| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၀. ဗာဟိရင္ဂသုတ္တံ
10. Bāhiraṅgasuttaṃ
၂၃၁. ‘‘ဗာဟိရံ , ဘိက္ခဝေ, အင္ဂန္တိ ကရိတ္ဝာ နာညံ ဧကင္ဂမ္ပိ သမနုပသ္သာမိ သတ္တန္နံ ဗောဇ္ဈင္ဂာနံ ဥပ္ပာဒာယ, ယထယိဒံ – ဘိက္ခဝေ, ကလ္ယာဏမိတ္တတာ။ ကလ္ယာဏမိတ္တသ္သေတံ, ဘိက္ခဝေ, ဘိက္ခုနော ပာဋိကင္ခံ – သတ္တ ဗောဇ္ဈင္ဂေ ဘာဝေသ္သတိ, သတ္တ ဗောဇ္ဈင္ဂေ ဗဟုလီကရိသ္သတိ။ ကထဉ္စ, ဘိက္ခဝေ, ဘိက္ခု ကလ္ယာဏမိတ္တော သတ္တ ဗောဇ္ဈင္ဂေ ဘာဝေတိ, သတ္တ ဗောဇ္ဈင္ဂေ ဗဟုလီကရောတိ? ဣဓ, ဘိက္ခဝေ, ဘိက္ခု သတိသမ္ဗောဇ္ဈင္ဂံ ဘာဝေတိ ဝိဝေကနိသ္သိတံ။ပေ.။ ဥပေက္ခာသမ္ဗောဇ္ဈင္ဂံ ဘာဝေတိ ဝိဝေကနိသ္သိတံ ဝိရာဂနိသ္သိတံ နိရောဓနိသ္သိတံ ဝောသ္သဂ္ဂပရိဏာမိံ။ ဧဝံ ခော, ဘိက္ခဝေ, ဘိက္ခု ကလ္ယာဏမိတ္တော သတ္တ ဗောဇ္ဈင္ဂေ ဘာဝေတိ, သတ္တ ဗောဇ္ဈင္ဂေ ဗဟုလီကရောတီ’’တိ။ ဒသမံ။
231. ‘‘Bāhiraṃ , bhikkhave, aṅganti karitvā nāññaṃ ekaṅgampi samanupassāmi sattannaṃ bojjhaṅgānaṃ uppādāya, yathayidaṃ – bhikkhave, kalyāṇamittatā. Kalyāṇamittassetaṃ, bhikkhave, bhikkhuno pāṭikaṅkhaṃ – satta bojjhaṅge bhāvessati, satta bojjhaṅge bahulīkarissati. Kathañca, bhikkhave, bhikkhu kalyāṇamitto satta bojjhaṅge bhāveti, satta bojjhaṅge bahulīkaroti? Idha, bhikkhave, bhikkhu satisambojjhaṅgaṃ bhāveti vivekanissitaṃ…pe… upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ kho, bhikkhave, bhikkhu kalyāṇamitto satta bojjhaṅge bhāveti, satta bojjhaṅge bahulīkarotī’’ti. Dasamaṃ.
စက္ကဝတ္တိဝဂ္ဂော ပဉ္စမော။
Cakkavattivaggo pañcamo.
တသ္သုဒ္ဒာနံ –
Tassuddānaṃ –
ဝိဓာ စက္ကဝတ္တိ မာရော၊ ဒုပ္ပညော ပညဝေန စ။
Vidhā cakkavatti māro, duppañño paññavena ca;
ဒလိဒ္ဒော အဒလိဒ္ဒော စ၊ အာဒိစ္စင္ဂေန တေ ဒသာတိ။
Daliddo adaliddo ca, ādiccaṅgena te dasāti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄-၁၀. ဒုပ္ပညသုတ္တာဒိဝဏ္ဏနာ • 4-10. Duppaññasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄-၁၀. ဒုပ္ပညသုတ္တာဒိဝဏ္ဏနာ • 4-10. Duppaññasuttādivaṇṇanā
