| Library / Tipiṭaka / තිපිටක • Tipiṭaka / අපදානපාළි • Apadānapāḷi |
42. භද්දාලිවග්ගො
42. Bhaddālivaggo
1. භද්දාලිත්ථෙරඅපදානං
1. Bhaddālittheraapadānaṃ
1.
1.
‘‘සුමෙධො නාම සම්බුද්ධො, අග්ගො කාරුණිකො මුනි;
‘‘Sumedho nāma sambuddho, aggo kāruṇiko muni;
විවෙකකාමො ලොකග්ගො, හිමවන්තමුපාගමි.
Vivekakāmo lokaggo, himavantamupāgami.
2.
2.
‘‘අජ්ඣොගාහෙත්වා හිමවං, සුමෙධො ලොකනායකො;
‘‘Ajjhogāhetvā himavaṃ, sumedho lokanāyako;
පල්ලඞ්කං ආභුජිත්වාන, නිසීදි පුරිසුත්තමො.
Pallaṅkaṃ ābhujitvāna, nisīdi purisuttamo.
3.
3.
‘‘සමාධිං සො සමාපන්නො, සුමෙධො ලොකනායකො;
‘‘Samādhiṃ so samāpanno, sumedho lokanāyako;
සත්තරත්තින්දිවං බුද්ධො, නිසීදි පුරිසුත්තමො.
Sattarattindivaṃ buddho, nisīdi purisuttamo.
4.
4.
තත්ථද්දසාසිං සම්බුද්ධං, ඔඝතිණ්ණමනාසවං.
Tatthaddasāsiṃ sambuddhaṃ, oghatiṇṇamanāsavaṃ.
5.
5.
‘‘සම්මජ්ජනිං ගහෙත්වාන, සම්මජ්ජිත්වාන අස්සමං;
‘‘Sammajjaniṃ gahetvāna, sammajjitvāna assamaṃ;
චතුදණ්ඩෙ ඨපෙත්වාන, අකාසිං මණ්ඩපං තදා.
Catudaṇḍe ṭhapetvāna, akāsiṃ maṇḍapaṃ tadā.
6.
6.
‘‘සාලපුප්ඵං ආහරිත්වා, මණ්ඩපං ඡාදයිං අහං;
‘‘Sālapupphaṃ āharitvā, maṇḍapaṃ chādayiṃ ahaṃ;
පසන්නචිත්තො සුමනො, අභිවන්දිං තථාගතං.
Pasannacitto sumano, abhivandiṃ tathāgataṃ.
7.
7.
‘‘යං වදන්ති සුමෙධොති, භූරිපඤ්ඤං සුමෙධසං;
‘‘Yaṃ vadanti sumedhoti, bhūripaññaṃ sumedhasaṃ;
භික්ඛුසඞ්ඝෙ නිසීදිත්වා, ඉමා ගාථා අභාසථ.
Bhikkhusaṅghe nisīditvā, imā gāthā abhāsatha.
8.
8.
‘‘‘බුද්ධස්ස ගිරමඤ්ඤාය, සබ්බෙ දෙවා සමාගමුං;
‘‘‘Buddhassa giramaññāya, sabbe devā samāgamuṃ;
අසංසයං බුද්ධසෙට්ඨො, ධම්මං දෙසෙති චක්ඛුමා.
Asaṃsayaṃ buddhaseṭṭho, dhammaṃ deseti cakkhumā.
9.
9.
‘‘‘සුමෙධො නාම සම්බුද්ධො, ආහුතීනං පටිග්ගහො;
‘‘‘Sumedho nāma sambuddho, āhutīnaṃ paṭiggaho;
දෙවසඞ්ඝෙ නිසීදිත්වා, ඉමා ගාථා අභාසථ.
Devasaṅghe nisīditvā, imā gāthā abhāsatha.
10.
10.
‘‘‘යො මෙ සත්තාහං මණ්ඩපං, ධාරයී සාලඡාදිතං;
‘‘‘Yo me sattāhaṃ maṇḍapaṃ, dhārayī sālachāditaṃ;
තමහං කිත්තයිස්සාමි, සුණාථ මම භාසතො.
Tamahaṃ kittayissāmi, suṇātha mama bhāsato.
11.
11.
‘‘‘දෙවභූතො මනුස්සො වා, හෙමවණ්ණො භවිස්සති;
‘‘‘Devabhūto manusso vā, hemavaṇṇo bhavissati;
පහූතභොගො හුත්වාන, කාමභොගී භවිස්සති.
