| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๔. อโยนิโสมนสิการสุตฺตํ
4. Ayonisomanasikārasuttaṃ
๒๐๕. ‘‘อโยนิโส, ภิกฺขเว, มนสิกโรโต อนุปฺปโนฺน เจว กามจฺฉโนฺท อุปฺปชฺชติ, อุปฺปโนฺน จ กามจฺฉโนฺท ภิโยฺยภาวาย เวปุลฺลาย สํวตฺตติ; อนุปฺปโนฺน เจว พฺยาปาโท อุปฺปชฺชติ, อุปฺปโนฺน จ พฺยาปาโท ภิโยฺยภาวาย เวปุลฺลาย สํวตฺตติ; อนุปฺปนฺนเญฺจว ถินมิทฺธํ อุปฺปชฺชติ, อุปฺปนฺนญฺจ ถินมิทฺธํ ภิโยฺยภาวาย เวปุลฺลาย สํวตฺตติ; อนุปฺปนฺนเญฺจว อุทฺธจฺจกุกฺกุจฺจํ อุปฺปชฺชติ, อุปฺปนฺนญฺจ อุทฺธจฺจกุกฺกุจฺจํ ภิโยฺยภาวาย เวปุลฺลาย สํวตฺตติ; อนุปฺปนฺนา เจว วิจิกิจฺฉา อุปฺปชฺชติ, อุปฺปนฺนา จ วิจิกิจฺฉา ภิโยฺยภาวาย เวปุลฺลาย สํวตฺตติ; อนุปฺปโนฺน เจว สติสโมฺพชฺฌโงฺค นุปฺปชฺชติ, อุปฺปโนฺน จ สติสโมฺพชฺฌโงฺค นิรุชฺฌติ…เป.… อนุปฺปโนฺน เจว อุเปกฺขาสโมฺพชฺฌโงฺค นุปฺปชฺชติ, อุปฺปโนฺน จ อุเปกฺขาสโมฺพชฺฌโงฺค นิรุชฺฌติฯ
205. ‘‘Ayoniso, bhikkhave, manasikaroto anuppanno ceva kāmacchando uppajjati, uppanno ca kāmacchando bhiyyobhāvāya vepullāya saṃvattati; anuppanno ceva byāpādo uppajjati, uppanno ca byāpādo bhiyyobhāvāya vepullāya saṃvattati; anuppannañceva thinamiddhaṃ uppajjati, uppannañca thinamiddhaṃ bhiyyobhāvāya vepullāya saṃvattati; anuppannañceva uddhaccakukkuccaṃ uppajjati, uppannañca uddhaccakukkuccaṃ bhiyyobhāvāya vepullāya saṃvattati; anuppannā ceva vicikicchā uppajjati, uppannā ca vicikicchā bhiyyobhāvāya vepullāya saṃvattati; anuppanno ceva satisambojjhaṅgo nuppajjati, uppanno ca satisambojjhaṅgo nirujjhati…pe… anuppanno ceva upekkhāsambojjhaṅgo nuppajjati, uppanno ca upekkhāsambojjhaṅgo nirujjhati.
โยนิโส จ โข, ภิกฺขเว, มนสิกโรโต อนุปฺปโนฺน เจว กามจฺฉโนฺท นุปฺปชฺชติ, อุปฺปโนฺน จ กามจฺฉโนฺท ปหียติ; อนุปฺปโนฺน เจว พฺยาปาโท นุปฺปชฺชติ, อุปฺปโนฺน จ พฺยาปาโท ปหียติ; อนุปฺปนฺนเญฺจว ถินมิทฺธํ นุปฺปชฺชติ, อุปฺปนฺนญฺจ ถินมิทฺธํ ปหียติ; อนุปฺปนฺนเญฺจว อุทฺธจฺจกุกฺกุจฺจํ นุปฺปชฺชติ, อุปฺปนฺนญฺจ อุทฺธจฺจกุกฺกุจฺจํ ปหียติ; อนุปฺปนฺนา เจว วิจิกิจฺฉา นุปฺปชฺชติ, อุปฺปนฺนา จ วิจิกิจฺฉา ปหียติฯ
Yoniso ca kho, bhikkhave, manasikaroto anuppanno ceva kāmacchando nuppajjati, uppanno ca kāmacchando pahīyati; anuppanno ceva byāpādo nuppajjati, uppanno ca byāpādo pahīyati; anuppannañceva thinamiddhaṃ nuppajjati, uppannañca thinamiddhaṃ pahīyati; anuppannañceva uddhaccakukkuccaṃ nuppajjati, uppannañca uddhaccakukkuccaṃ pahīyati; anuppannā ceva vicikicchā nuppajjati, uppannā ca vicikicchā pahīyati.
‘‘อนุปฺปโนฺน เจว สติสโมฺพชฺฌโงฺค อุปฺปชฺชติ, อุปฺปโนฺน จ สติสโมฺพชฺฌโงฺค ภาวนาปาริปูริํ คจฺฉติ…เป.… อนุปฺปโนฺน เจว อุเปกฺขาสโมฺพชฺฌโงฺค อุปฺปชฺชติ, อุปฺปโนฺน จ อุเปกฺขาสโมฺพชฺฌโงฺค ภาวนาปาริปูริํ คจฺฉตี’’ติฯ จตุตฺถํฯ
‘‘Anuppanno ceva satisambojjhaṅgo uppajjati, uppanno ca satisambojjhaṅgo bhāvanāpāripūriṃ gacchati…pe… anuppanno ceva upekkhāsambojjhaṅgo uppajjati, uppanno ca upekkhāsambojjhaṅgo bhāvanāpāripūriṃ gacchatī’’ti. Catutthaṃ.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๓-๕. ฐานิยสุตฺตาทิวณฺณนา • 3-5. Ṭhāniyasuttādivaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๓-๕. ฐานิยสุตฺตาทิวณฺณนา • 3-5. Ṭhāniyasuttādivaṇṇanā
