| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၂. ဗာဟိရာနတ္တဟေတုသုတ္တံ
12. Bāhirānattahetusuttaṃ
၁၄၅. ‘‘ရူပာ , ဘိက္ခဝေ, အနတ္တာ။ ယောပိ ဟေတု, ယောပိ ပစ္စယော ရူပာနံ ဥပ္ပာဒာယ, သောပိ အနတ္တာ။ အနတ္တသမ္ဘူတာ, ဘိက္ခဝေ, ရူပာ ကုတော အတ္တာ ဘဝိသ္သန္တိ! သဒ္ဒာ။ ဂန္ဓာ။ ရသာ။ ဖောဋ္ဌဗ္ဗာ။ ဓမ္မာ အနတ္တာ။ ယောပိ ဟေတု, ယောပိ ပစ္စယော ဓမ္မာနံ ဥပ္ပာဒာယ, သောပိ အနတ္တာ။ အနတ္တသမ္ဘူတာ, ဘိက္ခဝေ, ဓမ္မာ ကုတော အတ္တာ ဘဝိသ္သန္တိ! ဧဝံ ပသ္သံ , ဘိက္ခဝေ, သုတဝာ အရိယသာဝကော ရူပေသုပိ နိဗ္ဗိန္ဒတိ, သဒ္ဒေသုပိ။ ဂန္ဓေသုပိ။ ရသေသုပိ။ ဖောဋ္ဌဗ္ဗေသုပိ။ ဓမ္မေသုပိ နိဗ္ဗိန္ဒတိ။ နိဗ္ဗိန္ဒံ ဝိရဇ္ဇတိ; ဝိရာဂာ ဝိမုစ္စတိ; ဝိမုတ္တသ္မိံ ဝိမုတ္တမိတိ ဉာဏံ ဟောတိ။ ‘ခီဏာ ဇာတိ, ဝုသိတံ ဗ္ရဟ္မစရိယံ, ကတံ ကရဏီယံ, နာပရံ ဣတ္ထတ္တာယာ’တိ ပဇာနာတီ’’တိ။ ဒ္ဝာဒသမံ။
145. ‘‘Rūpā , bhikkhave, anattā. Yopi hetu, yopi paccayo rūpānaṃ uppādāya, sopi anattā. Anattasambhūtā, bhikkhave, rūpā kuto attā bhavissanti! Saddā… gandhā… rasā… phoṭṭhabbā… dhammā anattā. Yopi hetu, yopi paccayo dhammānaṃ uppādāya, sopi anattā. Anattasambhūtā, bhikkhave, dhammā kuto attā bhavissanti! Evaṃ passaṃ , bhikkhave, sutavā ariyasāvako rūpesupi nibbindati, saddesupi… gandhesupi… rasesupi… phoṭṭhabbesupi… dhammesupi nibbindati. Nibbindaṃ virajjati; virāgā vimuccati; vimuttasmiṃ vimuttamiti ñāṇaṃ hoti. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānātī’’ti. Dvādasamaṃ.
ဒေဝဒဟဝဂ္ဂော စုဒ္ဒသမော။
Devadahavaggo cuddasamo.
တသ္သုဒ္ဒာနံ –
Tassuddānaṃ –
ဒေဝဒဟော ခဏော ရူပာ၊ ဒ္ဝေ နတုမ္ဟာကမေဝ စ။
Devadaho khaṇo rūpā, dve natumhākameva ca;
ဟေတုနာပိ တယော ဝုတ္တာ၊ ဒုဝေ အဇ္ဈတ္တဗာဟိရာတိ။
Hetunāpi tayo vuttā, duve ajjhattabāhirāti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄-၁၂. ဒုတိယရူပာရာမသုတ္တာဒိဝဏ္ဏနာ • 4-12. Dutiyarūpārāmasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄-၁၂. ဒုတိယရူပာရာမသုတ္တာဒိဝဏ္ဏနာ • 4-12. Dutiyarūpārāmasuttādivaṇṇanā