Pahūtabhogo hutvāna, kāmabhogī bhavissati.
12.
12.
‘‘‘සට්ඨි නාගසහස්සානි, සබ්බාලඞ්කාරභූසිතා;
‘‘‘Saṭṭhi nāgasahassāni, sabbālaṅkārabhūsitā;
සුවණ්ණකච්ඡා මාතඞ්ගා, හෙමකප්පනවාසසා.
Suvaṇṇakacchā mātaṅgā, hemakappanavāsasā.
13.
13.
‘‘‘ආරූළ්හා ගාමණීයෙහි, තොමරඞ්කුසපාණිභි;
‘‘‘Ārūḷhā gāmaṇīyehi, tomaraṅkusapāṇibhi;
තෙහි නාගෙහි පරිවුතො, රමිස්සති අයං නරො.
Tehi nāgehi parivuto, ramissati ayaṃ naro.
14.
14.
‘‘‘සට්ඨි අස්සසහස්සානි, සබ්බාලඞ්කාරභූසිතා;
‘‘‘Saṭṭhi assasahassāni, sabbālaṅkārabhūsitā;
ආජානීයාව ජාතියා, සින්ධවා සීඝවාහිනො.
Ājānīyāva jātiyā, sindhavā sīghavāhino.
15.
15.
‘‘‘ආරූළ්හා ගාමණීයෙහි, ඉල්ලියාචාපධාරිභි;
‘‘‘Ārūḷhā gāmaṇīyehi, illiyācāpadhāribhi;
පරිවාරෙස්සන්තිමං නිච්චං, බුද්ධපූජායිදං ඵලං.
Parivāressantimaṃ niccaṃ, buddhapūjāyidaṃ phalaṃ.
16.
16.
‘‘‘සට්ඨි රථසහස්සානි, සබ්බාලඞ්කාරභූසිතා;
‘‘‘Saṭṭhi rathasahassāni, sabbālaṅkārabhūsitā;
දීපා අථොපි වෙයග්ඝා, සන්නද්ධා උස්සිතද්ධජා.
Dīpā athopi veyagghā, sannaddhā ussitaddhajā.
17.
17.
‘‘‘ආරූළ්හා ගාමණීයෙහි, චාපහත්ථෙහි වම්මිභි;
‘‘‘Ārūḷhā gāmaṇīyehi, cāpahatthehi vammibhi;
පරිවාරෙස්සන්තිමං නිච්චං, බුද්ධපූජායිදං ඵලං.
Parivāressantimaṃ niccaṃ, buddhapūjāyidaṃ phalaṃ.
18.
18.
‘‘‘සට්ඨි ගාමසහස්සානි, පරිපුණ්ණානි සබ්බසො;
‘‘‘Saṭṭhi gāmasahassāni, paripuṇṇāni sabbaso;
පහූතධනධඤ්ඤානි, සුසමිද්ධානි සබ්බසො;
Pahūtadhanadhaññāni, susamiddhāni sabbaso;
සදා පාතුභවිස්සන්ති, බුද්ධපූජායිදං ඵලං.
Sadā pātubhavissanti, buddhapūjāyidaṃ phalaṃ.
19.
19.
‘‘‘හත්ථී අස්සා රථා පත්තී, සෙනා ච චතුරඞ්ගිනී;
‘‘‘Hatthī assā rathā pattī, senā ca caturaṅginī;
පරිවාරෙස්සන්තිමං නිච්චං, බුද්ධපූජායිදං ඵලං.
Parivāressantimaṃ niccaṃ, buddhapūjāyidaṃ phalaṃ.
20.
20.
‘‘‘අට්ඨාරසෙ කප්පසතෙ, දෙවලොකෙ රමිස්සති;
‘‘‘Aṭṭhārase kappasate, devaloke ramissati;
සහස්සක්ඛත්තුං රාජා ච, චක්කවත්තී භවිස්සති.
Sahassakkhattuṃ rājā ca, cakkavattī bhavissati.
21.
21.
‘‘‘සතානං තීණික්ඛත්තුඤ්ච, දෙවරජ්ජං කරිස්සති;
‘‘‘Satānaṃ tīṇikkhattuñca, devarajjaṃ karissati;
පදෙසරජ්ජං විපුලං, ගණනාතො අසඞ්ඛියං.
Padesarajjaṃ vipulaṃ, gaṇanāto asaṅkhiyaṃ.
