| Library / Tipiṭaka / তিপিটক • Tipiṭaka / থেরীগাথাপাল়ি • Therīgāthāpāḷi |
৪. চতুক্কনিপাতো
4. Catukkanipāto
১. ভদ্দাকাপিলানীথেরীগাথা
1. Bhaddākāpilānītherīgāthā
৬৩.
63.
‘‘পুত্তো বুদ্ধস্স দাযাদো, কস্সপো সুসমাহিতো।
‘‘Putto buddhassa dāyādo, kassapo susamāhito;
পুব্বেনিৰাসং যোৰেদি, সগ্গাপাযঞ্চ পস্সতি॥
Pubbenivāsaṃ yovedi, saggāpāyañca passati.
৬৪.
64.
‘‘অথো জাতিক্খযং পত্তো, অভিঞ্ঞাৰোসিতো মুনি।
‘‘Atho jātikkhayaṃ patto, abhiññāvosito muni;
এতাহি তীহি ৰিজ্জাহি, তেৰিজ্জো হোতি ব্রাহ্মণো॥
Etāhi tīhi vijjāhi, tevijjo hoti brāhmaṇo.
৬৫.
65.
‘‘তথেৰ ভদ্দা কাপিলানী, তেৰিজ্জা মচ্চুহাযিনী।
‘‘Tatheva bhaddā kāpilānī, tevijjā maccuhāyinī;
ধারেতি অন্তিমং দেহং, জেত্ৰা মারং সৰাহনং॥
Dhāreti antimaṃ dehaṃ, jetvā māraṃ savāhanaṃ.
৬৬.
66.
‘‘দিস্ৰা আদীনৰং লোকে, উভো পব্বজিতা মযং।
‘‘Disvā ādīnavaṃ loke, ubho pabbajitā mayaṃ;
ত্যম্হ খীণাসৰা দন্তা, সীতিভূতম্হ নিব্বুতা’’তি॥
Tyamha khīṇāsavā dantā, sītibhūtamha nibbutā’’ti.
… ভদ্দা কাপিলানী থেরী…।
… Bhaddā kāpilānī therī….
চতুক্কনিপাতো নিট্ঠিতো।
Catukkanipāto niṭṭhito.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / থেরীগাথা-অট্ঠকথা • Therīgāthā-aṭṭhakathā / ১. ভদ্দাকাপিলানীথেরীগাথাৰণ্ণনা • 1. Bhaddākāpilānītherīgāthāvaṇṇanā
