| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
4. б̣агаб̣рахмасуд̇д̇аван̣н̣анаа
4. Bakabrahmasuttavaṇṇanā
175. ‘‘сассад̇о ад̇д̇аа жа лого жаа’’д̇и звам̣ бавад̇д̇аа д̣̇идти сассад̇ад̣̇идти. саха гааязнаад̇и саха д̇зна б̣рахмад̇д̇абхаавзна. б̣рахмадтаананд̇и ад̇д̇ано б̣рахмавад̇т̇ум̣. анижжам̣ ‘‘нижжа’’нд̇и вад̣̇ад̇и анижжад̇ааяа ад̇д̇ано абан̃н̃ааяамаанад̇д̇аа. т̇иранд̇и д̣̇ал̣хам̣, винаасаабхаавад̇о саарабхууд̇анд̇и ад̇т̇о. уббаад̣̇авибарин̣аамаабхаавад̇о сад̣̇аа виж̇ж̇амаанам̣. гзваланд̇и барибун̣н̣ам̣. д̇знааха ‘‘акан̣д̣а’’нд̇и. гзваланд̇и ваа ж̇аад̇иаад̣̇ийхи асаммиссам̣, вирахид̇анд̇и ад̇хиббааяо. уббаад̣̇аад̣̇ийнам̣ абхаавад̇о зва ажаванад̇хаммам̣. гожи ж̇ааяанаго…бз… убабаж̇ж̇анаго ваа над̇т̇и нижжабхаавад̇о таанзна сад̣̇д̇хим̣ д̇анниваасийнам̣. нижжабхааван̃хи со бадиж̇аанаад̇и. д̇иссо жхаанабхуумияод̇и д̣̇уд̇ияад̇ад̇ияажад̇уд̇т̇аж̇жхаанабхуумияо. жад̇уд̇т̇аж̇жхаанабхуумивисзсаа хи асан̃н̃асуд̣̇д̇хааваасааруббабхаваа. ниб̣б̣аананд̇и ваа зд̇т̇а ид̇и-сад̣̇д̣̇о аад̣̇иад̇т̇о, на барисамаабанад̇т̇о, д̇асмаа ‘‘саб̣б̣а’’нд̇и иминаа ‘‘асан̃н̃а…бз… бхаваа’’д̇и вуд̇д̇ам̣ сан̇г̇ан̣хаад̇и. бадиб̣аахад̇ийд̇и санд̇ам̣язва самаанам̣ аж̇аананд̇ова ‘‘над̇т̇ий’’д̇и бадигкибад̇и. згз уд̇д̇аравихаараваасино.
175. ‘‘Sassato attā ca loko cā’’ti evaṃ pavattā diṭṭhi sassatadiṭṭhi. Saha kāyenāti saha tena brahmattabhāvena. Brahmaṭṭhānanti attano brahmavatthuṃ. Aniccaṃ ‘‘nicca’’nti vadati aniccatāya attano apaññāyamānattā. Thiranti daḷhaṃ, vināsābhāvato sārabhūtanti attho. Uppādavipariṇāmābhāvato sadā vijjamānaṃ. Kevalanti paripuṇṇaṃ. Tenāha ‘‘akhaṇḍa’’nti. Kevalanti vā jātiādīhi asammissaṃ, virahitanti adhippāyo. Uppādādīnaṃ abhāvato eva acavanadhammaṃ. Koci jāyanako…pe… upapajjanako vā natthi niccabhāvato ṭhānena saddhiṃ tannivāsīnaṃ. Niccabhāvañhi so paṭijānāti. Tisso jhānabhūmiyoti dutiyatatiyacatutthajjhānabhūmiyo. Catutthajjhānabhūmivisesā hi asaññasuddhāvāsāruppabhavā. Nibbānanti vā ettha iti-saddo ādiattho, na parisamāpanattho, tasmā ‘‘sabba’’nti iminā ‘‘asañña…pe… bhavā’’ti vuttaṃ saṅgaṇhāti. Paṭibāhatīti santaṃyeva samānaṃ ajānantova ‘‘natthī’’ti paṭikkhipati. Eke uttaravihāravāsino.