22.
22.
‘‘‘තිංසකප්පසහස්සම්හි, ඔක්කාකකුලසම්භවො;
‘‘‘Tiṃsakappasahassamhi, okkākakulasambhavo;
ගොතමො නාම ගොත්තෙන, සත්ථා ලොකෙ භවිස්සති.
Gotamo nāma gottena, satthā loke bhavissati.
23.
23.
‘‘‘තස්ස ධම්මෙසු දායාදො, ඔරසො ධම්මනිම්මිතො;
‘‘‘Tassa dhammesu dāyādo, oraso dhammanimmito;
සබ්බාසවෙ පරිඤ්ඤාය, විහරිස්සතිනාසවො’.
Sabbāsave pariññāya, viharissatināsavo’.
24.
24.
‘‘තිංසකප්පසහස්සම්හි , අද්දසං ලොකනායකං;
‘‘Tiṃsakappasahassamhi , addasaṃ lokanāyakaṃ;
එත්ථන්තරමුපාදාය, ගවෙසිං අමතං පදං.
Etthantaramupādāya, gavesiṃ amataṃ padaṃ.
25.
25.
‘‘ලාභා මය්හං සුලද්ධං මෙ, යමහඤ්ඤාසි සාසනං;
‘‘Lābhā mayhaṃ suladdhaṃ me, yamahaññāsi sāsanaṃ;
තිස්සො විජ්ජා අනුප්පත්තා, කතං බුද්ධස්ස සාසනං.
Tisso vijjā anuppattā, kataṃ buddhassa sāsanaṃ.
26.
26.
‘‘නමො තෙ පුරිසාජඤ්ඤ, නමො තෙ පුරිසුත්තම;
‘‘Namo te purisājañña, namo te purisuttama;
තව ඤාණං පකිත්තෙත්වා, පත්තොම්හි අචලං පදං.
Tava ñāṇaṃ pakittetvā, pattomhi acalaṃ padaṃ.
27.
27.
‘‘යං යං යොනුපපජ්ජාමි, දෙවත්තං අථ මානුසං;
‘‘Yaṃ yaṃ yonupapajjāmi, devattaṃ atha mānusaṃ;
සබ්බත්ථ සුඛිතො හොමි, ඵලං මෙ ඤාණකිත්තනෙ.
Sabbattha sukhito homi, phalaṃ me ñāṇakittane.
28.
28.
‘‘ඉදං පච්ඡිමකං මය්හං, චරිමො වත්තතෙ භවො;
‘‘Idaṃ pacchimakaṃ mayhaṃ, carimo vattate bhavo;
නාගොව බන්ධනං ඡෙත්වා, විහරාමි අනාසවො.
Nāgova bandhanaṃ chetvā, viharāmi anāsavo.
29.
29.
‘‘කිලෙසා ඣාපිතා මය්හං, භවා සබ්බෙ සමූහතා;
‘‘Kilesā jhāpitā mayhaṃ, bhavā sabbe samūhatā;
නාගොව බන්ධනං ඡෙත්වා, විහරාමි අනාසවො.
Nāgova bandhanaṃ chetvā, viharāmi anāsavo.
30.
30.
‘‘ස්වාගතං වත මෙ ආසි, මම බුද්ධස්ස සන්තිකෙ;
‘‘Svāgataṃ vata me āsi, mama buddhassa santike;
තිස්සො විජ්ජා අනුප්පත්තා, කතං බුද්ධස්ස සාසනං.
Tisso vijjā anuppattā, kataṃ buddhassa sāsanaṃ.
31.
31.
‘‘පටිසම්භිදා චතස්සො, විමොක්ඛාපි ච අට්ඨිමෙ;
‘‘Paṭisambhidā catasso, vimokkhāpi ca aṭṭhime;
ඡළභිඤ්ඤා සච්ඡිකතා, කතං බුද්ධස්ස සාසනං’’.
Chaḷabhiññā sacchikatā, kataṃ buddhassa sāsanaṃ’’.
ඉත්ථං සුදං ආයස්මා භද්දාලිත්ථෙරො ඉමා ගාථායො අභාසිත්ථාති.
Itthaṃ sudaṃ āyasmā bhaddālitthero imā gāthāyo abhāsitthāti.
භද්දාලිත්ථෙරස්සාපදානං පඨමං.
Bhaddālittherassāpadānaṃ paṭhamaṃ.
Footnotes:
