| Library / Tipiṭaka / തിപിടക • Tipiṭaka / സംയുത്തനികായ • Saṃyuttanikāya |
൫. ബന്ധനസുത്തം
5. Bandhanasuttaṃ
൧൧൭. സാവത്ഥിനിദാനം . ‘‘ഇധ ഭിക്ഖവേ അസ്സുതവാ പുഥുജ്ജനോ അരിയാനം അദസ്സാവീ…പേ॰… സപ്പുരിസധമ്മേ അവിനീതോ രൂപം അത്തതോ സമനുപസ്സതി, രൂപവന്തം വാ അത്താനം; അത്തനി വാ രൂപം, രൂപസ്മിം വാ അത്താനം. അയം വുച്ചതി, ഭിക്ഖവേ, അസ്സുതവാ പുഥുജ്ജനോ രൂപബന്ധനബദ്ധോ സന്തരബാഹിരബന്ധനബദ്ധോ അതീരദസ്സീ അപാരദസ്സീ, ബദ്ധോ ജീയതി 1 ബദ്ധോ മീയതി ബദ്ധോ അസ്മാ ലോകാ പരം ലോകം ഗച്ഛതി. വേദനം അത്തതോ സമനുപസ്സതി…പേ॰… വേദനായ വാ അത്താനം. അയം വുച്ചതി, ഭിക്ഖവേ, അസ്സുതവാ പുഥുജ്ജനോ വേദനാബന്ധനബദ്ധോ സന്തരബാഹിരബന്ധനബദ്ധോ അതീരദസ്സീ അപാരദസ്സീ, ബദ്ധോ ജീയതി ബദ്ധോ മീയതി ബദ്ധോ അസ്മാ ലോകാ പരം ലോകം ഗച്ഛതി. സഞ്ഞം… സങ്ഖാരേ… വിഞ്ഞാണം അത്തതോ സമനുപസ്സതി…പേ॰… അയം വുച്ചതി, ഭിക്ഖവേ, അസ്സുതവാ പുഥുജ്ജനോ വിഞ്ഞാണബന്ധനബദ്ധോ സന്തരബാഹിരബന്ധനബദ്ധോ അതീരദസ്സീ അപാരദസ്സീ, ബദ്ധോ ജീയതി ബദ്ധോ മീയതി ബദ്ധോ അസ്മാ ലോകാ പരം ലോകം ഗച്ഛതി’’.
117. Sāvatthinidānaṃ . ‘‘Idha bhikkhave assutavā puthujjano ariyānaṃ adassāvī…pe… sappurisadhamme avinīto rūpaṃ attato samanupassati, rūpavantaṃ vā attānaṃ; attani vā rūpaṃ, rūpasmiṃ vā attānaṃ. Ayaṃ vuccati, bhikkhave, assutavā puthujjano rūpabandhanabaddho santarabāhirabandhanabaddho atīradassī apāradassī, baddho jīyati 2 baddho mīyati baddho asmā lokā paraṃ lokaṃ gacchati. Vedanaṃ attato samanupassati…pe… vedanāya vā attānaṃ. Ayaṃ vuccati, bhikkhave, assutavā puthujjano vedanābandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati. Saññaṃ… saṅkhāre… viññāṇaṃ attato samanupassati…pe… ayaṃ vuccati, bhikkhave, assutavā puthujjano viññāṇabandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati’’.
‘‘സുതവാ ച ഖോ, ഭിക്ഖവേ, അരിയസാവകോ അരിയാനം ദസ്സാവീ…പേ॰… സപ്പുരിസധമ്മേ സുവിനീതോ ന രൂപം അത്തതോ സമനുപസ്സതി, ന രൂപവന്തം വാ അത്താനം; ന അത്തനി വാ രൂപം, ന രൂപസ്മിം വാ അത്താനം. അയം വുച്ചതി, ഭിക്ഖവേ, സുതവാ അരിയസാവകോ ന രൂപബന്ധനബദ്ധോ, ന സന്തരബാഹിരബന്ധനബദ്ധോ, തീരദസ്സീ, പാരദസ്സീ; ‘പരിമുത്തോ സോ ദുക്ഖസ്മാ’തി വദാമി. ന വേദനം അത്തതോ…പേ॰… ന സഞ്ഞം അത്തതോ…പേ॰… ന സങ്ഖാരേ അത്തതോ…പേ॰… ന വിഞ്ഞാണം അത്തതോ സമനുപസ്സതി…പേ॰… അയം വുച്ചതി, ഭിക്ഖവേ, സുതവാ അരിയസാവകോ ന വിഞ്ഞാണബന്ധനബദ്ധോ, ന സന്തരബാഹിരബന്ധനബദ്ധോ, തീരദസ്സീ, പാരദസ്സീ, ‘പരിമുത്തോ സോ ദുക്ഖസ്മാ’തി വദാമീ’’തി. പഞ്ചമം.
‘‘Sutavā ca kho, bhikkhave, ariyasāvako ariyānaṃ dassāvī…pe… sappurisadhamme suvinīto na rūpaṃ attato samanupassati, na rūpavantaṃ vā attānaṃ; na attani vā rūpaṃ, na rūpasmiṃ vā attānaṃ. Ayaṃ vuccati, bhikkhave, sutavā ariyasāvako na rūpabandhanabaddho, na santarabāhirabandhanabaddho, tīradassī, pāradassī; ‘parimutto so dukkhasmā’ti vadāmi. Na vedanaṃ attato…pe… na saññaṃ attato…pe… na saṅkhāre attato…pe… na viññāṇaṃ attato samanupassati…pe… ayaṃ vuccati, bhikkhave, sutavā ariyasāvako na viññāṇabandhanabaddho, na santarabāhirabandhanabaddho, tīradassī, pāradassī, ‘parimutto so dukkhasmā’ti vadāmī’’ti. Pañcamaṃ.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൫-൯. ബന്ധനസുത്താദിവണ്ണനാ • 5-9. Bandhanasuttādivaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൫-൯. ബന്ധനസുത്താദിവണ്ണനാ • 5-9. Bandhanasuttādivaṇṇanā
