| Library / Tipiṭaka / তিপিটক • Tipiṭaka / সুত্তনিপাত-অট্ঠকথা • Suttanipāta-aṭṭhakathā |
১২. ভদ্রাৰুধসুত্তৰণ্ণনা
12. Bhadrāvudhasuttavaṇṇanā
১১০৮-৯. ওকঞ্জহন্তি ভদ্রাৰুধসুত্তং। তত্থ ওকঞ্জহন্তি আলযং জহং। তণ্হচ্ছিদন্তি ছতণ্হাকাযচ্ছিদং। অনেজন্তি লোকধম্মেসু নিক্কম্পং। নন্দিঞ্জহন্তি অনাগতরূপাদিপত্থনাজহং। একা এৰ হি তণ্হা থুতিৰসেন ইধ নানপ্পকারতো ৰুত্তা। কপ্পঞ্জহন্তি দুৰিধকপ্পজহং। অভিযাচেতি অতিৰিয যাচামি। সুত্ৰান নাগস্স অপনমিস্সন্তি ইতোতি নাগস্স তৰ ভগৰা ৰচনং সুত্ৰা ইতো পাসাণকচেতিযতো বহূ জনা পক্কমিস্সন্তীতি অধিপ্পাযো। জনপদেহি সঙ্গতাতি অঙ্গাদীহি জনপদেহি ইধ সমাগতা। ৰিযাকরোহীতি ধম্মং দেসেহি।
1108-9.Okañjahanti bhadrāvudhasuttaṃ. Tattha okañjahanti ālayaṃ jahaṃ. Taṇhacchidanti chataṇhākāyacchidaṃ. Anejanti lokadhammesu nikkampaṃ. Nandiñjahanti anāgatarūpādipatthanājahaṃ. Ekā eva hi taṇhā thutivasena idha nānappakārato vuttā. Kappañjahanti duvidhakappajahaṃ. Abhiyāceti ativiya yācāmi. Sutvāna nāgassa apanamissanti itoti nāgassa tava bhagavā vacanaṃ sutvā ito pāsāṇakacetiyato bahū janā pakkamissantīti adhippāyo. Janapadehi saṅgatāti aṅgādīhi janapadehi idha samāgatā. Viyākarohīti dhammaṃ desehi.
১১১০. অথস্স আসযানুলোমেন ধম্মং দেসেন্তো ভগৰা দ্ৰে গাথাযো অভাসি। তত্থ আদানতণ্হন্তি রূপাদীনং আদাযিকং গহণতণ্হং, তণ্হুপাদানন্তি ৰুত্তং হোতি। যং যঞ্হি লোকস্মিমুপাদিযন্তীতি এতেসু উদ্ধাদিভেদেসু যং যং গণ্হন্তি। তেনেৰ মারো অন্ৰেতি জন্তুন্তি তেনেৰ উপাদানপচ্চযনিব্বত্তকম্মাভিসঙ্খারনিব্বত্তৰসেন পটিসন্ধিক্খন্ধমারো তং সত্তং অনুগচ্ছতি।
1110. Athassa āsayānulomena dhammaṃ desento bhagavā dve gāthāyo abhāsi. Tattha ādānataṇhanti rūpādīnaṃ ādāyikaṃ gahaṇataṇhaṃ, taṇhupādānanti vuttaṃ hoti. Yaṃ yañhi lokasmimupādiyantīti etesu uddhādibhedesu yaṃ yaṃ gaṇhanti. Teneva māro anveti jantunti teneva upādānapaccayanibbattakammābhisaṅkhāranibbattavasena paṭisandhikkhandhamāro taṃ sattaṃ anugacchati.
১১১১. তস্মা পজানন্তি তস্মা এতমাদীনৰং অনিচ্চাদিৰসেন ৰা সঙ্খারে জানন্তো। আদানসত্তে ইতি পেক্খমানো, পজং ইমং মচ্চুধেয্যে ৰিসত্তন্তি আদাতব্বট্ঠেন আদানেসু রূপাদীসু সত্তে সব্বলোকে ইমং পজং মচ্চুধেয্যে লগ্গং পেক্খমানো। আদানসত্তে ৰা আদানাভিনিৰিট্ঠে পুগ্গলে আদানসঙ্গহেতুঞ্চ ইমং পজং মচ্চুধেয্যে লগ্গং ততো ৰীতিক্কমিতুং অসমত্থং ইতি পেক্খমানো কিঞ্চনং সব্বলোকে ন উপ্পাদিযেথাতি সেসং সব্বত্থ পাকটমেৰ।
1111.Tasmā pajānanti tasmā etamādīnavaṃ aniccādivasena vā saṅkhāre jānanto. Ādānasatte iti pekkhamāno, pajaṃ imaṃ maccudheyye visattanti ādātabbaṭṭhena ādānesu rūpādīsu satte sabbaloke imaṃ pajaṃ maccudheyye laggaṃ pekkhamāno. Ādānasatte vā ādānābhiniviṭṭhe puggale ādānasaṅgahetuñca imaṃ pajaṃ maccudheyye laggaṃ tato vītikkamituṃ asamatthaṃ iti pekkhamāno kiñcanaṃ sabbaloke na uppādiyethāti sesaṃ sabbattha pākaṭameva.
এৰং ভগৰা ইমম্পি সুত্তং অরহত্তনিকূটেনেৰ দেসেসি। দেসনাপরিযোসানে চ পুব্বসদিসো এৰ ধম্মাভিসমযো অহোসীতি।
Evaṃ bhagavā imampi suttaṃ arahattanikūṭeneva desesi. Desanāpariyosāne ca pubbasadiso eva dhammābhisamayo ahosīti.
পরমত্থজোতিকায খুদ্দক-অট্ঠকথায
Paramatthajotikāya khuddaka-aṭṭhakathāya
সুত্তনিপাত-অট্ঠকথায ভদ্রাৰুধসুত্তৰণ্ণনা নিট্ঠিতা।
Suttanipāta-aṭṭhakathāya bhadrāvudhasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / সুত্তনিপাতপাল়ি • Suttanipātapāḷi / ১২. ভদ্রাৰুধমাণৰপুচ্ছা • 12. Bhadrāvudhamāṇavapucchā