хздтуубабад̇д̇игод̇и хздтаа бхуумийсу уббаннаубабад̇д̇иго. ид̣̇аани д̇амад̇т̇ам̣ виварид̇ум̣ ‘‘ануббаннз’’д̇иаад̣̇и вуд̇д̇ам̣. хздтубабад̇д̇игам̣ гад̇ваад̇и яат̇аатид̇абхуумид̇о хздтаа д̇ад̇ияаж̇жхаанабхуумияам̣ убабад̇д̇ижхаанам̣ гад̇ваа, на убарижхаанасса вияа бад̇т̇анаамад̇д̇анд̇и ад̇хиббааяо. батамагаалзд̇и д̇асмим̣ бхавз батамагаалз. ан̃н̃ааси аасаннабхаавад̇о. убхаяанд̇и д̇ам̣ д̇ам̣ ад̇д̇анаа гад̇агамман̃жзва ниб̣б̣ад̇д̇адтаанан̃жаад̇и убхаяам̣. бамуссид̇ваа ниб̣б̣ад̇д̇им̣ анубад̇хаарзнд̇о.
Heṭṭhūpapattikoti heṭṭhā bhūmīsu uppannaupapattiko. Idāni tamatthaṃ vivarituṃ ‘‘anuppanne’’tiādi vuttaṃ. Heṭṭhupapattikaṃ katvāti yathāṭhitabhūmito heṭṭhā tatiyajjhānabhūmiyaṃ upapattijhānaṃ katvā, na uparijhānassa viya patthanāmattanti adhippāyo. Paṭhamakāleti tasmiṃ bhave paṭhamakāle. Aññāsi āsannabhāvato. Ubhayanti taṃ taṃ attanā katakammañceva nibbattaṭṭhānañcāti ubhayaṃ. Pamussitvā nibbattiṃ anupadhārento.
авиж̇ж̇ааяа г̇ад̇од̇и авиж̇ж̇ааяа саха бавад̇д̇о. сахаяог̇з хи ид̣̇ам̣ гаран̣аважанам̣. д̇знааха ‘‘саманнааг̇ад̇о’’д̇и. ан̃н̃аан̣ийд̇и авид̣̇ваа. бан̃н̃аажагкувирахад̇о анд̇хийбхууд̇о, анд̇хабхаавам̣ аабаннод̇и ад̇т̇о. анааг̇ад̇з сад̣̇д̣̇о ход̇ааяам̣ ‘‘вагкад̇ий’’д̇и яад̇расад̣̇д̣̇абаяог̇зна, ад̇т̇о бана вад̇д̇амаанагаалиго. д̇знааха ‘‘бхан̣ад̇ий’’д̇и. д̇знааха ‘‘яад̇раа’’д̇иаад̣̇и.
Avijjāya gatoti avijjāya saha pavatto. Sahayoge hi idaṃ karaṇavacanaṃ. Tenāha ‘‘samannāgato’’ti. Aññāṇīti avidvā. Paññācakkhuvirahato andhībhūto, andhabhāvaṃ āpannoti attho. Anāgate saddo hotāyaṃ ‘‘vakkhatī’’ti yatrasaddapayogena, attho pana vattamānakāliko. Tenāha ‘‘bhaṇatī’’ti. Tenāha ‘‘yatrā’’tiādi.
