| Library / Tipiṭaka / திபிடக • Tipiṭaka / அபதா³னபாளி • Apadānapāḷi |
8. ஆயாக³தா³யகத்தே²ரஅபதா³னங்
8. Āyāgadāyakattheraapadānaṃ
94.
94.
‘‘நிப்³பு³தே லோகனாத²ம்ஹி, ஸிகி²ம்ஹி வத³தங் வரே;
‘‘Nibbute lokanāthamhi, sikhimhi vadataṃ vare;
ஹட்டோ² ஹட்டே²ன சித்தேன, அவந்தி³ங் தூ²பமுத்தமங்.
Haṭṭho haṭṭhena cittena, avandiṃ thūpamuttamaṃ.
95.
95.
‘‘வட்³ட⁴கீஹி கதா²பெத்வா, மூலங் த³த்வானஹங் ததா³;
‘‘Vaḍḍhakīhi kathāpetvā, mūlaṃ datvānahaṃ tadā;
ஹட்டோ² ஹட்டே²ன சித்தேன, ஆயாக³ங் காரபேஸஹங்.
Haṭṭho haṭṭhena cittena, āyāgaṃ kārapesahaṃ.
96.
96.
‘‘அட்ட² கப்பானி தே³வேஸு, அப்³போ³கிண்ணங் 1 வஸிங் அஹங்;
‘‘Aṭṭha kappāni devesu, abbokiṇṇaṃ 2 vasiṃ ahaṃ;
அவஸேஸேஸு கப்பேஸு, வோகிண்ணங் ஸங்ஸரிங் அஹங்.
Avasesesu kappesu, vokiṇṇaṃ saṃsariṃ ahaṃ.
97.
97.
‘‘காயே விஸங் ந கமதி, ஸத்தா²னி ந ச ஹந்தி மே;
‘‘Kāye visaṃ na kamati, satthāni na ca hanti me;
உத³கேஹங் ந மிய்யாமி, ஆயாக³ஸ்ஸ இத³ங் ப²லங்.
Udakehaṃ na miyyāmi, āyāgassa idaṃ phalaṃ.
98.
98.
‘‘யதி³ச்சா²மி அஹங் வஸ்ஸங், மஹாமேகோ⁴ பவஸ்ஸதி;
‘‘Yadicchāmi ahaṃ vassaṃ, mahāmegho pavassati;
தே³வாபி மே வஸங் எந்தி, புஞ்ஞகம்மஸ்ஸித³ங் ப²லங்.
Devāpi me vasaṃ enti, puññakammassidaṃ phalaṃ.
99.
99.
‘‘ஸத்தரதனஸம்பன்னோ, திஸக்க²த்துங் அஹோஸஹங்;
‘‘Sattaratanasampanno, tisakkhattuṃ ahosahaṃ;
ந மங் கேசாவஜானந்தி, புஞ்ஞகம்மஸ்ஸித³ங் ப²லங்.
Na maṃ kecāvajānanti, puññakammassidaṃ phalaṃ.
100.
100.
‘‘ஏகத்திங்ஸே இதோ கப்பே, ஆயாக³ங் யமகாரயிங்;
‘‘Ekattiṃse ito kappe, āyāgaṃ yamakārayiṃ;
து³க்³க³திங் நாபி⁴ஜானாமி, ஆயாக³ஸ்ஸ இத³ங் ப²லங்.
Duggatiṃ nābhijānāmi, āyāgassa idaṃ phalaṃ.
101.
101.
‘‘படிஸம்பி⁴தா³ சதஸ்ஸோ…பே॰… கதங் பு³த்³த⁴ஸ்ஸ ஸாஸனங்’’.
‘‘Paṭisambhidā catasso…pe… kataṃ buddhassa sāsanaṃ’’.
இத்த²ங் ஸுத³ங் ஆயஸ்மா ஆயாக³தா³யகோ தே²ரோ இமா கா³தா²யோ அபா⁴ஸித்தா²தி.
Itthaṃ sudaṃ āyasmā āyāgadāyako thero imā gāthāyo abhāsitthāti.
ஆயாக³தா³யகத்தே²ரஸ்ஸாபதா³னங் அட்ட²மங்.
Āyāgadāyakattherassāpadānaṃ aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / அபதா³ன-அட்ட²கதா² • Apadāna-aṭṭhakathā / 8. ஆயாக³தா³யகத்தே²ரஅபதா³னவண்ணனா • 8. Āyāgadāyakattheraapadānavaṇṇanā
