| Library / Tipiṭaka / ತಿಪಿಟಕ • Tipiṭaka / ಸುತ್ತನಿಪಾತ-ಅಟ್ಠಕಥಾ • Suttanipāta-aṭṭhakathā |
೧೨. ಭದ್ರಾವುಧಸುತ್ತವಣ್ಣನಾ
12. Bhadrāvudhasuttavaṇṇanā
೧೧೦೮-೯. ಓಕಞ್ಜಹನ್ತಿ ಭದ್ರಾವುಧಸುತ್ತಂ। ತತ್ಥ ಓಕಞ್ಜಹನ್ತಿ ಆಲಯಂ ಜಹಂ। ತಣ್ಹಚ್ಛಿದನ್ತಿ ಛತಣ್ಹಾಕಾಯಚ್ಛಿದಂ। ಅನೇಜನ್ತಿ ಲೋಕಧಮ್ಮೇಸು ನಿಕ್ಕಮ್ಪಂ। ನನ್ದಿಞ್ಜಹನ್ತಿ ಅನಾಗತರೂಪಾದಿಪತ್ಥನಾಜಹಂ। ಏಕಾ ಏವ ಹಿ ತಣ್ಹಾ ಥುತಿವಸೇನ ಇಧ ನಾನಪ್ಪಕಾರತೋ ವುತ್ತಾ। ಕಪ್ಪಞ್ಜಹನ್ತಿ ದುವಿಧಕಪ್ಪಜಹಂ। ಅಭಿಯಾಚೇತಿ ಅತಿವಿಯ ಯಾಚಾಮಿ। ಸುತ್ವಾನ ನಾಗಸ್ಸ ಅಪನಮಿಸ್ಸನ್ತಿ ಇತೋತಿ ನಾಗಸ್ಸ ತವ ಭಗವಾ ವಚನಂ ಸುತ್ವಾ ಇತೋ ಪಾಸಾಣಕಚೇತಿಯತೋ ಬಹೂ ಜನಾ ಪಕ್ಕಮಿಸ್ಸನ್ತೀತಿ ಅಧಿಪ್ಪಾಯೋ। ಜನಪದೇಹಿ ಸಙ್ಗತಾತಿ ಅಙ್ಗಾದೀಹಿ ಜನಪದೇಹಿ ಇಧ ಸಮಾಗತಾ। ವಿಯಾಕರೋಹೀತಿ ಧಮ್ಮಂ ದೇಸೇಹಿ।
1108-9.Okañjahanti bhadrāvudhasuttaṃ. Tattha okañjahanti ālayaṃ jahaṃ. Taṇhacchidanti chataṇhākāyacchidaṃ. Anejanti lokadhammesu nikkampaṃ. Nandiñjahanti anāgatarūpādipatthanājahaṃ. Ekā eva hi taṇhā thutivasena idha nānappakārato vuttā. Kappañjahanti duvidhakappajahaṃ. Abhiyāceti ativiya yācāmi. Sutvāna nāgassa apanamissanti itoti nāgassa tava bhagavā vacanaṃ sutvā ito pāsāṇakacetiyato bahū janā pakkamissantīti adhippāyo. Janapadehi saṅgatāti aṅgādīhi janapadehi idha samāgatā. Viyākarohīti dhammaṃ desehi.
೧೧೧೦. ಅಥಸ್ಸ ಆಸಯಾನುಲೋಮೇನ ಧಮ್ಮಂ ದೇಸೇನ್ತೋ ಭಗವಾ ದ್ವೇ ಗಾಥಾಯೋ ಅಭಾಸಿ। ತತ್ಥ ಆದಾನತಣ್ಹನ್ತಿ ರೂಪಾದೀನಂ ಆದಾಯಿಕಂ ಗಹಣತಣ್ಹಂ, ತಣ್ಹುಪಾದಾನನ್ತಿ ವುತ್ತಂ ಹೋತಿ। ಯಂ ಯಞ್ಹಿ ಲೋಕಸ್ಮಿಮುಪಾದಿಯನ್ತೀತಿ ಏತೇಸು ಉದ್ಧಾದಿಭೇದೇಸು ಯಂ ಯಂ ಗಣ್ಹನ್ತಿ। ತೇನೇವ ಮಾರೋ ಅನ್ವೇತಿ ಜನ್ತುನ್ತಿ ತೇನೇವ ಉಪಾದಾನಪಚ್ಚಯನಿಬ್ಬತ್ತಕಮ್ಮಾಭಿಸಙ್ಖಾರನಿಬ್ಬತ್ತವಸೇನ ಪಟಿಸನ್ಧಿಕ್ಖನ್ಧಮಾರೋ ತಂ ಸತ್ತಂ ಅನುಗಚ್ಛತಿ।
1110. Athassa āsayānulomena dhammaṃ desento bhagavā dve gāthāyo abhāsi. Tattha ādānataṇhanti rūpādīnaṃ ādāyikaṃ gahaṇataṇhaṃ, taṇhupādānanti vuttaṃ hoti. Yaṃ yañhi lokasmimupādiyantīti etesu uddhādibhedesu yaṃ yaṃ gaṇhanti. Teneva māro anveti jantunti teneva upādānapaccayanibbattakammābhisaṅkhāranibbattavasena paṭisandhikkhandhamāro taṃ sattaṃ anugacchati.