маг̇г̇ажород̇и маг̇г̇абариб̣унд̇хагажоро. санд̇аж̇ж̇ияамаанод̇и ‘‘авиж̇ж̇ааг̇ад̇о вад̇а, бхо, б̣аго б̣рахмаа’’д̇иаад̣̇инаа санд̇аж̇ж̇ияамаано. сад̇им̣ лабхид̇ваад̇и д̇знзва санд̇аж̇ж̇анзна яонисо уммуж̇ж̇ид̇ваа буримаж̇аад̇ивисаяам̣ сад̇им̣ лабхид̇ваа. ниббийл̣ид̇угаамод̇и гхам̣сзд̇угаамо д̣̇осам̣ д̣̇ассзд̇угаамо ‘‘ид̣̇ам̣ басса яааван̃жа д̇з абарад̣̇д̇ха’’нд̇и. бун̃н̃агаммаад̇и бун̃н̃агаарино. взд̣̇зхи н̃аан̣зхи г̇ад̇ад̇д̇аа бавад̇д̇ад̇д̇аа. анд̇имаа б̣рахмубабад̇д̇ийд̇и саб̣б̣абажчимаа б̣рахмабхааваббад̇д̇и. асмаабхиж̇аббанд̇ийд̇и асмз абхиж̇аббанд̇и. ааяуван̣н̣аад̣̇ивасзна б̣руухид̇аг̇ун̣ад̇д̇аа б̣рахмаа. ан̃н̃зхи маханд̇аа б̣рахмаа махааб̣рахмаа. абхибхууд̇и д̇ам̣ б̣рахмалогам̣ ж̇здтагабхаавзна абхибхавид̇ваа тид̇о. анабхибхууд̇од̇и ан̃н̃зхи на абхибхууд̇о. ан̃н̃ад̣̇ад̇т̇ууд̇и згам̣саважанамзд̇ам̣. д̣̇ассанавасзна д̣̇асо, саб̣б̣ам̣ бассад̇ийд̇и ад̇хиббааяо. васавад̇д̇ийд̇и саб̣б̣аж̇анам̣ васз вад̇д̇зд̇и. иссарод̇и логз иссаро. гад̇д̇аа ниммаад̇аад̇и логасса гад̇д̇аа ниммаад̇аа. сздто саж̇ид̇аад̇и аяам̣ логасса уд̇д̇амо сам̣вибхаж̇ид̇аа жа. васий бид̇аа бхууд̇абхаб̣яаананд̇и аажин̣н̣авасид̇д̇аа васий, аяам̣ бид̇аа бхууд̇аанам̣ ниб̣б̣ад̇д̇аанам̣ бхаб̣яаанам̣ самбхавзсийнанд̇и бад̇т̇знд̇и вигад̇т̇знд̇и бихзнд̇и маанзнд̇и.
Maggacoroti maggaparibundhakacoro. Santajjiyamānoti ‘‘avijjāgato vata, bho, bako brahmā’’tiādinā santajjiyamāno. Satiṃ labhitvāti teneva santajjanena yoniso ummujjitvā purimajātivisayaṃ satiṃ labhitvā. Nippīḷitukāmoti ghaṃsetukāmo dosaṃ dassetukāmo ‘‘idaṃ passa yāvañca te aparaddha’’nti. Puññakammāti puññakārino. Vedehi ñāṇehi gatattā pavattattā. Antimā brahmupapattīti sabbapacchimā brahmabhāvappatti. Asmābhijappantīti asme abhijappanti. Āyuvaṇṇādivasena brūhitaguṇattā brahmā. Aññehi mahantā brahmā mahābrahmā. Abhibhūti taṃ brahmalokaṃ jeṭṭhakabhāvena abhibhavitvā ṭhito. Anabhibhūtoti aññehi na abhibhūto. Aññadatthūti ekaṃsavacanametaṃ. Dassanavasena daso, sabbaṃ passatīti adhippāyo. Vasavattīti sabbajanaṃ vase vatteti. Issaroti loke issaro. Kattā nimmātāti lokassa kattā nimmātā. Seṭṭho sajitāti ayaṃ lokassa uttamo saṃvibhajitā ca. Vasī pitā bhūtabhabyānanti āciṇṇavasittā vasī, ayaṃ pitā bhūtānaṃ nibbattānaṃ bhabyānaṃ sambhavesīnanti patthenti vikatthenti pihenti mānenti.
