரோதீ’’தி இத³ங் நிக்³க³ஹவஸேன கத்தப்³ப³ங் கம்மங் ஸந்தா⁴ய வுத்தங், உப்³பா³ஹிகாதி³கம்மங் பன ப³ஹூனம்பி காதுங் வட்டதியேவ. த⁴ம்மவாதீ³தி பூ⁴தவாதீ³. வினயவாதீ³தி வூபஸமவாதீ³. ஜானாதி நோதி எத்தா²பி ‘‘ச²ந்த³ஞ்ச ருசிஞ்சா’’தி இத³ங் ஆனெத்வா ஸம்ப³ந்தி⁴தப்³ப³ங். தேனாஹ ‘‘அம்ஹாகங் ச²ந்தா³தீ³னி ஜானாதீ’’தி. பா⁴ஸதீதி எத்த² ‘‘நோ’’தி இத³ங் விப⁴த்திவிபரிணாமேன யுஜ்ஜதி. தேனாஹ ‘‘ஏவங் கரோமாதி அம்ஹேஹி ஸத்³தி⁴ங் பா⁴ஸதீ’’தி. ‘‘ஏத’’ந்தி இமினா தஸ்ஸ கம்மங் பச்சாமட்ட²ந்தி ஆஹ ‘‘யங் ஸோ கரோதீ’’திஆதி³. ஸோதி ஸங்க⁴பே⁴தா³ய பரக்கமந்தோ. ஸமேதாயஸ்மந்தானந்தி எத்த² ‘‘சித்த’’ந்தி அஜ்ஜா²ஹரிதப்³ப³ந்தி ஆஹ ‘‘ஆயஸ்மந்தானங் சித்த’’ந்தி. வுத்தஸதி³ஸாயேவாதி எத்த² யங் வத்தப்³ப³ங், தங் ஹெட்டா² அஞ்ஞபா⁴கி³யஸிக்கா²பத³ட்ட²கதா²ய வண்ணனாயங் (கங்கா²॰ அட்ட²॰ அஞ்ஞபா⁴கி³யஸிக்கா²பத³வண்ணனா) வுத்தமேவ.
Tassevāti bhedāya parakkamantasseva. Khoti nipātamattaṃ. Panāti visese nipāto. Yaṃ vacanaṃ samaggepi vagge avayavabhūte karoti bhindati, taṃ kalahakārakavacanaṃ idha ‘‘vagga’’nti vuccatīti āha ‘‘vaggaṃ asāmaggipakkhiyavacanaṃ vadantī’’ti. Asāmaggipakkhe bhavā asāmaggipakkhiyā, kalahakārakā, tesaṃ vacanaṃ asāmaggipakkhiyavacanaṃ, asāmaggipakkhe vā bhavaṃ vacanaṃ asāmaggipakkhiyavacanaṃ. ‘‘Na hi saṅgho saṅghassa kammaṃ karotī’’ti idaṃ niggahavasena kattabbaṃ kammaṃ sandhāya vuttaṃ, ubbāhikādikammaṃ pana bahūnampi kātuṃ vaṭṭatiyeva. Dhammavādīti bhūtavādī. Vinayavādīti vūpasamavādī. Jānāti noti etthāpi ‘‘chandañca ruciñcā’’ti idaṃ ānetvā sambandhitabbaṃ. Tenāha ‘‘amhākaṃ chandādīni jānātī’’ti. Bhāsatīti ettha ‘‘no’’ti idaṃ vibhattivipariṇāmena yujjati. Tenāha ‘‘evaṃ karomāti amhehi saddhiṃ bhāsatī’’ti. ‘‘Eta’’nti iminā tassa kammaṃ paccāmaṭṭhanti āha ‘‘yaṃ so karotī’’tiādi. Soti saṅghabhedāya parakkamanto. Sametāyasmantānanti ettha ‘‘citta’’nti ajjhāharitabbanti āha ‘‘āyasmantānaṃ citta’’nti. Vuttasadisāyevāti ettha yaṃ vattabbaṃ, taṃ heṭṭhā aññabhāgiyasikkhāpadaṭṭhakathāya vaṇṇanāyaṃ (kaṅkhā. aṭṭha. aññabhāgiyasikkhāpadavaṇṇanā) vuttameva.
பே⁴தா³னுவத்தகஸிக்கா²பத³வண்ணனா நிட்டி²தா.
Bhedānuvattakasikkhāpadavaṇṇanā niṭṭhitā.