೧೧೧೧. ತಸ್ಮಾ ಪಜಾನನ್ತಿ ತಸ್ಮಾ ಏತಮಾದೀನವಂ ಅನಿಚ್ಚಾದಿವಸೇನ ವಾ ಸಙ್ಖಾರೇ ಜಾನನ್ತೋ। ಆದಾನಸತ್ತೇ ಇತಿ ಪೇಕ್ಖಮಾನೋ, ಪಜಂ ಇಮಂ ಮಚ್ಚುಧೇಯ್ಯೇ ವಿಸತ್ತನ್ತಿ ಆದಾತಬ್ಬಟ್ಠೇನ ಆದಾನೇಸು ರೂಪಾದೀಸು ಸತ್ತೇ ಸಬ್ಬಲೋಕೇ ಇಮಂ ಪಜಂ ಮಚ್ಚುಧೇಯ್ಯೇ ಲಗ್ಗಂ ಪೇಕ್ಖಮಾನೋ। ಆದಾನಸತ್ತೇ ವಾ ಆದಾನಾಭಿನಿವಿಟ್ಠೇ ಪುಗ್ಗಲೇ ಆದಾನಸಙ್ಗಹೇತುಞ್ಚ ಇಮಂ ಪಜಂ ಮಚ್ಚುಧೇಯ್ಯೇ ಲಗ್ಗಂ ತತೋ ವೀತಿಕ್ಕಮಿತುಂ ಅಸಮತ್ಥಂ ಇತಿ ಪೇಕ್ಖಮಾನೋ ಕಿಞ್ಚನಂ ಸಬ್ಬಲೋಕೇ ನ ಉಪ್ಪಾದಿಯೇಥಾತಿ ಸೇಸಂ ಸಬ್ಬತ್ಥ ಪಾಕಟಮೇವ।
1111.Tasmā pajānanti tasmā etamādīnavaṃ aniccādivasena vā saṅkhāre jānanto. Ādānasatte iti pekkhamāno, pajaṃ imaṃ maccudheyye visattanti ādātabbaṭṭhena ādānesu rūpādīsu satte sabbaloke imaṃ pajaṃ maccudheyye laggaṃ pekkhamāno. Ādānasatte vā ādānābhiniviṭṭhe puggale ādānasaṅgahetuñca imaṃ pajaṃ maccudheyye laggaṃ tato vītikkamituṃ asamatthaṃ iti pekkhamāno kiñcanaṃ sabbaloke na uppādiyethāti sesaṃ sabbattha pākaṭameva.
ಏವಂ ಭಗವಾ ಇಮಮ್ಪಿ ಸುತ್ತಂ ಅರಹತ್ತನಿಕೂಟೇನೇವ ದೇಸೇಸಿ। ದೇಸನಾಪರಿಯೋಸಾನೇ ಚ ಪುಬ್ಬಸದಿಸೋ ಏವ ಧಮ್ಮಾಭಿಸಮಯೋ ಅಹೋಸೀತಿ।
Evaṃ bhagavā imampi suttaṃ arahattanikūṭeneva desesi. Desanāpariyosāne ca pubbasadiso eva dhammābhisamayo ahosīti.
ಪರಮತ್ಥಜೋತಿಕಾಯ ಖುದ್ದಕ-ಅಟ್ಠಕಥಾಯ
Paramatthajotikāya khuddaka-aṭṭhakathāya
ಸುತ್ತನಿಪಾತ-ಅಟ್ಠಕಥಾಯ ಭದ್ರಾವುಧಸುತ್ತವಣ್ಣನಾ ನಿಟ್ಠಿತಾ।
Suttanipāta-aṭṭhakathāya bhadrāvudhasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಸುತ್ತನಿಪಾತಪಾಳಿ • Suttanipātapāḷi / ೧೨. ಭದ್ರಾವುಧಮಾಣವಪುಚ್ಛಾ • 12. Bhadrāvudhamāṇavapucchā