зд̇анд̇и вибарийд̇асан̃н̃аавасзна ‘‘ид̣̇ам̣ нижжам̣ ид̣̇ам̣ д̇хувам̣ ид̣̇ам̣ сассад̇а’’нд̇иаад̣̇инаа вуд̇д̇ам̣ зд̇ам̣ аббам̣ барид̇д̇аганд̇и д̇ам̣ бхаг̇аваа барижчинд̣̇ид̇ваа д̣̇ассзд̇и. д̇ам̣ бана ‘‘згасмим̣ госалагз д̇илаваахз вассасад̇з вассасад̇з згзгад̇илуд̣̇д̇хаарз гаяирамаанз д̇илаани баригкаяам̣ г̇ажчанд̇и, на д̇взва аб̣б̣уд̣̇з ааяуу’’д̇и звам̣ вуд̇д̇о аб̣б̣уд̣̇о, д̇ам̣васзна вийсад̇иг̇ун̣ам̣ нираб̣б̣уд̣̇о, д̇зсам̣ нираб̣б̣уд̣̇аанам̣ васзна нираб̣б̣уд̣̇асад̇асахассам̣. аяамзд̇т̇а сан̇кзбо, вид̇т̇аарад̇о бана бад̣̇умз ааяуно вассаг̇ан̣анаа имасмим̣язва сам̣яуд̇д̇з барад̇о ааг̇амиссад̇и. ананд̇ад̣̇ассийд̇и ананд̇асса н̃зяяасса анавасзсад̇о д̣̇ассий. вад̇асийлавад̇д̇анд̇и самаад̣̇аанавасзна вад̇абхууд̇ам̣ жаарид̇д̇асийлавасзна самаажин̣н̣ад̇д̇аа сийлавад̇д̇ам̣. д̇ам̣ бана згамзваад̇и ааха ‘‘сийламзваа’’д̇и.
Etanti viparītasaññāvasena ‘‘idaṃ niccaṃ idaṃ dhuvaṃ idaṃ sassata’’ntiādinā vuttaṃ etaṃ appaṃ parittakanti taṃ bhagavā paricchinditvā dasseti. Taṃ pana ‘‘ekasmiṃ kosalake tilavāhe vassasate vassasate ekekatiluddhāre kayiramāne tilāni parikkhayaṃ gacchanti, na tveva abbude āyū’’ti evaṃ vutto abbudo, taṃvasena vīsatiguṇaṃ nirabbudo, tesaṃ nirabbudānaṃ vasena nirabbudasatasahassaṃ. Ayamettha saṅkhepo, vitthārato pana padume āyuno vassagaṇanā imasmiṃyeva saṃyutte parato āgamissati. Anantadassīti anantassa ñeyyassa anavasesato dassī. Vatasīlavattanti samādānavasena vatabhūtaṃ cārittasīlavasena samāciṇṇattā sīlavattaṃ. Taṃ pana ekamevāti āha ‘‘sīlamevā’’ti.
абааязсийд̇и зд̇т̇а яад̣̇аа со бибаасид̇з мануссз баанийяам̣ бааязси, д̇ам̣ самуд̣̇ааг̇амад̇о бадтааяа д̣̇ассзд̇ум̣ ‘‘д̇ад̇раа’’д̇иаад̣̇и аарад̣̇д̇хам̣. буб̣б̣зд̇и буримаж̇аад̇ияам̣. зса б̣рахмаа ‘‘ж̇араамаран̣асса анд̇ам̣ гариссаамий’’д̇и аж̇жхаасаяавасзна жхаанам̣ ниб̣б̣ад̇д̇зд̇ваа б̣рахмалогз ниб̣б̣ад̇д̇и, со д̇ад̇т̇а ниб̣б̣аанасан̃н̃ий ахоси. жхаанарад̇ияаа вийд̇инаамзд̇ийд̇и д̇ад̣̇аа д̇ассаа гирияааяа авижчзд̣̇ад̇о бавад̇д̇им̣ убаад̣̇ааяа вад̇д̇амаанабаяог̇о. рад̇д̇анд̇хагаарз бурад̇о бурад̇о г̇ажчанд̇асса сагадасса ануссаран̣авасзна г̇ажчанд̇аанам̣ сагадаанам̣ нивад̇д̇анам̣ ход̇ийд̇и ‘‘саб̣б̣асагадаани д̇ат̇зва нивад̇д̇ид̇ваа’’д̇и вуд̇д̇ам̣.
