| Library / Tipiṭaka / तिपिटक • Tipiṭaka / चरियापिटकपाळि • Cariyāpiṭakapāḷi |
३. अयोघरचरिया
3. Ayogharacariyā
२४.
24.
‘‘पुनापरं यदा होमि, कासिराजस्स अत्रजो।
‘‘Punāparaṃ yadā homi, kāsirājassa atrajo;
अयोघरम्हि संवड्ढो, नामेनासि अयोघरो॥
Ayogharamhi saṃvaḍḍho, nāmenāsi ayogharo.
२५.
25.
‘‘दुक्खेन जीवितो लद्धो, संपीळे पतिपोसितो।
‘‘Dukkhena jīvito laddho, saṃpīḷe patiposito;
अज्जेव पुत्त पटिपज्ज, केवलं वसुधं इमं॥
Ajjeva putta paṭipajja, kevalaṃ vasudhaṃ imaṃ.
२६.
26.
‘‘सरट्ठकं सनिगमं, सजनं वन्दित्व खत्तियं।
‘‘Saraṭṭhakaṃ sanigamaṃ, sajanaṃ vanditva khattiyaṃ;
अञ्जलिं पग्गहेत्वान, इदं वचनमब्रविं॥
Añjaliṃ paggahetvāna, idaṃ vacanamabraviṃ.
२७.
27.
‘‘‘ये केचि महिया सत्ता, हीनमुक्कट्ठमज्झिमा।
‘‘‘Ye keci mahiyā sattā, hīnamukkaṭṭhamajjhimā;
निरारक्खा सके गेहे, वड्ढन्ति सकञातिभि॥
Nirārakkhā sake gehe, vaḍḍhanti sakañātibhi.
२८.
28.
‘‘‘इदं लोके उत्तरियं, संपीळे मम पोसनं।
‘‘‘Idaṃ loke uttariyaṃ, saṃpīḷe mama posanaṃ;
अयोघरम्हि संवड्ढो, अप्पभे चन्दसूरिये॥
Ayogharamhi saṃvaḍḍho, appabhe candasūriye.
२९.
29.
‘‘‘पूतिकुणपसम्पुण्णा, मुच्चित्वा मातु कुच्छितो।
‘‘‘Pūtikuṇapasampuṇṇā, muccitvā mātu kucchito;
ततो घोरतरे दुक्खे, पुन पक्खित्तयोघरे॥
Tato ghoratare dukkhe, puna pakkhittayoghare.
३०.
30.
‘‘‘यदिहं तादिसं पत्वा, दुक्खं परमदारुणं।
‘‘‘Yadihaṃ tādisaṃ patvā, dukkhaṃ paramadāruṇaṃ;
३१.
31.
‘‘‘उक्कण्ठितोम्हि कायेन, रज्जेनम्हि अनत्थिको।
‘‘‘Ukkaṇṭhitomhi kāyena, rajjenamhi anatthiko;
निब्बुतिं परियेसिस्सं, यत्थ मं मच्चु न मद्दिये’॥
Nibbutiṃ pariyesissaṃ, yattha maṃ maccu na maddiye’.
३२.
32.
‘‘एवाहं चिन्तयित्वान, विरवन्ते महाजने।
‘‘Evāhaṃ cintayitvāna, viravante mahājane;
नागोव बन्धनं छेत्वा, पाविसिं काननं वनं॥
Nāgova bandhanaṃ chetvā, pāvisiṃ kānanaṃ vanaṃ.
३३.
33.
‘‘मातापिता न मे देस्सा, नपि मे देस्सं महायसं।
‘‘Mātāpitā na me dessā, napi me dessaṃ mahāyasaṃ;
सब्बञ्ञुतं पियं मय्हं, तस्मा रज्जं परिच्चजि’’न्ति॥
Sabbaññutaṃ piyaṃ mayhaṃ, tasmā rajjaṃ pariccaji’’nti.
अयोघरचरियं ततियं।
Ayogharacariyaṃ tatiyaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / चरियापिटक-अट्ठकथा • Cariyāpiṭaka-aṭṭhakathā / ३. अयोघरचरियावण्णना • 3. Ayogharacariyāvaṇṇanā
