| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༎ ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ༎
Namo tassa bhagavato arahato sammāsambuddhassa
སཾཡུཏྟནིཀཱཡོ
Saṃyuttanikāyo
མཧཱཝགྒོ
Mahāvaggo
༡. མགྒསཾཡུཏྟཾ
1. Maggasaṃyuttaṃ
༡. ཨཝིཛྫཱཝགྒོ
1. Avijjāvaggo
༡. ཨཝིཛྫཱསུཏྟཾ
1. Avijjāsuttaṃ
༡. ཨེཝཾ མེ སུཏཾ – ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏཏྲ ཁོ བྷགཝཱ བྷིཀྑཱུ ཨཱམནྟེསི – ‘‘བྷིཀྑཝོ’’ཏི། ‘‘བྷདནྟེ’’ཏི ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ –
1. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ཨཝིཛྫཱ, བྷིཀྑཝེ, པུབྦངྒམཱ ཨཀུསལཱནཾ དྷམྨཱནཾ སམཱཔཏྟིཡཱ, ཨནྭདེཝ 1 ཨཧིརིཀཾ ཨནོཏྟཔྤཾ ། ཨཝིཛྫཱགཏསྶ, བྷིཀྑཝེ, ཨཝིདྡསུནོ མིཙྪཱདིཊྛི པཧོཏི; མིཙྪཱདིཊྛིསྶ མིཙྪཱསངྐཔྤོ པཧོཏི; མིཙྪཱསངྐཔྤསྶ མིཙྪཱཝཱཙཱ པཧོཏི; མིཙྪཱཝཱཙསྶ མིཙྪཱཀམྨནྟོ པཧོཏི; མིཙྪཱཀམྨནྟསྶ མིཙྪཱཨཱཛཱིཝོ པཧོཏི; མིཙྪཱཨཱཛཱིཝསྶ མིཙྪཱཝཱཡཱམོ པཧོཏི; མིཙྪཱཝཱཡཱམསྶ མིཙྪཱསཏི པཧོཏི; མིཙྪཱསཏིསྶ མིཙྪཱསམཱདྷི པཧོཏི།
‘‘Avijjā, bhikkhave, pubbaṅgamā akusalānaṃ dhammānaṃ samāpattiyā, anvadeva 2 ahirikaṃ anottappaṃ . Avijjāgatassa, bhikkhave, aviddasuno micchādiṭṭhi pahoti; micchādiṭṭhissa micchāsaṅkappo pahoti; micchāsaṅkappassa micchāvācā pahoti; micchāvācassa micchākammanto pahoti; micchākammantassa micchāājīvo pahoti; micchāājīvassa micchāvāyāmo pahoti; micchāvāyāmassa micchāsati pahoti; micchāsatissa micchāsamādhi pahoti.
‘‘ཝིཛྫཱ ཙ ཁོ, བྷིཀྑཝེ, པུབྦངྒམཱ ཀུསལཱནཾ དྷམྨཱནཾ སམཱཔཏྟིཡཱ, ཨནྭདེཝ ཧིརོཏྟཔྤཾ། ཝིཛྫཱགཏསྶ, བྷིཀྑཝེ , ཝིདྡསུནོ སམྨཱདིཊྛི པཧོཏི; སམྨཱདིཊྛིསྶ སམྨཱསངྐཔྤོ པཧོཏི; སམྨཱསངྐཔྤསྶ སམྨཱཝཱཙཱ པཧོཏི; སམྨཱཝཱཙསྶ སམྨཱཀམྨནྟོ པཧོཏི; སམྨཱཀམྨནྟསྶ སམྨཱཨཱཛཱིཝོ པཧོཏི; སམྨཱཨཱཛཱིཝསྶ སམྨཱཝཱཡཱམོ པཧོཏི; སམྨཱཝཱཡཱམསྶ སམྨཱསཏི པཧོཏི; སམྨཱསཏིསྶ སམྨཱསམཱདྷི པཧོཏཱི’’ཏི། པཋམཾ།
‘‘Vijjā ca kho, bhikkhave, pubbaṅgamā kusalānaṃ dhammānaṃ samāpattiyā, anvadeva hirottappaṃ. Vijjāgatassa, bhikkhave , viddasuno sammādiṭṭhi pahoti; sammādiṭṭhissa sammāsaṅkappo pahoti; sammāsaṅkappassa sammāvācā pahoti; sammāvācassa sammākammanto pahoti; sammākammantassa sammāājīvo pahoti; sammāājīvassa sammāvāyāmo pahoti; sammāvāyāmassa sammāsati pahoti; sammāsatissa sammāsamādhi pahotī’’ti. Paṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡-༢. ཨཝིཛྫཱསུཏྟཱདིཝཎྞནཱ • 1-2. Avijjāsuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡-༢. ཨཝིཛྫཱསུཏྟཱདིཝཎྞནཱ • 1-2. Avijjāsuttādivaṇṇanā
