| Library / Tipiṭaka / ತಿಪಿಟಕ • Tipiṭaka / ಚರಿಯಾಪಿಟಕಪಾಳಿ • Cariyāpiṭakapāḷi |
೩. ಅಯೋಘರಚರಿಯಾ
3. Ayogharacariyā
೨೪.
24.
‘‘ಪುನಾಪರಂ ಯದಾ ಹೋಮಿ, ಕಾಸಿರಾಜಸ್ಸ ಅತ್ರಜೋ।
‘‘Punāparaṃ yadā homi, kāsirājassa atrajo;
ಅಯೋಘರಮ್ಹಿ ಸಂವಡ್ಢೋ, ನಾಮೇನಾಸಿ ಅಯೋಘರೋ॥
Ayogharamhi saṃvaḍḍho, nāmenāsi ayogharo.
೨೫.
25.
‘‘ದುಕ್ಖೇನ ಜೀವಿತೋ ಲದ್ಧೋ, ಸಂಪೀಳೇ ಪತಿಪೋಸಿತೋ।
‘‘Dukkhena jīvito laddho, saṃpīḷe patiposito;
ಅಜ್ಜೇವ ಪುತ್ತ ಪಟಿಪಜ್ಜ, ಕೇವಲಂ ವಸುಧಂ ಇಮಂ॥
Ajjeva putta paṭipajja, kevalaṃ vasudhaṃ imaṃ.
೨೬.
26.
‘‘ಸರಟ್ಠಕಂ ಸನಿಗಮಂ, ಸಜನಂ ವನ್ದಿತ್ವ ಖತ್ತಿಯಂ।
‘‘Saraṭṭhakaṃ sanigamaṃ, sajanaṃ vanditva khattiyaṃ;
ಅಞ್ಜಲಿಂ ಪಗ್ಗಹೇತ್ವಾನ, ಇದಂ ವಚನಮಬ್ರವಿಂ॥
Añjaliṃ paggahetvāna, idaṃ vacanamabraviṃ.
೨೭.
27.
‘‘‘ಯೇ ಕೇಚಿ ಮಹಿಯಾ ಸತ್ತಾ, ಹೀನಮುಕ್ಕಟ್ಠಮಜ್ಝಿಮಾ।
‘‘‘Ye keci mahiyā sattā, hīnamukkaṭṭhamajjhimā;
ನಿರಾರಕ್ಖಾ ಸಕೇ ಗೇಹೇ, ವಡ್ಢನ್ತಿ ಸಕಞಾತಿಭಿ॥
Nirārakkhā sake gehe, vaḍḍhanti sakañātibhi.
೨೮.
28.
‘‘‘ಇದಂ ಲೋಕೇ ಉತ್ತರಿಯಂ, ಸಂಪೀಳೇ ಮಮ ಪೋಸನಂ।
‘‘‘Idaṃ loke uttariyaṃ, saṃpīḷe mama posanaṃ;
ಅಯೋಘರಮ್ಹಿ ಸಂವಡ್ಢೋ, ಅಪ್ಪಭೇ ಚನ್ದಸೂರಿಯೇ॥
Ayogharamhi saṃvaḍḍho, appabhe candasūriye.
೨೯.
29.
‘‘‘ಪೂತಿಕುಣಪಸಮ್ಪುಣ್ಣಾ, ಮುಚ್ಚಿತ್ವಾ ಮಾತು ಕುಚ್ಛಿತೋ।
‘‘‘Pūtikuṇapasampuṇṇā, muccitvā mātu kucchito;
ತತೋ ಘೋರತರೇ ದುಕ್ಖೇ, ಪುನ ಪಕ್ಖಿತ್ತಯೋಘರೇ॥
Tato ghoratare dukkhe, puna pakkhittayoghare.
೩೦.
30.
‘‘‘ಯದಿಹಂ ತಾದಿಸಂ ಪತ್ವಾ, ದುಕ್ಖಂ ಪರಮದಾರುಣಂ।
‘‘‘Yadihaṃ tādisaṃ patvā, dukkhaṃ paramadāruṇaṃ;
೩೧.
31.
‘‘‘ಉಕ್ಕಣ್ಠಿತೋಮ್ಹಿ ಕಾಯೇನ, ರಜ್ಜೇನಮ್ಹಿ ಅನತ್ಥಿಕೋ।
‘‘‘Ukkaṇṭhitomhi kāyena, rajjenamhi anatthiko;
ನಿಬ್ಬುತಿಂ ಪರಿಯೇಸಿಸ್ಸಂ, ಯತ್ಥ ಮಂ ಮಚ್ಚು ನ ಮದ್ದಿಯೇ’॥
Nibbutiṃ pariyesissaṃ, yattha maṃ maccu na maddiye’.
೩೨.
32.
‘‘ಏವಾಹಂ ಚಿನ್ತಯಿತ್ವಾನ, ವಿರವನ್ತೇ ಮಹಾಜನೇ।
‘‘Evāhaṃ cintayitvāna, viravante mahājane;
ನಾಗೋವ ಬನ್ಧನಂ ಛೇತ್ವಾ, ಪಾವಿಸಿಂ ಕಾನನಂ ವನಂ॥
Nāgova bandhanaṃ chetvā, pāvisiṃ kānanaṃ vanaṃ.
೩೩.
33.
‘‘ಮಾತಾಪಿತಾ ನ ಮೇ ದೇಸ್ಸಾ, ನಪಿ ಮೇ ದೇಸ್ಸಂ ಮಹಾಯಸಂ।
‘‘Mātāpitā na me dessā, napi me dessaṃ mahāyasaṃ;
ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ರಜ್ಜಂ ಪರಿಚ್ಚಜಿ’’ನ್ತಿ॥
Sabbaññutaṃ piyaṃ mayhaṃ, tasmā rajjaṃ pariccaji’’nti.
ಅಯೋಘರಚರಿಯಂ ತತಿಯಂ।
Ayogharacariyaṃ tatiyaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಚರಿಯಾಪಿಟಕ-ಅಟ್ಠಕಥಾ • Cariyāpiṭaka-aṭṭhakathā / ೩. ಅಯೋಘರಚರಿಯಾವಣ್ಣನಾ • 3. Ayogharacariyāvaṇṇanā