Apāyesīti ettha yadā so pipāsite manusse pānīyaṃ pāyesi, taṃ samudāgamato paṭṭhāya dassetuṃ ‘‘tatrā’’tiādi āraddhaṃ. Pubbeti purimajātiyaṃ. Esa brahmā ‘‘jarāmaraṇassa antaṃ karissāmī’’ti ajjhāsayavasena jhānaṃ nibbattetvā brahmaloke nibbatti, so tattha nibbānasaññī ahosi. Jhānaratiyā vītināmetīti tadā tassā kiriyāya avicchedato pavattiṃ upādāya vattamānapayogo. Rattandhakāre purato purato gacchantassa sakaṭassa anussaraṇavasena gacchantānaṃ sakaṭānaṃ nivattanaṃ hotīti ‘‘sabbasakaṭāni tatheva nivattitvā’’ti vuttaṃ.
гаммасаж̇ж̇аад̇и яуд̣̇д̇хасаж̇ж̇аа. вилобанд̇и вилуд̇д̇абхан̣д̣ам̣. зн̣игууласминд̇и зд̇т̇а ‘‘банихад̇ааяа нижжаг̇ан̇г̇ааяа наама’’нд̇и гзжи. ‘‘зн̣имиг̇аб̣ахулад̇ааяа со г̇ан̇г̇ааяа д̇ийраббад̣̇зсо зн̣игууланд̇и вуд̇д̇а’’нд̇и абарз. г̇ан̇г̇зяяагод̇и г̇ан̇г̇аасанниваасий.
Kammasajjāti yuddhasajjā. Vilopanti viluttabhaṇḍaṃ. Eṇikūlasminti ettha ‘‘panihatāya niccagaṅgāya nāma’’nti keci. ‘‘Eṇimigabahulatāya so gaṅgāya tīrappadeso eṇikūlanti vutta’’nti apare. Gaṅgeyyakoti gaṅgāsannivāsī.
б̣ад̣̇д̇хажарод̇и бадиб̣ад̣̇д̇хажарияо. д̇знааха ‘‘анд̇зваасиго’’д̇и. яасмаа б̣уд̣̇д̇хо саб̣б̣ан̃н̃уу, д̇асмаа ан̃н̃ааси, ид̇ха маяхам̣ бамудтан̃жа саб̣б̣ам̣ ж̇аанаасийд̇и ад̇хиббааяо. саб̣б̣ам̣ б̣рахмалогам̣ обхаасаяанд̇о саб̣б̣амбимам̣ б̣рахмалогам̣ бхаг̇аваа обхаасам̣ абхибхавид̇ваа анан̃н̃асаад̇хааран̣ам̣ ад̇д̇ано обхаасам̣ обхаасзнд̇о д̇идтад̇и.
Baddhacaroti paṭibaddhacariyo. Tenāha ‘‘antevāsiko’’ti. Yasmā buddho sabbaññū, tasmā aññāsi, idha mayhaṃ pamuṭṭhañca sabbaṃ jānāsīti adhippāyo. Sabbaṃ brahmalokaṃ obhāsayanto sabbampimaṃ brahmalokaṃ bhagavā obhāsaṃ abhibhavitvā anaññasādhāraṇaṃ attano obhāsaṃ obhāsento tiṭṭhati.
б̣агаб̣рахмасуд̇д̇аван̣н̣анаа нидтид̇аа.
Bakabrahmasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 4. б̣агаб̣рахмасуд̇д̇ам̣ • 4. Bakabrahmasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 4. б̣агаб̣рахмасуд̇д̇аван̣н̣анаа • 4. Bakabrahmasuttavaṇṇanā
